បាត់ដំបង៖ ទឹកស្ទឹងសង្កែបានហក់ឡើងខ្ពស់បណ្ដាលឱ្យច្រាលលិចផ្នែកខ្លះនៃក្រុងបាត់ដំបង នៅព្រឹកថ្ងៃទី៥ ខែតុលានេះ (លិចផ្លូវមួយចំនួន​ក្នុងក្រុង​ និងក្នុងផ្សារបឹងឈូក) ​តែមន្ត្រីជំនាញ បានបញ្ជាក់ថា ការជន់លិចនេះ មិនធ្ងន់ធ្ងរនោះទេ ព្រោះទឹកនឹងឆាប់ស្រកទៅវិញក្នុង​រយៈពេល​មិនយូរ ។

ពាក់ព័ន្ធស្ថានភាពជំនន់ទឹកភ្លៀងនេះលោក ឡុង ផលគុណ ប្រធានមន្ទីរធនធានទឹក និងឧតុនិយម ខេត្តបាត់ដំបង បានបញ្ជាក់ថា ការជន់លិចនេះ នឹងមិនបង្កបញ្ហាធ្ងន់ធ្ងរនោះទេ ព្រោះទឹកនឹង​ស្រកទៅ វិញក្នុងពេលឆាប់ៗនេះ ។ គិតត្រឹមព្រឹកថ្ងៃទី៥ខែតុលានេះ ស្ថានភាពទឹកស្ទឹងសង្កែ ក្រុងបាត់ដំបង ឡើងដល់កម្ពស់ ១៣.៦០ម៉ែត្រ។

អាជ្ញាធរក្រុងបាត់ដំបង បានអំពាវនាវឱ្យប្រជាពលរដ្ឋដែលរស់នៅតាមបណ្ដោយដងស្ទឹងសង្កែ បង្កើនការប្រុងប្រយ័ត្នឱ្យបានខ្ពស់ ​ជាពិសេសជនចាស់ជរា ជនពិកា កុមារតូចៗ ជាដើម។

សូមរំលឹកថា​ ជារៀងរាល់ឆ្នាំ ​នៅពេលដែលទឹកស្ទឹងសង្កែហក់ឡើងដល់កម្ពស់ចាប់ពីជាង១៣ម៉ែត្រ​ឡើងទៅ​ នៅ​តំបន់មួយចំនួនប៉ែកខាងក្រោម​តាមបណ្ដោយដងស្ទឹងសង្កែ ​ដូចជាផ្នែកខ្លះ នៃ​សង្កាត់ក្តុល ដូនទាវ ក្រុង​បាត់ដំបង​ រហូត​ដល់​ស្រុក​ឯកភ្នំ ​នឹង​ប្រឈមការលិចលង់ផ្ទះសម្បែង​ និងផ្លូវមួយចំនួន៕អត្ថបទ៖ នឿត សុភក្ត្រ