ភ្នំពេញ៖ ឯកឧត្ដមនាយករដ្ឋមន្ត្រី នៃសាធារណរដ្ឋគុយបា ទទួលបាននូវមហាកិត្តិយសដ៏ខ្ពង់ខ្ពស់ ដោយបានព្រះករុណាជាអង្គម្ចាស់ជីវិតលើត្បូង ព្រះបាទសម្តេចព្រះបរមនាថ ព្រះមហាក្សត្រនៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឬទ័យ ប្រោសព្រះរាជទាន នូវព្រះរាជសវនាការដ៏វិសេសវិសាល ជូនឯកឧត្តមនៅក្នុងព្រះទីនាំងទេវាវិនិច្ឆ័យ ព្រះបរមរាជវាំង នាថ្ងៃទី៥ ខែតុលា ឆ្នាំ២០២២។
ក្នុងព្រះរាជសវនាការដ៏ឧត្តុង្គឧត្ដមនេះ ឯកឧត្តមនាយករដ្ឋមន្ត្រីគុយបា បាននាំមកនូវដង្វាយវត្ថុអនុស្សា វរីយ៍ដ៏មានតម្លៃខ្ពង់ខ្ពស់ មានជាអាវប្រពៃណីដ៏ស្រស់ស្អាតរបស់សាធារណរដ្ឋគុយបា និងឡានធ្វើអំពីដែកអាលុយមីញ៉ូមយ៉ាងប្រណិត ថ្វាយព្រះករុណាជាអង្គម្ចាស់ជីវិតលើត្បូង ជាទីសក្ការៈដ៏ខ្ពង់ខ្ពស់បំផុត ។ ព្រះករុណាជាអម្ចាស់ជីវិតលើត្បូង ព្រះមហាក្សត្រនៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឬទ័យថ្លែងអំណរគុណចំពោះ ឯកឧត្តម ម៉ានូអែល ម៉ារ៉េរ៉ូ គ្រុស ដែលបានថ្វាយដង្វាយជាវត្ថុអនុស្សាវរិយ៍ដ៏មានតម្លៃក្នុងឱកាសដ៏ថ្លៃថ្លានេះ។
ជាមួយគ្នានេះ ព្រះអង្គបានសព្វព្រះរាជហឬទ័យប្រោសព្រះរាជទានវត្ថុអនុស្សាវរីយ៍ដ៏មានតម្លៃខ្ពង់ខ្ពស់ ជូនឯកឧត្តមនាយករដ្ឋមន្ត្រីគុយបា ទទួលបានផ្តិលធ្វើអំពីប្រាក់សុទ្ធលំអដោយក្បូរក្បាច់ចម្លាក់តាមរច នាបទចម្លាក់ប្រពៃណីខ្មែរដែលបង្ហាញអំពីភាពរុងរឿងនៃវិស័យវប្បធម៌ សិល្បះ ប្រពៃណីទំនៀមទំលា ប់របស់ប្រជាជាតិខ្មែរ និងតំណាងឱ្យសិរីសួស្ដី សុភមង្គល និងភាពត្រជាក់ត្រជុំ។ ការថ្វាយ និងប្រោសព្រះរាជទានវត្ថុអនុស្សាវរីយ៍ទៅវិញទៅមកក្នុងព្រះរាជពិធីប្រកបដោយអត្ថន័យដ៏ខ្ពង់ខ្ពស់នេះជានិមិត្ត រូបនៃសាមគ្គីភាពដ៏រឹងមាំសម្រាប់ប្រជាជននៃប្រទេសយើងទាំងពីរ។
មានព្រះរាជឱង្ការសំណេះសំណាលក្នុងឱកាសដ៏ប្រសើរនោះ ព្រះករុណាជាអម្ចាស់ជីវិតលើត្បូង ជាទីសក្ការះដ៏ខ្ពង់ខ្ពស់បំផុត ព្រះអងុ្គបានសម្ដែងនូវព្រះរាជហឬទ័យបិតិសោមនស្សរីករាយក្រៃលែង ដោយព្រះអង្គព្រមទាំងថ្នាក់ដឹកនាំ និងប្រជាជាតិកម្ពុជាមានកិត្តិយសបានទទួលស្វាគមន៍យ៉ាងកក់ក្ដៅចំពោះវត្តមានដ៏ខ្ពង់ខ្ពស់នៃឯកឧត្តមនាយករដ្ឋមន្ត្រីគុយបា