កណ្ដាល៖ ជារៀងរាល់ឆ្នាំរាជរដ្ឋាភិបាលកម្ពុជា តែងតែប្រារព្ធទិវាគ្រូបង្រៀន ៥តុលា ហើយ​តាមរយៈទិវានេះដែរ ​បណ្តាគ្រូបង្រៀន និងបណ្តាអាណាព្យាបាលសិស្ស ថ្លែងពីសារៈសំខាន់របស់​គ្រូបង្រៀន នៅក្នុងដំណើរការអប់រំ និងផ្តល់ចំណេះដឹងឆ្ពោះទៅរកការរីកចម្រើនរបស់ប្រទេសជាតិ ហើយទាក់ទងនឹងបញ្ហានេះ​ គ្រូបង្រៀន និងអាណាព្យាបាលសិស្សបានប្តេជ្ញាចិត្តខិតខំបង្រៀន និងណែនាំសិស្សនិងកូនៗ ឲ្យក្លាយជាធនធានមានតម្លៃសម្រាប់ប្រទេសជាតិ។

បើតាមលោកគ្រូ អ្នកគ្រូ និងអាណាព្យាបាល បានថ្លែងនៅវិទ្យាល័យ ហ៊ុន សែន សេរីភាព ក្រុងតាខ្មៅ ​ខេត្តកណ្តាល នៅថ្ងៃទី៥ ខែតុលា ឆ្នាំ២០២២នេះថា យើងទាំងអស់គ្នាពិតជាថ្លែង​អំណរ​គុណរាជរដ្ឋាភិបាល រៀងរាល់ឆ្នាំ ​តែងតែ​ប្រារព្ធ​ទិវាគ្រូបង្រៀន៥ ​តុលានេះឡើង ដើម្បីរំលឹក​ដឹង​គុណគ្រូផង និងលើកទឹកចិត្តគ្រូបង្រៀន ដែលបានខិតខំ​អំណត់​អត់ធន់​ព្យាយាម​ផ្តល់​ការ​បង្ហាត់​បង្រៀន​ផ្ទេរចំណេះដឹងនានា​ឲ្យសិស្សានុសិស្ស ​ក្លាយជាកូនល្អ មិត្តល្អ សិស្សល្អ ​មានធនធានមនុស្ស និងជាកម្លាំងចលករសម្រាប់អភិវឌ្ឍន៍ប្រទេសទៅអនាគត។

បើតាមបណ្តាសិស្សានុសសិស្ស ក៏បានលើកឡើងដែរថា គ្រូបង្រៀន ​គឺអាណាព្យាបាលទី២ ដែល​បាន​ផ្តល់ការ​បណ្តុះបណ្តាល​ និងបង្ហាត់បង្រៀន​ កូន ​និងសិស្សានុសិស្សទាំងអស់គ្នា ច្រើនជាង​អាណាព្យាបាលនៅផ្ទះ ​ហើយតាមរយៈទិវាគ្រូបង្រៀន៥តុលានេះដែរ និងដោយមានការ​អនុញ្ញាត​ពី​គណៈគ្រប់គ្រងសាលា ​សិស្សានុសិស្សបានរួមគ្នាធ្វើពិធីដឹងគុណលោកគ្រូអ្នកគ្រូ ដែលបានខិតខំ​បង្ហាត់​បង្រៀនទោះក្នុងគ្រាលំបាកណាក៏ដោយ គឺលោកបានបង្រៀនផ្តល់ចំណេះដឹងមាន​តម្លៃជូន​ដល់ខ្លួនគេផង ​និងសម្រាប់អនាគតប្រទេសជាតិផង។

សូមបញ្ជាក់ថា ​ទិវាគ្រូបង្រៀន៥តុលាខួបលើកទី២៥ ឆ្នាំ២០២២នេះ​ បាន​ប្រារព្ធ​ក្រោម​ប្រធានបទ «គ្រូបង្រៀនយើង​ អនាគតយើង ​ប្រទេសជាតិយើង »៕ អត្ថបទ ស៊ុម សុខជា