ភ្នំពេញ៖ ក្រុមការងារគ្រូពេទ្យនៃការិយាល័យសុខាភិបាល ស្រុកប្រតិបតិ្តមេគង្គ និងការិយាល័យ​សុខាភិបាល ស្រុកប្រតិបតិ្តសែនសុខ មនី្ទរសុខាភិបាល ​នៃរដ្ឋបាលរាជធានីភ្នំពេញ សហការ​ជាមួយ​នាយកដ្ឋានអធិការកិច្ចការងារ ​នៃក្រសួងការងារ និងបណ្តុះបណ្តាលវិជ្ជាជីវៈ​ រសៀលថ្ងៃទី២ ខែតុលា ឆ្នាំ២០២២ ​បានរៀបចំចុះចាក់វ៉ាក់សាំងបង្ការជំងឺកូវីដ-១៩​ ជូនបងប្អូន​កម្មករនិយោជិត ផ្ទាល់ដល់​រោងចក្រស្ព័ត ប្រដាក់ ខេមបូឌា ហ្គាម៉ិន ឯ.ក ស្ថិតក្នុងខណ្ឌសែនសុខ រាជធានីភ្នំពេញ។

បើតាមលោកវេជ្ជបណ្ឌិត ប្រាក់ សុវណ្ណ ប្រធានកម្មវិធីផ្តល់ថ្នាំបង្ការ នៃការិយាល័យសុខាភិបាល ស្រុក​ប្រតិបតិ្តមេគង្គ និងលោកអនុបណ្ឌិត អ៊ុក សាន់ដេ ប្រធានផ្នែកបច្ចេកទេស នៃការិយាល័យ​សុខាភិបាល ស្រុកប្រតិបតិ្តសែនសុខ បានឲ្យដឹងថា សកម្មភាពចុះចាក់វ៉ាក់សាំងបង្ការជំងឺកូវីដ-១៩ ជូន​បងប្អូនកម្មករ កម្មការនី និយោជិត ​នៅតំបន់រោងចក្រ ​បាន​ចាប់​ផ្តើមកាលពី​ម្សិលមិញ ដើម្បី​ការពារបងប្អូនកម្មករ ​កម្មការិនី និយោជិត ជៀសផុត​ពីការរីករាលដាលជំងឺកូវីដ-១៩ និង​កុំ​ឲ្យ​ប៉ះពាល់ដល់ខ្សែសង្វាក់ផលិតកម្មរបស់រោងចក្រផងដែរ។ ​

ជាក់ស្តែងនៅរសៀលនេះ​ ក្រុមគ្រូពេទ្យរបស់យើង​ ក៏បានចាក់វ៉ាក់សាំងបង្ការជំងឺកូវីដ-១៩ជូនកម្មករ ដែលមានចំនួនសរុប៥២០នាក់ ក្នុងនោះស្រី៣៦០នាក់ បរទេស០៣នាក់ និងចាក់វ៉ាក់សាំងបាន​ចំនួន ៤៤៤នាក់ ស្រី៣៧១នាក់ ប្រុស៧៣នាក់ ចែកចេញជាដូសទី១​ បានចំនួន០១នាក់, ដូសទី២ បានចំនួន០៤នាក់, ដូសទី៣ បានចំនួន៦៦នាក់, ដូសទី៤ ​បានចំនួន១០១នាក់ និងដូសទី៥ បានចំនួន២៧២នាក់។

ជាមួយគ្នានោះដែរ កម្មករ និយោជិតរោងចក្រ ជាច្រើននាក់ មកទទួលការចាក់វ៉ាក់សាំង​បង្ការ​ជំងឺ​កូវីដ-១៩ ​ចាប់ពីដូសមូលដ្ឋាន ​រហូត​ដល់ដូសជំរុញ ​ពីក្រុមការងារគ្រូពេទ្យនៃការិយាល័យ​សុខាភិបាល ​ស្រុក​ប្រតិបតិ្តមេគង្គ ​និង​ការិយាល័យ​សុខាភិបាល ​ស្រុកប្រតិបតិ្តសែនសុខ និង​មានការ​ចូលរួម​សម្រប​សម្រួលពីមន្រី្តក្រសួងការងារ​ និងបណ្តុះបណ្តាលវិជ្ជាជីវៈ ​នៅរោងចក្រស្ព័ត ប្រដាក់ ខេមបូឌា ហ្គាម៉ិន ឯ.ក ​បានគោរពថ្លែងអំណរគុណជូនចំពោះប្រមុខរាជរដ្ឋាភិបាល ក៏ដូចជា​ក្រសួងសុខាភិបាល ​បានខិតខំស្វែងរកវ៉ាក់សាំងកូវីដ-១៩​ និង​អនុញ្ញាត​ឲ្យ​ក្រុមការងារគ្រូពេទ្យ ចុះមក​ចាក់វ៉ាក់សាំង​ដល់​កន្លែងបំពេញការងារ ​ដើម្បីសង្រ្គោះ​ និងទប់ស្កាត់ គេចផុតពីការ​ចម្លង​មេរោគកូវីដ-១៩។

ជាចុងក្រោយលោកវេជ្ជបណ្ឌិត ប្រាក់ សុវណ្ណ ​ប្រធានកម្មវិធីផ្តល់ថ្នាំបង្ការ នៃការិយាល័យ​សុខាភិបាល ស្រុកប្រតិបតិ្តមេគង្គ ​ក៏បានសូម​អំពាវនាវ​ដល់បងប្អូនកម្មករ ​ប្រជាពលរដ្ឋទាំងអស់ មិនថា​បុរស ស្រី្ត ឬកុមារនោះទេ ​សុំមកចូលរួមទទួលយកវ៉ាក់សាំងបង្ការជំងឺកូវីដ១៩ ឲ្យបាន​គ្រប់ៗគ្នា​ និងអនុវត្តវិធានការ៣កុំ ៣ការពារ ​និងវិធានការសំខាន់ៗ ជៀសផុតពីជំងឺដ៏កាច​សាហាវនេះ ​ដើម្បីឲ្យប្រទេសកម្ពុជា ​ទទួល​បាន​ជោគជ័យ​ក្នុងការទប់ស្កាត់ និងប្រយុទ្ធប្រឆាំង​នឹងជំងឺកូវីដ-១៩ផងដែរ៕ អត្ថបទ រដ្ឋា