ភ្នំពេញ៖ រាជរដ្ឋាភិបាលកម្ពុជា បានត្រៀម​កម្លាំង​រួច​ជា​ស្រេច​ ដើម្បី​ការពារ​សន្តិសុខ​សណ្តាប់​ធ្នាប់​ជូន​ដល់​គណៈប្រតិភូ នៃ​កិច្ចប្រជុំកំពូលអាស៊ានឆ្នាំ២០២២ និងកិច្ចប្រជុំពាក់ព័ន្ធដទៃទៀត ដែល​កម្ពុជា​ធ្វើ​ជាម្ចាស់ផ្ទះ ខណៈ កិច្ចប្រជុំដ៏ធំនេះ នឹងប្រព្រឹត្តទៅនាថ្ងៃទី១០-១៣ ខែវិច្ឆិកា ឆ្នាំ​២០២២ ខាង​មុខនេះ។

យោងតាមរបាយការណ៍ដែលបានបង្ហាញ នៅក្នុង​កិច្ច​ប្រជុំ​ត្រៀម​ការពារ​សន្តិសុខ​សណ្តាប់​ធ្នាប់​ជូន​ដល់​គណៈប្រតិភូ សម្រាប់កិច្ចប្រជុំកំពូលអាស៊ានឆ្នាំ២០២២ និងកិច្ចប្រជុំដទៃទៀត នា​ព្រឹក​ថ្ងៃ​ទី៥ ខែ តុលា ឆ្នាំ២០២២នេះ ក្រោមអធិបតីភាពសម្តេចក្រឡាហោម ស ខេង ឧប​នាយក​រដ្ឋ​មន្រ្តី រដ្ឋមន្រ្តីក្រសួង មហាផ្ទៃ បានឲ្យដឹងថា កម្ពុជាត្រៀមកម្លាំងជិតមួយម៉ឺននាក់ សម្រាប់​ការពារ​នៃ​កិច្ច​ប្រជុំ​កំពូលអាស៊ាននាពេលខាងមុខ ដោយកិច្ចប្រជុំនេះនឹងមានថ្នាក់ដឹកនាំ និង​តំណាង​ប្រទេស​មហាអំណាចមួយចំនួនចូលរួមផងដែរនោះ។

កម្ពុជាបានកំពុងធ្វើជាម្ចាស់ផ្ទះនៃកិច្ចប្រជុំកំពូលអាស៊ាន និងកិច្ចប្រជុំដទៃទៀត សម្រាប់​ឆ្នាំ​២០២២​នេះ ដោយចាប់ពីខែមករា ដល់ខែធ្នូ មានកិច្ចប្រជុំប្រមាណ៥៤កិច្ចប្រជុំ ដែលក្នុងនោះ កិច្ច​ប្រជុំធំៗមានចំនួនពីរ គឺកិច្ចប្រជុំកំពូលអាស៊ានលើកទី៤០ និងកិច្ចប្រជុំ​កំពូល​អាស៊ាន​លើក​ទី​៤១ ដែលនឹងប្រព្រឹត្តទៅនាថ្ងៃទី១០-១៣ ខែវិច្ឆិកា ឆ្នាំ២០២២នេះ ដោយ​កិច្ច​ប្រជុំ​នេះ​នឹង​ធ្វើ​ឡើង​ប្រទេស សមាជិកអាស៊ានជាមួយប្រទេសជាដៃគូពិភាក្សា។ គណៈប្រតិភូដែលនឹងចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធឆ្នាំ២០២២ ប្រមាណ​ជា​ជិត​៣០​ប្រតិភូ គឺប្រទេសជាសមាជិកអាស៊ាន៩គណៈប្រតិភូ អគ្គលេខាធិការដ្ឋានអាស៊ាន ដៃ​គូ​ពិភាក្សា​ប្រមាណ ១០គណៈប្រតិភូ និងមានគណៈប្រតិភូដៃគូអភិវឌ្ឍន៍ រួមវិស័យ​ផ្សេង​ៗ​ប្រមាណ​៨​ទៀត​។

ទាក់ទងនឹងកិច្ចប្រជុំអាស៊ាន ដែលកម្ពុជាធ្វើជាម្ចាស់ផ្ទះនេះ សម្តេចតេជោ ហ៊ុន សែន នាយករដ្ឋ​មន្រ្តី​ នៃ​ព្រះរាជាណាចក្រកម្ពុជា ក៏បានសូមការអធ្យាស្រ័យ និងសូម​អភ័យ​ទោស​ចំពោះ​បង​ប្អូន​ប្រជាពលរដ្ឋ​ផងដែរ ដោយសារតែកិច្ចប្រជុំនេះត្រូវការរៀបចំសន្តិសុខសណ្តាប់ធ្នាប់ ហើយ​មាន​ការ​រំខាន និងកក់ស្ទះ ផ្លូវដល់បងប្អូនជនរួមជាតិ ជាពិសេសនៅរាជធានីភ្នំពេញ សៀមរាប និង​ខេត្ត​ព្រះសីហនុ៕ អត្ថបទ៖ បាន ចក់