កោះកុង៖ អាជ្ញាធរឃុំប៉ាក់ខ្លង បានតម្រូវឱ្យ​ប្រជាពលរដ្ឋ​អាជីវករ​ដែល​នៅក្នុង​តំបន់​រមណីយដ្ឋាន​ចេតិយ​ឃុន​ឆាងឃុនផែនរុះរើតូចលក់ដូររបស់ខ្លួនចេញថយក្រោយ ៣ម៉ែត្រ ដើម្បី​រៀបចំ​សោភ័ណ្ឌ​ភាព និងសណ្តាប់ធ្នាប់របៀបរៀបរយ។

លោក ថូវ ប៊ុនកេ មេឃុំប៉ាក់ខ្លង បានឱ្យដឹងនៅព្រឹកថ្ងៃទី៥ ខែតុលា នេះថា ដើម្បីឱ្យ​តំបន់​ទេសចរ​ណ៍​ប្រវត្តិ​ចេតិយឃុនឆាង ឃុនផែន សន្តិសុខសណ្តាប់ធ្នាប់ និងលើកកម្ពស់​សោភ័ណ្ឌភាព​អនាម័យ​​បរិស្ថាន​ល្អទាក់ទាញអ្នកទេសចរបន្ថែមពេលមានពិធីបុណ្យទានតូចធំ។

បើតាមលោក​មេ​ឃុំប៉ាក់ខ្លង ដូច្នេះរដ្ឋបាលឃុំរបស់លោក បានទុកពេល១០ថ្ងៃគិតចាប់ពីថ្ងៃទី៥ ខែតុលាដល់ថ្ងៃទី១៥ ខែតុលា ឆ្នាំ២០២២ជាកំហិត សម្រាប់ចូលរួមរុះ​រើ​តូប​របស់​អាជីករ​ចំនួន​៦​តូប។ ទិសដៅកែលម្អរបស់រដ្ឋបាលស្រុកមណ្ឌលសីមា គ្រោង​ពង្រីក​ផ្លូវ​ចូល​រមណីយ​ដ្ឋាន​ចេតិយ​ឃុន​ឆាង ឃុនផែនឱ្យធំទូលាយជាងពេលនេះ ចំណតរថយន្ត បង្គាន់អនាម័យ និងការ​ទុកដាក់​សំរា​ម​ជា​ដើម។

ករណីប្រជាពលរដ្ឋអាជីវករមិនអនុវត្តតាមការជូនដំណឹងនោះទេ រដ្ឋបាលឃុំនឹង​ចាត់​វិធានការ​តាម​ច្បាប់ និងមិនទទួលខុសត្រូវរាល់ការខូចខាតទ្រព្យសម្បត្តិ ឬការបាត់បង់​ផល​ប្រយោជន៍​ណាមួយ​នោះ​ឡើយ​។ អាជ្ញាធរជឿជាក់លើស្មារតីចូលរួមសហការអនុវត្តពីអាជ្ញាធរមូលដ្ឋានគ្រប់លំដាប់ថ្នាក់ និង​សូម​ម្ចាស់​តូប​ទាំងអស់ អនុវត្តប្រកបដោយប្រសិទ្ធិភាព និងការទទួលខុសត្រូវខ្ពស់។

គួររម្លឹកថា កន្លងទៅ រដ្ឋបាលខេត្តកោះកុង និងមន្ទីរជំនាញពាក់ព័ន្ធ បាន​បង្ហាញ​ពី​គម្រោង​ផែន​ការ​ជា​ច្រើន​ សម្រាប់អភិវឌ្ឍន៍ហេដ្ឋានរចនាសម្ព័ន្ធ និងលើក​កម្ពស់​វិស័យ​ទេសចរណ៍​នៅ​តំបន់​រមណីយដ្ឋាន​ចេតិយឃុនឆាង ឃុនផែន ប៉ុន្តែដំណឹង​នេះ​បែរ​ស្ងប់​ស្ងាត់​ទៅ​វិញ​មិន​ឃើញ​មាន​សកម្ម​ភាព​គម្រោងអភិវឌ្ឍន៍អ្វីមួយកើតមាននោះទេ គ្រាន់តែអាជ្ញាធរខេត្ត និងមន្ទីរជំនាញ​ចុះ​ពិនិត្យ​សិក្សា​វាយ​តម្លៃ​តែ​ប៉ុណ្ណោះ៕ អត្ថបទ៖ ឈឹម មករា