ភ្នំពេញ៖ នៅខណៈសាលារៀនមួយចំនួន នៅតាមបណ្តាខេត្តដូចជា ខេត្តរតនគិរី ខេត្តស្ទឹងត្រែង និងខេត្តផ្សេងទៀត កំពុងរងជំនន់ទឹកភ្លៀងជន់លិច ហើយធ្វើឲ្យសាលារៀនមួយចំនួនតូចផ្អាក​ដំណើរ​ការ​ជាបណ្តោះអាសន្ននោះ ​នៅពេលនេះ ក្រសួងអប់រំ យុវជន និងកីឡាបានអំពាវនាវ​គណៈគ្រប់គ្រងសាលាសិស្ស និងអាណាព្យាបាលសិស្ស បង្កើនប្រុងប្រយ័ត្នការពារខ្លួន និង​សហការដោះស្រាយរកសាលាក្បែរខាង​ ឬផ្តល់ការបង្រៀនសិស្សតាមប្រព័ន្ធអនឡាញ។

ឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និងកីឡា បានបញ្ជាក់ប្រាប់BTV នៅថ្ងៃទី៤ ខែតុលានេះថា នៅខណៈដែលសាលារៀនមួយចំនួនតូចនៅតាមបណ្តាខេត្តរង​ការលិចដោយ​ជំនន់ទឹកភ្លៀងនៅពេលនេះ ​ក្រសួងអប់រំបានណែនាំ ​ដូចឆ្នាំកន្លងមកដែរគឺ ​សូមស្នើបណ្តា​គណៈគ្រប់​គ្រងសាលា​ បន្តយកចិត្តទុកដាក់កម្រិតខ្ពស់​ តាមដានស្ថានភាពធម្មជាតិ ​ដោយយោង​ទៅលើការ​ព្យាករណ៍​ឧតុនិយមផ្លូវការ ​និងទិដ្ឋភាពផ្ទាល់នៅមូលដ្ឋាន។

ឯកឧត្តម បន្តថា ក្រសួងអប់រំ យុវជន និងកីឡាមានក្រុមការងារគ្រប់គ្រងគ្រោះមហន្តរាយវិស័យអប់រំ ដែលបានបន្តកិច្ចសហការណ៍ជាមួយគ្រប់ភាគីពាក់ព័ន្ធ​ដូចឆ្នាំកន្លងមកដែរ ជាពិសេសជាមួយ​គណៈគ្រប់គ្រង​គ្រឹះស្ថានសិក្សា និងអាជ្ញាធរមូលដ្ឋានផ្ទាល់ដើម្បីត្រៀម​លក្ខណៈអន្តរាគមន៍​ទៅ​លើកត្តាចាំបាច់តាមលទ្ធភាពជាក់ស្តែង។

ក្រសួងអប់រំ យុវជន និងកីឡា នៅតែបន្តស្វាគមន៍កិច្ចសហការវិជ្ជមានពីសំណាក់គ្រប់ភាគីពាក់ព័ន្ធ​លើ​វិធានការទប់ស្កាត់ ​និងការឆ្លើយតបលើផលជះពីគ្រោះទឹកជំនន់​ និង​ជំនន់​ទឹកភ្លៀងតាម​គ្រឹះស្ថាន​សិក្សា។

ក្នុងនាមក្រសួងអប់រំ យុវជន និងកីឡា ឯកឧត្តម រស់ សុវាចា បានអំពាវនាវដល់សិស្សានុសិស្ស លោកគ្រូ អ្នកគ្រូ បុគ្គលិកអប់រំ ​មាតាបិតា​និងគ្រប់ភាគីពាក់ព័ន្ធទាំង​អស់បង្កើនការប្រុងប្រយ័ត្ន​នា​រដូវភ្លៀងនេះ​ក្នុងការបន្តថែទាំសុខភាពនិងរក្សាសុវត្ថិភាព។

ឯកឧត្តម ក៏ស្នើសូមមាតាបិតាបន្តប្រុងប្រយ័ត្នខ្ពស់ដើម្បីចូលរួមការពារមិនឱ្យកូនលង់ទឹក។សូមគ្រប់ភាគីពាក់ព័ន្ធបន្តអនុវត្តវិធានការសុវត្ថិភាព​សុខភាព​ទាំងអស់​គ្នាឲ្យ​ចៀសផុត​ពីការឆ្លង​រោគា និងគ្រោះថ្នាក់នានា។ ​សិស្សានុសិស្សទាំងអស់ត្រូវបន្តខិតខំរៀនសូត្រក្នុងថ្នាក់និងរៀនខ្លួនឯងបន្ថែម ព្រមទាំងស្តាប់ដំបូន្មានពីសំណាក់មាតាបិតា៕ អត្ថបទ ស៊ុម សុខជា