នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ នៅថ្ងៃទី៣ ខែតុលា ឆ្នាំ​២០២២​នេះ បានអញ្ជើញចុះពិនិត្យមើលការសាងសង់កន្លែងដាក់រថយន្តសេរីទំនើប ដែល​ជា​ជំនួយ​ឥត​សំណង របស់ក្រសួងការពារប្រទេស នៃសាធារណរដ្ឋប្រជាមានិតចិន ជូន​ក្រសួង​ការពារ​ជាតិ​កម្ពុជា រួចត្រូវប្រគល់ឲ្យកងពលតូចដឹកជញ្ជូនលេខ៩៩រក្សាទុក និង​គ្រប់​គ្រង​ ដើម្បី​ត្រៀម​ជួយ​គាំទ្រ​ដល់​ការរៀបចំកិច្ចប្រជុំរដ្ឋមន្ត្រីការពារជាតិអាស៊ាន និងកិច្ចប្រជុំពាក់ព័ន្ធនាពេលខាងមុខ ។

ឆ្លៀតក្នុងឱកាសនោះដែរនាយឧត្តមសេនីយ៍ ម៉ឹង សំផន ក៏បាន​អញ្ជើញ​ពិនិត្យ​មើល​ក្រុម​អ្នក​ជំនាញ​បច្ចេកទេស​នៃ​អនុព័ន្ធ​យោធា​ស្ថាន​ទូត​ចិន​ប្រចាំ​កម្ពុជា​ធ្វើ​ការ​បណ្តុះ​បណ្តាល​ដល់​យោធិន​ចំនួន​ ១៤៥នាក់នៃកងពលតូចដឹកជញ្ជូនលេខ៩៩ អំពីការប្រើ​ប្រាស់​រថយន្ត​សេរី​ទំនើប​ដែល​ភាគី​ចិន​បាន​ផ្តល់ឲ្យកម្ពុជា ដោយផ្តោតសំខាន់៣ចំណុចធំៗ គឺទី១-Options រថយន្តសេរីថ្មីទាំងនេះ, ទី២-ការថែទាំរថយន្ត និងទី៣-ការជួសជុលរថយន្ត។

សូមបញ្ជាក់ថា នៅព្រឹកថ្ងៃទី១ ខែកញ្ញា ឆ្នាំ២០២២នេះ ក្រសួងការពារជាតិកម្ពុជា-ចិន បាន​រៀបចំ​ពិធីប្រគល់ និងទទួលរថយន្ត សេរីទំនើបចំនួន១៥០គ្រឿង និងសម្ភារៈ​ការិយាល័យ​មួយ​ចំនួន ដែល​ជា​ជំនួយ​ឥតសំណង​របស់​ក្រសួង​ការពារ​ជាតិ​សាធារណរដ្ឋ​ប្រជាមានិតចិន​ជូន​ក្រសួង​ការពារ​ជាតិជាតិកម្ពុជា ក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងឯកឧត្តម វ៉ាង វិនធាន ឯកអគ្គរដ្ឋទូតចិនប្រចាំកម្ពុជា នៅវិមាន​ឈ្នះឈ្នះ ។

រថយន្តសេរីទំនើបចំនួន ១១៥គ្រឿងត្រូវបានប្រគល់ជូនកងពលតូចដឹកជញ្ជូនលេខ៩៩ គ្រប់​គ្រង​ និង​រក្សាទុក ដើម្បីត្រៀមជួយគាំទ្រដល់ការរៀបចំកិច្ចប្រជុំរដ្ឋមន្ត្រីការពារជាតិអាស៊ាន និង​កិច្ច​ប្រជុំ​ពាក់ព័ន្ធ ហើយរថយន្តទាំងអស់នោះត្រូវបាន ឧត្តមសេនីយ៍ទោ ហ៊ុល សំអុន មេ​បញ្ជាការ​កង​ពល​តូច​ដឹក​ជញ្ជូនលេខ៩៩ ដឹកនាំកម្លាំងនាំយកមករក្សាទុកនៅដោយសុវត្ថិភាព និង​គ្រប់​ចំនួន​ក្នុង​អង្គភាព​៕ អត្ថបទ៖ បាន ចក់