បាត់ដំបង៖ ឯកឧត្តម សុខ លូ អភិបាលខេត្តបាត់ដំបង បានជំរុញទៅដល់អាជ្ញាធរ និងកងកម្លាំងប្រចាំការនៅតាម បន្ទាត់ព្រំដែនកម្ពុជា-ថៃ ក្នុងភូមិសាស្រ្តខេត្តបាត់ដំបង ត្រូវពង្រឹងកិច្ចសហប្រតិបត្តិការស្រាវជ្រាវបង្រ្កាបមេ ខ្យល់នាំមនុស្សឆ្លងដែន និងទប់ស្កាត់បទល្មើសឆ្លងដែនគ្រប់ប្រភេទ។
ក្នុងពិធីប្រកាសចូលកាន់មុខតំណែងលោក ខុង យ៉ាត់លួង ជាប្រធានទីស្នាក់ការត្រួតពិនិត្យច្រក ទ្វារព្រំដែនអន្តរជាតិភ្នំដី (គីឡូ១៣) ក្នុងស្រុកសំពៅលូន នៅថ្ងៃទី៣ ខែតុលា ឆ្នាំ២០២២ ឯកឧត្តម សុខ លូ បានណែនាំឱ្យអាជ្ញាធរ និងកងកម្លាំងប្រចាំការនៅតាមបន្ទាត់ព្រំដែន ត្រូវលុបបំបាត់ការឆ្លងដែនខុសច្បាប់ ទប់ស្កាត់ការលួចនាំចូលទំនិញគេចពន្ធ និងពង្រឹងការបង្រ្កាបបទល្មើសឆ្លងដែនគ្រប់ប្រភេទ។
ឯកឧត្តមអភិបាលខេត្ត បានណែនាំដល់មន្រ្តី និងកងកម្លាំងប្រចាំការនៅច្រកព្រំដែនអន្តរជាតិភ្នំដី ត្រូវពង្រឹងកិច្ចសហប្រតិបត្តិការជាមួយភាគីថៃអនុវត្តតាមអ្វីដែលភាគីកម្ពុជា-ថៃបានឯកភាពគ្នាកន្លងមក។
កាលពីចុងខែកញ្ញាកន្លងមកនេះ អភិបាលខេត្តបាត់ដំបង និងអភិបាលខេត្តស្រះកែវ បានធ្វើជា សហប្រធាន នៃកិច្ចប្រជុំ ស្ដីពីកិច្ចសហប្រតិបត្តិការរវាងខេត្តទាំងពីរ។
ជាលទ្ធផលភាគីទាំងពីរ បានសម្រេចឯកភាពគ្នាពង្រឹងកិច្ចសហការត្រួតពិនិត្យការធ្វើដំណើរឆ្លងដែន ដើម្បីទប់ស្កាត់ការលួចឆ្លងដែន ខុសច្បាប់ និងកំណត់យកច្រកទ្វារព្រំដែនអន្តរជាតិ បានខៅឌិន-ភ្នំដី (គីឡូ១៣) សម្រាប់បញ្ជូន-ទទួលពលករកម្ពុជា ដែលមានបំណងធ្វើដំណើរត្រឡប់ចូលប្រទេសវិញ៕អត្ថបទ៖ នឿត សុភក្ត្រ