កំពង់ឆ្នាំង៖ អភិបាលក្រុងកំពង់ឆ្នាំងលោក ហ៊ីង ភ័ព្វមីនា ដែលទើបឡើងកាន់តំណែងថ្មីៗ បានចុះពិនិត្យមើលសណ្តាប់ធ្នាប់របៀបរៀបរយ និងបរិស្ថាននៅតាមមាត់ទន្លេផ្សារក្រោម ចាប់ពីមុខវត្តលោកយាយទេព រហូតដល់មុខចុងកោះ សង្កាត់ផ្សារឆ្នាំង ក្រុងកំពង់ឆ្នាំង ដើម្បីរៀបចំអោយប្រសើរឡើងវិញនូវទីតាំងទាំងនោះ។
ក្នុងពេលចុះពិនិត្យនោះ លោក ហ៊ីង ភ័ព្វមីនា បានជួបជាមួយអាជីវករមួយចំនួន និងបានអោយអាជីវករទាំងនោះចូលរួមសហការជាមួយអាជ្ញាធរក្រុងកំពង់ឆ្នាំង ក្នុងការរៀបចំសណ្តាប់ធ្នាប់ ក៏ដូចជាការសម្អាតបរិស្ថាននៅតាមមាត់ទន្លេផ្សារក្រោម។ លោកបានបន្ថែមថា កុំអោយលក់ដូរយកចិញ្ចើមផ្លូវសាធារណរបស់រដ្ឋ មកដាក់របស់របរលក់ដូរ នាំអោយបាត់បង់សណ្តាប់ធ្នាប់តាមផ្លូវ និងកុំបោះសំរាមចូលក្នុងទឹកទន្លេ នាំអោយបរិស្ថានមិនល្អ បាត់បង់សោភ័ណភាព និងខូចដល់ប្រព័ន្ធអេកូឡូស៊ីបាតទន្លេទៀតផង។
សូមជម្រាបជូនថា លោក ហ៊ីង ភ័ព្វមីនា បានចុះពិនិត្យនូវទីតាំងខាងលើនេះ បន្ទាប់ពីទទួលព័ត៌មានថា អាជីវករមួយចំនួនធំបានយកចំណីផ្លូវរបស់រដ្ឋមកលក់ដូរ និងបានបោះចោលសំរាមយ៉ាងអនាធិបតេយ្យចូលទៅក្នុងទឹកទន្លេ ដោយមិនមានការទទួលខុសត្រូវនោះឡើយ។ នៅចំណុចច្រាំងទន្លេផ្សារក្រោម ស្ថិតក្នុងសង្កាត់ផ្សារឆ្នាំង ក្រុងកំពង់ឆ្នាំង មានការបោះចោលសំរាមទៅក្នុងទឹកទន្លេ រាប់តោន ដោយពុំមានអ្នកណាម្នាក់ទទួលខុសត្រូវនោះឡើយ។
លោកអភិបាលក្រុងបានអោយដឹងទៀតថា លោកនឹងសម្អាតបរិស្ថាននៅច្រាំងទន្លេផ្សារក្រោមនេះអោយស្អាត រួមនឹងការរៀបចំសណ្តាប់ធ្នាប់តាមដងផ្លូវឡើងវិញ ដោយមិនទុកអោយរាយប៉ាយឥតសណ្តាប់ធ្នាប់បែបនេះនោះឡើយ។ ដោយឡែកសម្រាមក្នុងទឹកទន្លេ លោកនឹងអោយប្រធានផ្សារក្រោមចាត់ចែងស្រង់ចេញពីទឹកទន្លេអោយអស់ និងចាំមើលថាតើអ្នកណាម្នាក់ដែលបោះសម្រាមនៅទីនោះ នឹងអនុវត្តតាមនីតិវីធីតែម្តង៕ អត្ថបទ៖ ហុង វាស្នា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
