បន្ទាយមានជ័យ៖ ឯកឧត្តម ឧបនាយករដ្ឋមន្រ្តី កែ គឹមយ៉ាន បានស្នេីដល់ប្រជាពលរដ្ឋឱ្យបង្កេីនការប្រុងប្រយ័ត្នខ្ពស់ពីបញ្ហាទឹកជំនន់​ដែលបន្តហក់​​ឡេីងតាម​បណ្តាក្រុង-ស្រុកក្នុងខេត្តបន្ទាយមានជ័យ។ថ្លែងក្នុងពិធីសំណេះសំណាល និងចែកអំណោយជូនប្រជាពលរដ្ឋជាង២០០គ្រួសារក្នុងស្រុកព្រះនេត្រព្រះ និង​ស្រុកភ្នំស្រុក ស្ថិតក្នុងខេត្តបន្ទាយមានជ័យ នៅថ្ងៃទី៤ ខែតុលា ឆ្នាំ២០២២ ឯកឧត្តម ឧបនាយករដ្ឋមន្រ្តី កែ គឹមយ៉ាន ប្រធានក្រុមការងាររាជរដ្ឋាភិបាល​ចុះមូលដ្ឋានខេត្តបន្ទាយមានជ័យ បាន​មាន​ប្រសាសន៍ ពាំនាំនូវការផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែន នាយករដ្ឋមន្រ្តី ​ជូនដល់ប្អូនប្រជាពលរដ្ឋរងគ្រោះដោយទឹកជំនន់ក្នុងខេត្តបន្ទាយមានជ័យ។ 

ឯកឧត្តម ឧបនាយករដ្ឋមន្រ្តី បានចូលរួមសម្ដែងនូវទុក្ខលំបាករបស់ប្រជាពលរដ្ឋក្នុងគ្រោះទឹកជំនន់នេះ និង ចូលរួមរំលែកទុក្ខចំពោះគ្រួសារ ដែលបានបាត់បង់ជីវិតក្នុងពេលមានគ្រោះទឹកជំនន់នេះផងដែរ។

ឯកឧត្តម ឧបនាយករដ្ឋមន្រ្តី ថ្លែងថា បញ្ហាចំពោះមុខនៃគ្រោះទឹកជំនន់ទាមទារឱ្យអាជ្ញាធរ មូលដ្ឋាន រួមទាំងកងកម្លាំងចម្រុះយកចិត្តទុកដាក់ជាប់ជាប្រចាំ ដោះស្រាយយ៉ាងណាឱ្យបានល្អ ចំពោះសុវត្ថិភាពរបស់កុមារតូចៗ និងអ្នកមានជំងឺតាមខ្នងផ្ទះជាដេីម ក្នុងករណៅទឹកហក់ឡេីងជាគំហុក។ ឯកឧត្តម ឧបនាយករដ្ឋមន្រ្តី ថ្លែងបន្តថា សុវត្ថិភាព និងអាយុជីវិតរបស់ប្រជាពលរដ្ឋគឺជាបញ្ហាចំបង ដែលកងកម្លាំងទាំងអស់ត្រូវគិតគូរឱ្យបានម៉ត់ចត់ បំផុត។

ឯកឧត្តម ឧបនាយករដ្ឋមន្រ្តី បានសំនូមពរដល់ប្រជាកសិករអាស្រ័យផលដំណាំស្រូវ ដែលជួបប្រទះការជន់លិចដំណាំស្រូវរបស់ខ្លួន​ ដោយត្រូវរាយការណ៍​អំពីការ​ផលប៉ះពាល់ និងត្រៀមខ្លួនដេីម្បីទទួលពូជស្រូវស្តារឡេីងវិញ ក្នុងករណីដំណាំស្រូវនោះបានខូចខាតទាំងស្រុង។ ជាមួយគ្នានេះ ឯកឧត្តម ឧបនាយករដ្ឋមន្រ្តី ណែនាំដល់អាជ្ញាធរ និងមន្ទីរកសិកម្មខេត្តត្រូវសម្របសម្រួលលេីដំណាំរួមផ្សំរបស់កសិករ ដេីម្បីកាត់បន្ថយការលំបាក​របស់បងប្អូនប្រជាកសិករ។

ឯកឧត្តម ឧបនាយករដ្ឋមន្រ្តី បន្ថែមថាបេីទោះបីប្រឈមដោយទឹកជំនន់ ប៉ុន្តែមន្ទីរធនធានទឹក និងឧតុនិយម​ក៏ត្រូវគិតគូរអំពីការរំដោះទឹក​ពីទំនប់ក្នុងភូមិសាស្រ្តនីមួយៗ ដេីម្បីអាចរក្សាប្រភពទឹកសម្រាប់ប្រជាកសិករអាស្រ័យទទួលបានទឹកគ្រប់គ្រាន់ប្រេីប្រាស់ក្រោយទឹកជំនន់ថមថយ។

បេីតាមរបាយការណ៍របស់ខេត្តបន្ទាយមានជ័យ មាន៧ក្រុង-ស្រុក និងប្រជាពលរដ្ឋ៨ពាន់គ្រួសារ ​បានប៉ះពាល់ដោយសារទឹកជំនន់ ​ក្នុងនោះមាន ៤៦៥គ្រួសារ​បានជម្លៀសទៅទីទួលសុវត្ថិភាព ខណ:ដំណាំស្រូវរបស់ប្រជាពលរដ្ឋក្នុងក្រុង-ស្រុកទាំង៧ បានប៉ះពាល់ជិត៣ម៉ឺនហិកតា៕

អត្ថបទ៖​ សេក ឧត្តម