ភ្នំពេញ៖ ពិធីសំណេះសំណាលជាមួយនិស្សិតទើបបញ្ចប់កម្មសិក្សា និងត្រៀមទៅបន្តកម្មសិក្សា​នៅ​ប្រទេសអ៊ីស្រាអែល ក្នុងឆ្នាំសិក្សា ២០២២-២០២៣ របស់វិទ្យាស្ថានជាតិកសិកម្មព្រែកលៀប ដែល​ប្រព្រឹត្តទៅក្រោមអធិបតីភាពរបស់ឯកឧត្តម ហ៊ុន ម៉ានី ប្រធានស.ស.យ.ក. នៅស្នាក់ការ ស.ស.យ.ក. រាជធានីភ្នំពេញ អគារខេមរានី នាថ្ងៃទី០៤ ខែតុលា ឆ្នាំ ២០២២។

ពិធីសំណេះសំណាលខាងលើមានវត្តមានអញ្ជើញចូលរួមពីឯកឧត្តម ស សុខា អនុប្រធាន​ស.ស.យ.ក. និងជាប្រធានក្រុមប្រឹក្សាយុវជនគ្រឹះស្ថានឧត្តមសិក្សានៃស.ស.យ.ក. ព្រមទាំង​ឯកឧត្តម លោកជំទាវ លោក លោកស្រី សមាជិក សមាជិកា គណៈអចិន្រ្តៃយ៍នៃគណៈកម្មាធិការ​កណ្តាល ស.ស.យ.ក. និងសិស្ស និស្សិតប្រមាណ៣៧០ នាក់ ។

ឯកឧត្តមបណ្ឌិត ធន់ វឌ្ឍនា នាយកវិទ្យាស្ថានជាតិកសិកម្ម ព្រែកលៀប បានសម្តែងនូវការ​ស្វាគមន៍​យ៉ាងកក់ក្តៅចំពោះវត្តមានរបស់ឯកឧត្តម ហ៊ុន ម៉ានី និងបានធ្វើរបាយការណ៍អំពីស្ថានភាព​នៃ​ការ​បណ្តុះបណ្តាលរបស់​វិទ្យាស្ថានទៅកាន់​សិស្សនិស្សិត​ស្រប​តាមបេសកកម្ម បណ្តុះបណ្តាល​ធនធាន​មនុស្ស​ផ្តល់ឱកាសអោយសិស្សានុសិស្សធ្វើការស្រាវជ្រាវ​តាមរយៈការផ្សារភ្ជាប់ទ្រឹស្តី ជាមួយការ​អនុវត្តផ្ទាល់​ និង​លើកទឹកចិត្តអោយ​សិស្សនិស្សិត​ចូលរួមធ្វើការងារស័្មគ្រ​ចិត្តដើម្បីជួយសង្គមជាតិ។

ជាមួយគ្នានោះ​ឯកឧត្តម ហ៊ុន ម៉ានី ​បានធ្វើការកោតសរសើរ​ និងវាយតម្លៃខ្ពស់ចំពោះការយក​ចិត្ត​ទុក​ដាក់​របស់វិទ្យាស្ថាន ​លោកគ្រូ អ្នកគ្រូ បុគ្គលិកអប់រំទាំងអស់ ដែលបានខិតខំបណ្តុះបណ្តាល​ធនធានមនុស្ស ​ជាពិសេសផ្តល់ឱកាសអោយសិស្ស​និស្សិត​ទៅចុះកម្មសិក្សា​នៅប្រទេស​អ៊ីស្រាអែល។

បន្ថែមពីនេះ ឯកឧត្តម បានធ្វើការកោត​សរសើរ​ចំពោះកិច្ច​ខំ​ប្រឹងប្រែង ការតស៊ូ និងការ​ជំនះ​ពុះពារ​ប្រកបដោយការប្តេជ្ញាចិត្ត ​និងការតាំងចិត្តខ្ពស់របស់ប្អូនៗ ​និស្សិតរហូតដល់ទទួលបានការ​ជ្រើស​រើស​ឱ្យចុះកម្មសិក្សាផងដែរ។

ឯកឧត្តម ហ៊ុនម៉ានី ក៏បាន​ឆ្លៀតចែករំលែកបទពិសោធន៍ផ្ទាល់ខ្លួន​ដែលឯកឧត្តមធ្លាប់​ជានិស្សិត​អាហារូបករណ៍​ទៅសិក្សានៅក្រៅប្រទេសមួយរូបផងដែរ។

បន្ថែមពីនេះ ឯកឧត្តម បានធ្វើការផ្តែផ្តាំដល់សិស្សនិស្សិតដែលត្រៀមទៅបន្តកម្មសិក្សា អោយ​ខិតខំ​ក្រេបយកចំណេះវិជ្ជា និងលើកទឹកចិត្តដល់សិស្សនិស្សិតដែលបានបញ្ចប់​កម្មសិក្សាអោយយក​បទពិសោធន៍ ​និងចំណេះដឹងដែលទទួលបាន​ មកប្រើប្រាស់ដើម្បីជួយខ្លួនឯង គ្រួសារ និងចូលរួម​ជាមួយ​រាជរដ្ឋាភិបាលក្នុងការអភិវឌ្ឍសង្គមជាតិ។

សូមបញ្ជាក់ផងដែរថា ​វិទ្យាស្ថានជាតិកសិកម្មព្រែកលៀប បាន​បញ្ជូន​សិស្សនិស្សិត ទៅបំពេញកម្ម​សិក្សានៅក្រៅប្រទេសជាច្រើន ដោយឡែកទៅប្រទេសអ៊ីស្រាអែល ​វិទ្យាស្ថាន បានបញ្ចូន​និស្សិត​ទៅបំពេញកម្មសិក្សាចាប់តាំងពីឆ្នាំ២០១៦ ដោយ​បាន​បញ្ជូន​និស្សិតចំនួន ៣៧៨ នាក់រួច​មកហើយ៕ អត្ថបទ រដ្ឋា