ត្បូងឃ្មុំ៖ ក្រោយទឹកជំនន់ជន់លិចផ្ទះសម្បែងប្រជាពលរដ្ឋ ប្រមាណ ១០០គ្រួសារក្នុងខេត្តត្បូងឃ្មុំ ត្រូវបានជម្លៀសទៅរស់ នៅបណ្ដោះអាសន្នលើទីទួលសុវត្ថិភាព ដោយទទួលបានការយក​ចិត្តទុក​ដាក់​ជាខ្លាំងពីអាជ្ញាធរ។

ភ្លៀងធ្លាក់ប៉ុន្មានថ្ងៃចុងក្រោយនេះខ្លាំង និងជាប់ៗគ្នា ​បានធ្វើឱ្យកើតជាជំនន់ទឹកភ្លៀង លិចផ្ទះ​សម្បែង​របស់ប្រជាពលរដ្ឋភូមិបឹងទន្សោង ​ឃុំជីរោទ៍ទី១ ​ស្រុកត្បូងឃ្មុំ។

អាជ្ញាធរស្រុក ​បានរៀបចំទួលវិហារ ជាទីទួលសុវត្ថិភាព ​សម្រាប់ការរស់នៅជាបណ្ដោះអាសន្នរបស់​ពលរដ្ឋរងគ្រោះទឹកជំនន់។ ​អាជ្ញាធរបានយកចិត្តទុកដាក់ក្នុងការជួយផ្គត់ផ្គង់ ចំពោះការខ្វះខាតរបស់​ប្រជាពលរដ្ឋ ​ជាពិសេសថ្នាំពេទ្យ ​សម្រាប់ទប់ទល់នឹងជំងឺផ្សេងៗ។

ប្រជាពលរដ្ឋ ដែលត្រូវបានជម្លៀសទៅរស់នៅលើទួលសុវត្ថិភាព បានថ្លែងអំណរគុណដល់អាជ្ញាធរ ដែលបាន គិតគូរចំពោះសុខទុក្ខរបស់ពួកគេ ជួយពួកគេឱ្យអាចគេចផុតពីគ្រោះថ្នាក់ផ្សេងៗ។

លោក ទួន ឆៃលឹម មេឃុំជីរោទ៍ទី១ បានឲ្យដឹងថា ​រយៈពេលបីថ្ងៃហើយ ជំនន់ទឹកភ្លៀង​បាន​ហក់​ឡើង​លាយឡំជាមួយទឹកទន្លេមេគង្គ ​ធ្វើឲ្យលិចផ្ទះពលរដ្ឋភូមិនេះ ហើយប្រសិន​បើទឹក​បន្តឡើង​ទៀត​អាចបណ្ដាលឲ្យលិចភូមិផ្សេងៗ ​ទៀតដែរ ​​និងមនុស្សជាច្រើនទៀត នឹងត្រូវជម្លៀស​ទៅ​ទីទួលសុវត្ថិភាព ​ដែលរដ្ឋបាលស្រុក​បានរៀបចំរួចរាល់។

រដ្ឋបាលខេត្តត្បូងឃ្មុំ បានជំរុញអាជ្ញាធរមូលដ្ឋាន ​ឱ្យសហការជាមួយមន្ទីរសុខាភិបាលខេត្ត និង​មន្ទីរអភិវឌ្ឍន៍ ​ជនបទខេត្ត ​រៀបចំការរស់នៅរបស់ប្រជាពលរដ្ឋឲ្យបានល្អប្រកបដោយអនាម័យ មាន​ក្រុមគ្រូពេទ្យ ថ្នាំសង្កូវ ​ហើយ​បាន​ណែនាំ​បន្ថែមឲ្យប្រជាពលរដ្ឋ​ ដែលរងគ្រោះទឹកជំនន់ នៅ​ពេលនេះ ត្រូវបង្កើនការយកចិត្តទុកដាក់មើលថែទាំសុខភាពខ្លួនឱ្យបានល្អដែរ៕អត្ថបទ៖ ថុង សីហា