បន្ទាយមានជ័យ៖ បន្ទាប់មានភ្លៀងធ្លាក់ក្នុងរយៈពេលប៉ុន្មានថ្ងៃជាប់ៗគ្នា បានធ្វើឱ្យបរិមាណទឹកនៅទំនប់អូរខៃដនហក់ឡើងដែលទាមទារឱ្យអាជ្ញាធរក្រុងប៉ោយប៉ែតធ្វើកាយបើករំដោះទឹក និងបញ្ចៀសការជន់លិចកំណាត់ផ្លូវជាតិលេខ៥។
នៅថ្ងៃទី០៣ ខែតុលា ឆ្នាំ២០២២ លោក គាត ហ៊ុល អភិបាលក្រុងប៉ោយប៉ែត បានឲ្យដឹងថា យោងតាមស្ថានភាពនារយ:ពេល២ថ្ងៃចុងក្រោយ បន្ទាប់ពីមានភ្លៀងធ្លាក់យ៉ាងខ្លាំង បានបង្កជាជំនន់ទឹកភ្លៀងក្នុងសង្កាត់មួយចំនួនជិតព្រំដែនកម្ពុជា-ថៃ និងមានការហក់ឡើងបរិមាណទឹកនៅទំនប់អូរខៃដនស្ថិតក្នុងសង្កាត់និម្មិត។
លោក អភិបាលក្រុងប៉ោយប៉ែត បន្តថា ភ្លាមៗបន្ទាប់កម្រិតទឹកទំនប់អូរខៃដនហក់ឡើង អាជ្ញាធរ រួមជាមួយកងកម្លាំងចម្រុះបាននាំច្រកបាវ ដើម្បីបញ្ចៀសទឹកជំនន់ហូរលិចកំណាត់ផ្លូវជាតិលេខ៥។
លោកអភិបាលក្រុងប៉ោយប៉ែតបញ្ជាក់ថា ស្របពេលបរិមាណទឹកក្នុងទំនប់អូរខៃដនហក់ឡើងនេះ អាជ្ញាធរបានសម្រេចប្រើប្រាស់គ្រឿងចក្រ ដើម្បីកាយបើកមុខរំដោះទឹក ទៅទីវាលផ្នែកខាងក្រោមដូចជាស្រុកមង្គលបុរី និងក្រុងសិរីសោភ័ណ។
ជាមួយនឹងការរំដោះទឹកនេះ លោកអភិបាលក្រុងប៉ោយប៉ែត បានអំពាវនាវដល់ប្រជាពលរដ្ឋរស់នៅផ្នែកខាងក្រោមមេត្តាប្រុងប្រយ័ត្ន និងត្រូវរាយការណ៍ជាបន្ទាន់ក្នុងករណីមានផលប៉ះពាល់ដល់ផ្ទះសម្បែងរបស់បងប្អូនប្រជាពលរដ្ឋ។
ជំនន់ទឹកភ្លៀងក្នុងក្រុងប៉ោយប៉ែត មានសង្កាត់បីដែលរងផលប៉ះពាល់ ផ្ទះសម្បែងប្រជាពលរដ្ឋ ដូចជា សង្កាត់អូរជ្រៅ សង្កាត់ផ្សារកណ្តាល និងសង្កាត់ប៉ោយប៉ែត ខណ:ប្រជាពលរដ្ឋរស់នៅលើទីទួលសុវិត្ថភាពមានជាង១០០គ្រួសារ។
គិតត្រឹមថ្ងៃនេះ ខេត្តបន្ទាយមានជ័យមានក្រុង និងស្រុកចំនួន៦ បានរងផលប៉ះពាល់ដោយសារទឹកជនន់ ដោយក្នុងចំណោមប្រជាពលរដ្ឋសរុបប្រមាណ៨ពាន់គ្រួសារ ឃើញថាស្រុកព្រះនេត្រមានប្រជាពលរដ្ឋច្រើនជាងគេ៕អត្ថបទ៖ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
