កំពង់ឆ្នាំង ៖ ព្រឹកថ្ងៃទី០៦ ខែតុលា ឆ្នាំ២០២២ ឯកឧត្តម វង សូត រដ្ឋមន្ត្រី​ក្រសួង​សង្គម​កិច្ច​អតីត​យុទ្ធជន និងយុវនីតិសម្បទា បានអញ្ជើញជាអធិបតីក្នុងពិធីប្រកាសចូលកាន់តំណែងរបស់លោក ឈាង ចន្ធី ជាប្រធានមន្ទីរសង្គមកិច្ចខេត្តកំពង់ឆ្នាំងថ្មី ដោយមានការអញ្ជើញចូលរួមពីឯកឧត្តម ឡុង ឈុនឡៃ ប្រធានក្រុមប្រឹក្សាខេត្ត លោកជំទាវ កែ ច័ន្ទមុនី តំណាងរាស្ត្រមណ្ឌលកំពង់ឆ្នាំង លោក អម សុភា អភិបាលរងខេត្តកំពង់ឆ្នាំង ព្រមទាំងគណៈប្រតិភូអមដំណើរ ប្រធាន អនុប្រធានមន្ទីរ កងកម្លាំងប្រដាប់អាវុធ មន្រ្តីរាជការជាច្រើនទៀត។

ឯកឧត្តម វង សូត បានថ្លែងលើកឡើងពីការយកចិត្តទុកដាក់របស់ក្រសួងចំពោះនិវត្តជន, ការ​ផ្តត់ផ្គង់​សាច់ប្រាក់ដល់ស្រ្តីមានផ្ទៃពោះ, និង​កុមារ​ដែល​ចាប់​ពី​ឆ្លង​ទន្លេ​រហូត​ដល់​កុមារ​មាន​អាយុ​២​ឆ្នាំ។ កិច្ចការនេះគឺត្រូវបានសហការយ៉ាងជិតស្និទ្ធជាមួយក្រសួងសុខាភិបាល គឺ​សម្រាប់​តែ​ជន​ក្រីក្រ​ពិត​ប្រាកដ មិនមែនជាទូទៅនោះទេ ដោយគិតចាប់តាំងពីពេលមានផ្ទៃពោះរហូតមក។ ឯកឧត្តមរដ្ឋមន្រ្តីក៏បានណែនាំ ផ្តាំផ្ញើដល់ប្រធានមន្ទីរថ្មី ឱ្យខិតខំប្រឹងប្រែងដឹកនាំអង្គភាព សហការ​សាមគ្គីផ្ទៃក្នុង សហការជាមួយបណ្តាមន្ទីរ អង្គភាពពាក់ព័ន្ធ អនុវត្តន៍​តាម​ការ​ណែនាំ​របស់​ថ្នាក់​ដឹកនាំក្រសួង និងថ្នាក់ដឹកនាំខេត្តឱ្យទទួលបានលទ្ធផលជោគជ័យ។

លោក ឈាង ចន្ធី បានប្រកាសចូលកាន់មុខតំណែងជាប្រធានមន្ទីរសង្គមកិច្ចខេត្តកំពង់ឆ្នាំង ជំនួស​លោក ថោង ចំរើន អតីតប្រធានមន្ទីរសង្គមកិច្ច ដែលត្រូវបានតែងតាំងជាអគ្គនាយករង ។ លោក ថោង ចំរើន អតីតប្រធាន​មន្ទីរ​បាន​រាយការណ៍​ក្នុង​ការ​បំពេញ​ការងារ​ក្នុង​អាណត្តិ​របស់​ខ្លួន​ថា មន្ទីរបានសហការជាមួយរដ្ឋបាលខេត្ត ក្រុងស្រុក ឃុំសង្កាត់ បាន​ចុះ​ចែក​អំណោយ​ជា​ស្បៀង​អាហារ គ្រឿងឧបភោគបរិភោគ និងជម្រកដល់ប្រជាពលរដ្ឋក្រីក្រ ជនចាស់ជរា ពិការ អនាថា បានស្រង់ស្ថិតិជនពិការក្រីក្រនៅសហគមន៍ ស្នើសុំរបបគោលនយោបាយ និងសកម្មភាព ជាច្រើនទៀត។

លោក ឈាង ចន្ធី ដែលទើបប្រកាសចូលកាន់មុខតំណែងជាប្រធានមន្ទីរសង្គមកិច្ច អតីតយុទ្ធជន និងយុវនិតិសម្បទាខេត្តកំពង់ឆ្នាំងថ្មី បាន​ប្តេជ្ញា​ចិត្ត​អនុវត្តន៍​ឱ្យ​បាន​ខ្ជាប់​ខ្ជួន​ជា​និច្ច​នូវ​នយោបាយ​របស់រាជរដ្ឋាភិបាលកម្ពុជា ដែល​មាន​សម្តេច​តេជោ​ជា​ប្រមុខ​ដឹកនាំ​ដ៏​ឆ្នើ​ម​ឱ្យ​ទទួល​បាន​ជោគ​ជ័យ។ ខិតខំយកចិត្តទុកដាក់ឱ្យអស់ពីសមត្ថភាព កម្លាំងកាយចិត្ត និង​ស្មារតី​បំពេញ​ការងារ​ប្រកប​ដោយ​ឆន្ទៈ​ទទួលខុសត្រូវខ្ពស់ និងប្រកាន់ខ្ជាប់ នូវសីលធម៌ ឥរិយាបថជាអ្នកបម្រើប្រជាពលរដ្ឋ គោរពប្រតិបត្តិច្បាប់ លិខិតបទដ្ឋានគតិយុត្តិនានា និងការណែនាំរបស់ថ្នាក់ដឹកនាំក្រសួង និ​ង​ថ្នាក់​ដឹក​នាំ​ខេត្ត ពង្រឹងសាមគ្គីភាពផ្ទៃក្នុងឈរលើគោលការណ៍ច្បាប់ជាមូលដ្ឋាន ប្រកបដោយតម្លាភាព សហការជាប់ជាប្រចាំជាមួយមន្ត្រីរាជការគ្រប់ជាន់ថ្នាក់ ដើម្បីលើក​កម្ពស់​ប្រសិទ្ធភាព​ការងារ​ឱ្យបាន​ល្អ ​៕ ហុង វាស្នា