ជាមិត្តដ៏ប្រសើររបស់កម្ពុជា បានអញ្ជើញមកបំពេ ញដំណើរទស្សនកិច្ចជាផ្លូវការនៅកម្ពុជា ដើម្បីពង្រឹង និងពង្រីកកិច្ចសហប្រតិបត្តិការគ្រប់វិស័យរវាងប្រទេសទាំងពីរ។ ព្រះករុណាជាអម្ចាស់ជីវិតលើត្បូងសព្វព្រះរាជហឬទ័យនាំមកនូវព្រះរាជបណ្ដាំសា កសួរសុខទុក្ខ ព្រះរាជហឬទ័យនឹករលឹកដ៏ជ្រាលជ្រៅ ពីសម្ដេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត ជូនឯកឧត្តម នាយករដ្ឋមន្ត្រីគុយបា ព្រមទាំងគណៈប្រតិភូជាន់ខ្ពស់គ្រប់រូប។
ព្រះករុណាជាអម្ចាស់ជីវិតលើត្បូង មានព្រះរាជហឬទ័យរំភើបរីករាយ ចំពោះការរីកចម្រើននៃទំនាក់ទំនងមិត្តភាពរវាង កម្ពុជា-គុយបា ដែលបានបង្កើតឡើងតាំងពីឆ្នាំ១៩៦០ ក្រោមរជ្ជកាលព្រះករុណា ព្រះវររាជបិតាជាតិខ្មែរ ព្រះបរមរតនកោដ្ឋ ជាទីសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហទ័យប្រោសព្រះរាជទាននូវការបង្កើតកិច្ចសហប្រតិបត្តិការលើគ្រប់វិស័យ ដើម្បីនាំមកនូវផលប្រយោជន៍រួមសម្រាប់ប្រជាជាតិនៃប្រទេសយើងទាំងពីរ។
ព្រះករុណាជាអង្គម្ចាស់ជីវិតលើត្បូង សព្វព្រះរាជហឬទ័យថ្លែងអំណរគុណ និងចូលរួមអបអរស្វាគមន៍ ចំពោះដំណើរបំពេញទស្សនកិចុ្ចផ្លូវការដ៏ឧត្ដុង្គឧត្ដមរបស់ឯកឧត្ដមនាយករដ្ឋមន្ត្រីគុយបា នៅកម្ពុជានាពេលនេះ ជាទស្សនកិច្ចមួយដ៏មានសារៈសំខាន់បាននាំមកនូវគុណប្រយោជន៍យ៉ាងធំធេង ក្នុងការបន្តជំរុញឱ្យ ចំណងសាមគ្គីភាព និងកិច្ចសហប្រតិបត្តិការ ទ្វេភាគីលើគ្រប់វិស័យ រវាងប្រជាជាតិនៃប្រទេសយើងទាំងពីរ កាន់តែទទួលបាននៅភាពរីកចំរើនថ្កុំថ្កើង និងជិតស្និទ្ធថែមទៀត។
ឯកឧត្តមនាយករដ្ឋមន្ត្រីគុយបា បានថ្លែងអំណរព្រះរាជគុណដ៏ជ្រាលជ្រៅថ្វាយព្រះករុណាជាអម្ចាស់ ជីវិតលើត្បូង ជាទីសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឬទ័យប្រោសព្រះរាជទានឯកឧត្តម និងគណៈប្រតិភូ បានអញ្ជើញចូលក្រាបថ្វាយបង្គំគាល់ ថ្វាយព្រះពរក្នុងឱកាសដ៏ថ្លៃថ្លានេះ។
