​បាល់ទាត់៖ កីឡាករ Miguel Ángel Junco Martínez ហៅ Mika និង​មិត្ត​រួម​ក្រុម Jean Marie Privat Befolo Mbarga ខ្សែប្រយុទ្ធ​ជួរមុខ​ក្លិប​ព្រះខ័ន​រាជ​ស្វាយរៀង បាន​ក្រសោប​កៅអី​កំពូល​តារាង ២​ផ្សេងគ្នាក្នុង​ក្រប​ខណ្ឌ​លី​គ​កំពូល​កម្ពុជាសប្ដាហ៍​ទី​៥ ខណៈ​ក្រុម​ខ្លួនទើប​ប្រកួត​បាន ៣​ប្រកួត​ប៉ុណ្ណោះ។​

​ចំពោះ​ខ្សែប្រយុទ្ធ​សញ្ជាតិ​អេ​ស្ប៉ា​ញ Mika បាន​ឈរ​កំពូល​តារាង​ជា​កីឡាករ​ស៊ុត​បញ្ចូល​ទី​ច្រើនជាងគេ​ Top-Scorers ជា​បណ្ដោះអាសន្នដោយ​រកបាន ៦​គ្រាប់ក្នុងចំណោម ៣​ប្រកួត ពោលគឺ​ក្នុង​ ១​ប្រកួតគេ​រកបាន ២​គ្រាប់។ លើសពីនេះ Mika ក៏បាន​បញ្ជូន​បាល់​ឲ្យ​មិត្ត​រួម​ក្រុម​ទាត់​បញ្ចប់​ទី ឬ Assist បាន​ម្ដង​ផងដែរ។​ ​ក្នុង​តារាង Top-Scorers នេះដែរ ក្រៅពី Mika គេ​ក៏​ចាប់អារម្មណ៍​ខ្លាំងចំពោះ​ខ្សែប្រយុទ្ធ​ក្លិប​អាស៊ី​អឺរ៉ុប Abee Ndjoo Hurbert ផងដែរ ដែល​តែង​រកបាន​គ្រាប់​បាល់​ស្ទើ​គ្រប់​ការប្រកួត ខណៈ​បច្ចុប្បន្ន​កីឡាករ​សញ្ជាតិ​កា​មេ​រ៉ូ​ន​រូបនេះ កំពុង​ឈរ​លេខ​រៀង​ទី​២ បន្ទាប់ពី​កីឡាករ Mika ​ក្រោយ​លេង​បាន ៤​ប្រកួត និង​រកបាន ៥​គ្រាប់។ ចំ​ណែក​ខ្សែប្រយុទ្ធ​សញ្ជាតិ​កា​មេ​រ៉ូ​ន បាន​កំពូល​តារាង​កីឡាករ​បញ្ជូន​បាល់​ឲ្យ​មិត្ត​រួម​ក្រុម​បញ្ចប់​ទី​បាន​ច្រើនជាងគេ ឬ Assist ច្រើនជាងគេដោយ ៣​ប្រកួតគេ​បាន​បញ្ជូន​បាល់​ឲ្យ​មិត្ត​រួម​ក្រុម​ទាត់​បញ្ចប់​ទី ៥​លើក ក្នុងនោះ ៤​លើកគេ​បាន​បញ្ជូន​ឲ្យ Mika។ លើសពីនេះ Privat ស៊ុត​បញ្ចូល​ទី​គូប្រកួត​បាន ៣​គ្រាប់​ផងដែរ។​

​ប៉ុន្ដែ​អ្វីដែល​គួរ​ឲ្យ​កត់សម្គាល់ បន្ទាប់ពី​លី​គ​ចាប់ផ្ដើមបាន ៥​សប្ដាហ៍​កន្លងមក គេ​បាន​សម្លឹង​ឃើញ​កីឡាករ ២​រូបដែល​កំពុង​លេចធ្លោរ​ខ្លាំង​នៅ​តំបន់​ប្រយុទ្ធ គឺ​កីឡាករ Mika និង Privat ដែល​ពួកគេ​បាន​ក្លាយជា​ដៃគូ​ដ៏​ល្អ ក្នុងការ​សហការគ្នារ​ក​គ្រាប់​បាល់ ដែល​ជួយ​ឲ្យ​ព្រះខ័ន​រាជ​ស្វាយរៀង​ឈ្នះ ៣​ប្រកួត​ជាប់​គ្នានាពេល​កន្លងមក និង​ទទួលបាន​ការកោតសរសើ​រ​ពី​អ្នកគាំទ្រ​ជាច្រើន​ទៀតផង៕

​អត្ថបទ៖ លី ឈុន​ឡា