សៀមរាប៖ គណៈកម្មាធិការជាតិគ្រប់គ្រងគ្រោះមហន្តរាយ បានត្រៀមពូជស្រូវ និងគ្រាប់​បន្លែ​ច្រើនប្រភេទ ដើម្បីចែកជូនកសិករសម្រាប់ដាំដុះឡើងវិញក្រោយពីទឹកជំនន់។ មន្ត្រីជំនាញ បានឱ្យដឹងថា ដំឡូងមីរាប់ពាន់ ហិកតា នឹងអាចខូចខាតដោយសារទឹកជំនន់ នៅក្នុងខេត្តសៀមរាប។

អ្នកជំនាញកសិកម្មនៅខេត្ដសៀមរាប បានឱ្យដឹងថា រហូតមកដល់ពេលនេះ ​ដោយសារតែបន្ត មាន​ភ្លៀងធ្លាក់ខ្លាំងហូរចុះពីតំបន់ជួរភ្នំដងរែក ​ធ្វើឱ្យទឹកនៅតែហក់ឡើងខ្ពស់នៅឡើយ នៅក្នុង​ស្រុកស្រីស្នំ របស់ខេត្តសៀមរាប ​ដែលជាប់ព្រំប្រទល់គ្នានឹងស្រុកចុងកាល់ ខេត្តឧត្តរមានជ័យ។ ជំនន់ដែលកំពុងជន់លិចជាច្រើនថ្ងៃមកហើយនោះ ​អាចនឹងធ្វើឱ្យដំឡូងមីជាច្រើនពាន់ហិកតា នៅស្រុកវ៉ារិន និងស្រុកស្រីស្នំ អាចខូចខាត​ ខណៈដែលស្រុកចំនួន៧ផ្សេងទៀត ដែលទឹកកំពុង​ជន់លិចដំណាំស្រូវដែរនោះ អាចមិនទាន់ ​ខូចខាតនៅឡើយទេ។

លោក ទា គឹមសុទ្ធ ប្រធានមន្ទីរកសិកម្មរុក្ខាប្រមាញ់ និងនេសាទខេត្តសៀមរាប បានឱ្យដឹងថា ដោយសារ​តែខេត្តសៀមរាប ​កំពុងរងគ្រោះដោយទឹកជំនន់នេះ គឺ​គណៈកម្មាធិការជាតិ​គ្រប់គ្រង​គ្រោះមហន្តរាយ បានត្រៀមទុកពូជស្រូវ ​គ្រាប់បន្លែជាច្រើនប្រភេទ​ រួមទាំងថ្នាំសម្លាប់សត្វកណ្ដុរផង ដើម្បីចែក​ជូនដល់កសិករ ​ឱ្យបង្កបង្កើនផលឡើងវិញ ​បន្ទាប់ពីទឹកជំនន់បានស្រកអស់។ បន្ថែមលើនេះ​ មន្ទីរកសិកម្ម ក៏បានត្រៀមវ៉ាក់សាំង ​និងថ្នាំបង្ការ ​ដើម្បីចុះចាក់ និងព្យាបាលសត្វ ជូនកសិករផងដែរ។

របាយការណ៍របស់គណៈកម្មាធិការគ្រប់គ្រងគ្រោះមហន្តរាយ ​នៃរដ្ឋបាលខេត្តសៀមរាប បាន​បង្ហាញថា ​តាំងតែពីថ្ងៃទី១៧ ​ខែកញ្ញា រហូតដល់ពេលនេះ ​ជំនន់ទឹកភ្លៀងក្នុងខេត្តសៀមរាប បណ្តាលឱ្យមានផលប៉ះពាល់ដល់ប្រជាពលរដ្ឋចំនួនជាង ២៥០០០គ្រួសារ ​ភូមិចំនួន៣២៥ ឃុំចំនួន៦៣ នៃស្រុកចំនួន៩ រួមមាន៖ ស្រុកស្រីស្នំ ក្រឡាញ់ ជីក្រែង អង្គរជុំ វ៉ារិន ពួក សូទ្រនិគម ប្រាសាទបាគង និងស្រុកអង្គរ ធំ។

គ្រោះធម្មជាតិនេះធ្វើឱ្យប៉ះពាល់ស្រូវពង្រោះ ចំនួនជាង ៣២០០០ហិកតា ដំឡូងមី ជាង៤០០០ហិក តា និង​ហេដ្ឋា​រចនា​សម្ព័ន្ធជាច្រើនផ្នែក ដូចជា ​លិច​បរិវេណ​ផ្ទះ​កម្រិតស្រាល​ ចំនួនជាង ៦៨០០ខ្នង និងធ្ងន់ ​ចំនួន២៩ខ្នង លិចផ្លូវ ​ប្រវែងជាង១៦៣ពាន់ម៉ែត្រ​ និងខូចខាតប្រវែងជាង៥ពាន់ម៉ែត្រ លិចខ្នងទំនប់​ ខ្នងប្រឡាយ​ ប្រវែងជាង២១ពាន់ម៉ែត្រ ​និងខូចខាតប្រវែង៩៥ម៉ែត្រ។ លិចស្ពាន៣កន្លែង និងខូចខាត​ ប្រវែង១៦ម៉ែត្រ។ ​ទឹកជំនន់ បានសម្លាប់សត្វគោ១ក្បាល និង​បណ្ដាលឱ្យសត្វមាន់​ និងទាងាប់ ​ចំនួន ៦៧៦ក្បាល៕អត្ថបទ៖ ​ឈិត សាវី