ឯកឧត្តម បានសម្តែងនូវសេចក្តីសប្បាយរីករាយដោយមានឱកាសបានអញ្ជើញមកបំពេញដំណើរទស្សនកិច្ចផ្លូវការនៅកម្ពុជា ហើយដំណើរទស្សនកិច្ចនេះ ឯកឧត្តមបានពិនិត្យឃើញ ស្ថានភាពនៃការរីកចម្រើននៅកម្ពុជា កាន់តែមានភាពល្អប្រសើរ។ ឯកឧត្តមសូមចូលរួមអបអរសាទរយ៉ាងក្លៀវក្លាចំពោះជោគជ័យ និងស្នាដៃដ៏ធំធេងដែលរាជរដ្ឋាភិបាល និងប្រជាជាតិកម្ពុជាខិតខំសម្រេចបានក្រោមព្រះរាជកិច្ចដឹកនាំដ៏ភ្លឺស្វាង និងការគង់ប្រថាប់នូវជាម្លប់ដ៏ត្រជាក់នៃអង្គព្រះមហាក្សត្រ សង្គមជាតិរក្សាបាននូវសេចក្តីសុខសន្តិភាព សុភមង្គល មានការឯកភាពជាតិដ៏រឹងមាំ និងមានការអភិវឌ្ឍន៍លើគ្រប់វិស័យជាបន្តបន្ទាប់ ធ្វើអោយកម្ពុជាកាន់តែទទួលបានកិត្តិយ សដ៏ខ្ពង់ខ្ពស់ថែមទៀតលើឆាកអន្តរជាតិ។
ឯកឧត្តមបានទូលថ្វាយអំពីសភាពការណ៍រីកចំរើននៅក្នុងប្រទេសគុយបា និងបានទូលថ្វាយអំពីពិធីចុះហត្ថលេខាលើឯកសារសំខាន់ៗចំនួនពីរ ក្នុងនោះរួមមាន កិច្ចព្រមព្រៀងនៃកិច្ចសហប្រតិបតិ្តការក្នុងវិស័យអប់រំកាយ វប្បធម៌ និងកីឡា រវាងក្រសួងអប់រំ យុវជន និងកីឡានៃព្រះរាជាណាចក្រកម្ពុជា និងវិទ្យាស្ថានជាតិ កីឡា អប់រំ កាយ និងកម្សាន្ដនៃសាធារណរដ្ឋគុយបា និងកម្មវិធីសហប្រតិបត្តិការ និងផ្លាស់ប្ដូរវប្បធម៌រវាងក្រសួងវប្បធម៌ និងវិចិត្រសិល្បៈកម្ពុជា និងក្រសួងវប្បធម៌នៃសាធារណរដ្ឋគុយបា សម្រាប់ឆ្នាំ២០២២ ដល់ ២០២៧។ ឯកឧត្តមបានថ្លែងអំណរព្រះរាជគុណដ៏ជ្រាលជ្រៅ ថ្វាយព្រះករុណា ព្រះមហាវីរក្សត្រ ព្រះវររាជបិតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត ព្រះអង្គមានព្រះរាជតម្រិះដ៏ភ្លឺស្វាងបំផុត ក្នុងការកសាងចំណងមេត្រីភាពដ៏ភ្លឺត្រចះត្រចង់សម្រាប់ប្រជាជាតិនៃប្រទេសទាំងពីរ ឲ្យមានការរីកចម្រើនរហូតដល់ពេលសព្វថ្ងៃ។
ឯកឧត្តមបានថ្វាយព្រះសព្ទសាធុការពរដ៏មហាបវរថ្វាយព្រះករុណាជាអម្ចាស់ជីវិតលើត្បូង ព្រះមហាក្សត្រ និងសម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត សូមព្រះអង្គបានប្រកបនូវព្រះបរមសុខគ្រប់ប្រការ ព្រះរាជសុខភាព ដ៏ល្អបរិបូរណ៍ ព្រះកាយពលមាំមួន នឹងមានព្រះជ ន្មនាយុយឺនយូជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់ សុខសាន្ត ចំរើនរុងរឿងដល់កម្ពុជា និងកូនចៅ ចៅទួតរបស់ព្រះអង្គជាដរាបតរៀងទៅ៕អត្ថបទ៖ មុត សុទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
