កំពង់ចាម៖ បច្ចុប្បន្ន ពលរដ្ឋនៅឃុំទងត្រឡាច ស្រុកស្រីសន្ធរ ខេត្តកំពង់ចាម មានជីវភាពធូរធារ​ជាងមុនក្រោយ ពេលក្នុងមូលដ្ឋានមានការអភិវឌ្ឍរីកចម្រើន ក្រោមការដឹកនាំរបស់គណបក្ស​ប្រជាជនកម្ពុជា។

លោកឧញ៉ា ឡូវ ហ៊ឹង ទីប្រឹក្សាសម្តេចតេជោ ហ៊ុន សែន នាយករដ្ឋមន្រ្តីកម្ពុជា និងជាប្រធានក្រុម ការងារថ្នាក់ជាតិ​ចុះឃុំទងត្រឡាច ស្រុកស្រីសន្ឋរ​ ខេត្តកំពង់ចាម ​នៅថ្ងៃទី០២ ខែតុលា នេះ បាន​អញ្ជើញចុះជួបសំណេះសំណាលជាមួយប្រជាពលរដ្ឋរស់នៅក្នុងឃុំទងត្រឡាច។

លោកឧញ៉ា បានមានប្រសាសន៍ថា ដោយមើលឃើញពីតម្រូវការចាំបាច់ និងការខ្វះខាតរបស់​ប្រជាពល​រដ្ឋក្នុងមូលដ្ឋាននេះ ​ក្រុមការងារ ​បានចូលរួមជាមួយអាជ្ញាធរ ជួយអភិវឌ្ឍហេដ្ឋារចនា​សម្ព័ន្ធ ​មានដូចជា៖ ផ្លូវចាក់បេតុងជាច្រើនខ្សែ ដាក់ ភ្លើងសូឡាតាមផ្លូវ ​សាងសង់អគារសិក្សា និង​វត្តអារាមជាដើម។ តទៅមុខទៀត ក្រុមការងារ នឹងបន្តអភិ វឌ្ឍក្នុងមូលដ្ឋាននេះបន្ថែមទៀត ។

ប្រជាពលរដ្ឋ ​បាននិយាយថា បច្ចុប្បន្ន ក្នុងមូលដ្ឋានពិតជាមានការអភិវឌ្ឍ មានផ្លូវល្អ មាន​សាលារៀន មន្ទីរពេទ្យ និងការផ្តល់សេវាសាធារណៈជូនប្រជាពលរដ្ឋឆាប់រហ័ស ។ល។

ក្រោមការដឹកនាំរបស់សម្តេចតេជោ ហ៊ុន សែន នាយរដ្ឋមន្រ្តី ​ចាប់តាំងពីប្រទេសត្រូវបានរំដោះ ចេញ​ពីសង្គ្រាម​ រហូតដល់បច្ចុប្បន្ន គឺប្រទេសកម្ពុជា ត្រូវបានគេមើលឃើញថាមាន​ការ​អភិវឌ្ឍ​រីកចម្រើន គ្រប់វិស័យ ​និងជាពិសេសប្រជាពលរដ្ឋរស់នៅក្នុងភាពសុខសាន្ត ដោយសារប្រទេសជាតិ​មានសុខសន្តិភាព​ ពេញបូរិបូណ៍៕អត្ថបទ៖ ទូច សោភ័ណ