ភ្នំពេញ៖ ទិវាគ្រូបង្រៀនក្នុងឆ្នាំ ២០២២នេះ ប្រារព្ធធ្វើឡើងនៅថ្ងៃទី ៥តុលា ក្រោមអធិបតីភាព ឯកឧត្តម ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា ក្រោមប្រធានបទ "គ្រូបង្រៀនយើង អនាគតយើង ប្រទេសជាតិយើង"។

ក្នុងឱកាសទិវាគ្រូបង្រៀននាឆ្នាំនេះ ឯកឧត្តម បណ្ឌិតសភាចារ្យ ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា ​បានលើកឡើងថា ​ការវិនិយោគក្នុងវិស័យអប់រំ ​ជាការវិនិយោគអនាគត ជាការ​វិនិយោគ​លើការអភិវឌ្ឍសេដ្ឋកិច្ចសង្គម ​និងជាការវិនិយោគលើសន្តិសុខរបស់សង្គមជាតិ។

ក្នុងនាមក្រសួងអប់រំ ឯកឧត្តម សូមដឹងគុណចំពោះកិច្ចប្រឹងប្រែងគ្រូបង្រៀន ​គ្រប់រូបគ្រប់ជំនាន់ ដែល​បានបង្ហាត់បង្រៀនកូនខ្មែរអោយទទួលបានចំណេះដឹង​ ចំណេះធ្វើ​ ក្លាយជាពលរដ្ឋល្អ ក្លាយ​ជាធ​នធានមនុស្ស ​ដើម្បីអភិវឌ្ឍន៍​សង្គមជាតិដល់សព្វថ្ងៃ។

ឯកឧត្តមរដ្ឋមន្រ្តី បន្តថា គ្រូបង្រៀនមានគុណបំណាច់ជាខ្លាំងគ្រប់កាលទេស: ជាពិសេស​ក្នុង​គ្រាវិបត្តិកូវីដ-១៩។ ក្នុងវិបត្តិកូវីដ-១៩ គ្រូបង្រៀនដើរតួនាទី កាន់តែសំខាន់ក្នុងការផ្ដល់សេវាអប់រំ​អោយមាននិរន្តរភាព ​ ដោយគ្រូបង្រៀនបានស្វះស្វែងរៀនជំនាញថ្មីៗ ដូចជាវិធីសាស្រ្តបង្រៀន​តាមអនឡាញ និងបំនិនបច្ចេកវិទ្យាជាដើម។

លើសពីនេះ​នៅតាមទីជនបទ គឺគ្រូបង្រៀនចុះផ្ទាល់ដល់ខ្នងផ្ទះ ដើម្បីបង្រៀនសិស្សជាបណ្ដុំតូចៗ ដើម្បី​ធានាថាសិស្សទាំងនោះទទួលបានការសិក្សា។ ​ជារួមឯកឧត្តម អះអាងថា គ្រូបង្រៀន​មាន​តួនាទី យ៉ាងសំខាន់សម្រាប់ការអភិវឌ្ឍជាតិដែល​ទាមទារ​អោយមានការ​កំណែទម្រង់គ្រូ​បង្រៀន​អោយកាន់តែប្រសើរ។

ក្នុងនាមក្រសួងអប់រំ យុវជន និងកីឡា ឯកឧត្តមរដ្ឋមន្រ្តី ​ក៏បានថ្លែងអំណរគុណដល់រាជរដ្ឋាភិបាល​កម្ពុជា ដែលបានផ្ដល់ការចាក់វ៉ាក់សាំង ជូនគ្រូបង្រៀន ​ជូនសិស្សានុសិស្ស​ និងពលរដ្ឋគ្រប់រូប ដែល​ឈានទៅការគ្រប់គ្រងស្ថានការណ៍បានប្រសើរ និងឈានទៅការបើកដំណើរការសាលារៀន​ឡើងវិញ។

ជាការតបស្នង ឯកឧត្តម ក៏បានលើកឡើងដែរថា រាជរដ្ឋាភិបាលកម្ពុជា បានយកចិត្តទុកដាក់​លើ​គ្រូបង្រៀននិងបុគ្គលិកអប់រំ ​ក៏នឹងធ្វើការ​ដំឡើង​ប្រាក់​បៀវត្ស​ជូន​គ្រូបង្រៀនក្នុងឆ្នាំ​ ២០២៣ ខាង​មុខនេះ ក្រោយខកខានការដំឡើង​ដោយសារវិបត្តិកូវីដ-១៩​ កន្លងទៅផងដែរ៕

អត្ថបទ៖ គឹមហុក