ភ្នំពេញ៖ ប្រតិបត្តិករធ្វើការក្នុងវិស័យទេសចរណ៍ សុទ្ធតែបង្ហាញសុទិដ្ឋិនិយមចំពោះការសម្រេចថ្មី របស់រដ្ឋាភិបាលដោយលុបចោលរនាំងរឹតត្បិតទាំងអស់ ចំពោះការធ្វើដំណើរចូលមកកម្ពុជា។ ពួកគាត់ជឿជាក់ថា ការសម្រេចថ្មីរបស់រដ្ឋាភិបាល គឺនឹងអាចស្រូបទាញភ្ញៀវទេសចរបរទេសកាន់តែច្រើនចូលមកកម្ពុជា ខណៈរដូវភ្ញៀវទេសចរច្រើន នឹងចូលមកដល់ក្នុងខែ វិច្ឆិកាខាងមុខ។
រាជរដ្ឋាភិបាលកម្ពុជាទើបសម្រេចថ្មី ដោយដកចេញរនាំងរឹតត្បិតការធ្វើដំណើរចូលមកកម្ពុជាទាំងអស់ ពោលគឺលែងតម្រូវឱ្យ បង្ហាញលិខិតបញ្ជាក់សុខភាព លែងតម្រូវឱ្យបង្ហាញលិខិតចាក់វ៉ាក់សាំងជាដើម។ ការសម្រេចថ្មីនេះ គឺទទួលបានការគាំទ្រ ពីប្រតិបត្តិករដែលធ្វើការក្នុងវិស័យទេសចរណ៍។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានលើកឡើងថា នេះជាការសម្រេចដែលមិនយឺតពេលវេលានោះទេ ទោះរដូវភ្ញៀវច្រើនចូលមកដល់ក្នុងខែ វិច្ឆិកាក្ដី ។ លោក បន្តថា កន្លងមកកម្ពុជាក៏បានបើកទទួលភ្ញៀវទេសចរអន្តរជាតិទូលំទូលាយ ខណៈបណ្ដាប្រទេសជាច្រើននៅតែបន្តការរឹតត្បិតចំពោះការធ្វើដំណើរចូលប្រទេសខ្លួន។ សម្រាប់ប្រជាពលរដ្ឋដែលប្រកបរបរ កង់បី ដឹកភ្ញៀវទេសចរបរទេសវិញ ពួកគាត់ទទួលបានការដឹកភ្ញៀវរៀងរាល់ថ្ងៃ ក្នុងពេលបច្ចុប្បន្ន។
ក្រោយទទួលបានដំណឹងពីការដកចេញការរឹតត្បិតចំពោះការធ្វើដំណើរចូលមកកម្ពុជាបន្ថែមទៀតនេះ ពួកគាត់កាន់តែសប្បាយចិត្ត ដោយពួកគាត់ជឿជាក់ថា នឹងមានភ្ញៀវទេសចរបរទេសកាន់តែច្រើនចូលមកកម្ពុជា ដែលនឹងធ្វើឱ្យជីវភាពពួកគាត់កាន់តែប្រសើរ។
សម្រាប់លោក Nik Zarza ជាភ្ញៀវទេសចរជនជាតិអង់គ្លេស ដែលធ្វើដំណើរកំសាន្តមកកម្ពុជា ជាលើកដំបូង ក៏បង្ហាញការគាំទ្រចំពោះការសម្រេចរបស់រដ្ឋាភិបាលកម្ពុជា ក្នុងការដកចេញការរឹតត្បិតទាំងអស់ផងដែរ។ លោកថា ការសម្រេចនេះ គឺជាការផ្ដល់ភាពងាយស្រួលសម្រាប់ភ្ញៀវបរទេស ក្នុងការចូលមកទស្សនាកម្ពុជា។
សម្រាប់វិស័យទេសចរណ៍ក្នុងឆ្នាំ ២០២២នេះ គឺមានការងើបឡើងវិញល្អប្រសើរ តាមរយៈកំណើនភ្ញៀវទេសចរជាតិ និងអន្តរជាតិ។ ជាក់ស្ដែង តាមទិន្នន័យ ក្នុង៩ខែដំបូងនេះ គឺកម្ពុជាទទួលបានភ្ញៀវទេសចរអន្តរជាតិចំនួន១.២៥លាននាក់។ ចំនួននេះមានការកើនចំនួន៨៥០ ភាគរយ បើធៀបនឹងពេលវេលាដូចគ្នាក្នុងឆ្នាំ២០២១ ដែលរងការប៉ះពាល់ដោយសារវិបត្តិកូវីដ១៩៕ អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
