​បាល់ទាត់៖ ​ក្រុម​បិសាច​ក្រហម Manchester United បាន​បោះ​មួយ​ជំ​ហ៊ាន​ទៀត​ ក្នុង​ដំណើរ​ឡើង​វគ្គ​ពាក់កណ្ដាល​ផ្ដាច់ព្រ័ត្រ​ក្រប​ខណ្ឌ UEFA Europa League ក្រោយ​ជ័យជំនះ ២-០ នៅ​ទឹកដី Grenada ជើង​ទី១ វគ្គ ៨ក្រុម​ចុងក្រោយ​។

​​ខ្សែប្រយុទ្ធ​អង់គ្លេស Marcus Rashford រក​បាន​គ្រាប់​នាំមុខ​នៅ​នាទី​ទី៣១ និង​បាល់ ១១​ម៉ែត្រ​របស់ Bruno Fernandes នាទី​ទី៩០ គ្រប់គ្រាន់​ល្មម​សំរាប់​ក្រុម​របស់​លោក Ole Gunnar Solskjaer កាន់​ពីរ​គ្រាប់​ចំណេញ​ក្រៅ​ដី​ មុនត្រលប់​ទៅ​ទឹកដី Old Trafford វិញ​សប្ដាហ៍​ក្រោយ​។ ​​ប្រសិន Manchester United អាច​ឆ្លង​ផុត​វគ្គ​នេះ ពួកគេ​នឹង​ឡើង​ទៅ​វគ្គ​ពាក់កណ្ដាល​ផ្ដាច់ព្រ័ត្រ​ជួប​ជាមួយ Ajax Amsterdam រឺ AS Roma ខណៈ Roma យប់មិញ​បាន​យកឈ្នះ​នៅ​ទឹកដី​ហូ​ឡង់ ២-១​។ ក្រុម​បិសាច​ក្រហម Manchester United មកដល់ពេលនេះ​ចាញ់​តែ ១ប្រកួត​គត់​ក្នុង ១៧ប្រកួត​ចុងក្រោយ​គ្រប់​ក្រប​ខណ្ឌ តែ​ពួកគេ​នឹង​អវត្តមាន​កីឡាករ​ជាច្រើន​នៅ​ជើង​ទី២ ដែល​រួមមាន Scott McTominay, Luke Shaw និង Harry Maguire ដែល​ត្រូវ​ជាប់​ពិន័យ ​បន្ទាប់ពី​ទទួល​បាន​កាត​លឿង​ម្នាក់​មួយ​យប់មិញ​។

​​ងាក​មក​ក្រុម​អង់គ្លេស​មួយទៀត កាំភ្លើង​ធំ Arsenal បើកទ្វារ​ផ្ទះ​ស្វាគមន៍​ក្រុម​ភ្ញៀវ​មកពី​សា​ធា​រណរដ្ឋ​ឆេ​ក Slavia Prague​។ ​​ទំរាំ​តែ​រក​គ្រាប់​បាល់​បាន​នៅ​ទឹកដី Emirate, Arsenal ត្រូវ​រង់ចាំ​ដល់​នាទី​ទី៨៦ ទើប​កីឡាករ​បម្រុង Nicolas Pepe ស៊ុត​បញ្ចូល​ទី​បាន​សំរេច​។ ​​វា​គួរតែ​ជា​គ្រាប់​បាល់​ជ័យជំនះ​សំរាប់ Arsenal ទៅ​ហើយ​តែ​នៅ​នាទី​ទី៩០+៣ ក្រុម​ភ្ញៀវ Slavia Prague រក​គ្រាប់តាម​ស្មើ​បាន​សំរេច និង​ជា​គ្រាប់​បាល់​ក្រៅ​ដី​ដ៏​មាន​សារសំខាន់ ​ដោយ​ការ​តែ​ត​បញ្ចូល​ទី​របស់ Tomas Holes​។ ​​ទោះបី​របូត​គ្រាប់​បាល់​ចុង​ម៉ោង​បែបនេះ អ្នកចាត់ការ Arsenal លោក Mikel Arteta នៅតែ​មាន​ជំនឿ​ថា​ ក្រុម​របស់​លោក​អាច​យកឈ្នះ​នៅ​ទឹកដី​ឆេ​ក​សប្ដាហ៍​ក្រោយ ​ឡើង​វគ្គ​ពាក់កណ្ដាល​ផ្ដាច់ព្រ័ត្រ​បាន​។ ​Arsenal តែង​តែ​មាន​ប្រវត្តិ​ល្អ​ នៅ​ពេល​ជួប​គូប្រកួត​មកពី​សាធារណ​រដ្ឋ​ឆេ​ក​នៅ​ក្រប​ខណ្ឌ​អឺរ៉ុប ​ពោល​គឺ​ជំនួប​សរុប ៩លើក​ឈ្នះ៧ ស្មើ២ មិនដែល​ចាញ់​៕

អត្ថបទ​៖​នាង សុភា​វុ​ធ