ព្រះវិហារ៖ សេវាកម្មទេសចរណ៍ផ្សេងៗ នៅក្នុងតំបន់រមណីយដ្ឋានប្រាសាទព្រះវិហារ ស្ថិត​ក្នុង​ស្រុក​ជាំក្សាន្ត ខេត្តព្រះវិហារ មានចំនួនជាង៧០ភាគរយហើយ បានដំណើរការឡើងវិញ បន្ទាប់​ពី​បាន​ជួបនូវវិបត្តិនៃជំងឺកូវីដ-១៩ ដោយមន្ត្រីជំនាញរំពឹងថា វិស័យនេះកាន់តែល្អប្រសើរឡើងវិញ ក្រោយ​ពីរាជរដ្ឋាភិបាលដកចេញនូវបម្រាមមួយចំនួន ទៅលើអ្នកទេសចរណ៍មកពីបរទេស និង​ពលរដ្ឋ​ដ៏​ច្រើនលើសលុប បានចាក់វ៉ាក់សាំងរួចរាល់ និងបានជាច្រើនដូសក្នុងម្នាក់ៗនោះ ។

 លោក ហេង សំរិទ្ធ ប្រធាននាយកដ្ឋានអភិវឌ្ឍន៍ទេសចរណ៍តំបន់ប្រាសាទព្រះវិហារ បាន​លើក​ឡើង​ថា អ្នកធ្វើអាជីវកម្ម លើសេវាកម្មទេសចរណ៍ ក្នុងស្រុកជាំក្សាន្ត បានត្រៀម​លក្ខណៈ​រួចរាល់​ហើយ ក្នុងការទទួលភ្ញៀវទេសចរណ៍ជាតិ និងអន្តរជាតិ ហើយពួក​គេ​ក៏​ត្រូវ​បាន​ទទួល​ការ​សិក្សា​វគ្គ​បណ្ដុះ​បណ្ដាលផ្សេងៗ ពាក់ព័ន្ធនឹងការបម្រើសេវាកម្មទេសចរណ៍ ពីមន្ត្រីជំនាញ ។

លោកបន្តថា នៅក្នុងតំបន់រមណីយដ្ឋានប្រាសាទព្រះវិហារ មានសេវាកម្មផ្ទះសំណាក់ និង​សណ្ឋាគារ ចំនួនជាង ៥០០បន្ទប់ និងអាហារដ្ឋាន អាចផ្ទុកភ្ញៀវចូលបរិភោគបានជាង ១០០០​នាក់ ខណៈសេវាកម្មទេសចរណ៍ទាំងនោះ ដែលមិនទាន់បើកដំណើរការ ក៏កំពុង​រៀបចំ​បណ្ដើរៗ​ផង​ដែរ ។

 លោក ហេង សំរិទ្ធ បានបន្ថែមថា ក្រោយពីបើកដំណើរការប្រទេសឡើងវិញ មានភ្ញៀវទេសចរ​ជាតិ និងអន្តរជាតិ បាន​ទៅលេងកម្សាន្ត និង​ទស្សនា​រមណីយដ្ឋាន​ប្រាសាទ​ព្រះវិហារ​មាន​ការ​កើន​ឡើង​វិញ ប៉ុន្តែបើធៀបនឹងកាលមិនទាន់មានផ្ទុះឆ្លងជំងឺកូវីដ-១៩ គឺនៅមានកម្រិតទាបជាង ។

 លោកបានបញ្ជាក់ថា បច្ចុប្បន្ន ការទៅទស្សនាប្រាសាទព្រះវិហារ ក្នុងមួយថ្ងៃ អាចមាន ៣០០ ទៅ៤០០នាក់ផងដែរ ហើយកាលពីពិធីបុណ្យភ្ជុំបិណ្ឌរយៈពេល ៣ថ្ងៃ ដែលទើបកន្លងទៅនេះ មានភ្ញៀវទេសចរទៅទស្សនាប្រាសាទបុរាណជាបេតិកភណ្ឌមួយនេះ មានប្រមាណជាង ២ពាន់នាក់ ។

 សូមបញ្ជាក់ថា នៅថ្ងៃទី២៩ ខែតុលា ឆ្នាំ២០២២ខាងមុខនេះ សមាគម​ទេសចរណ៍​អាស៊ី​ប៉ាស៊ីហ្វិច (PATA) សហការជាមួយសមាគមទេសចរណ៍ថៃ រៀបចំព្រឹត្តិការណ៍ ដោយ​ធ្វើ​យុទ្ធនាការ​ដើរ​ដង្ហែក្បួនឈ្មោះថា “យាត្រាដើម្បីបេតិកភណ្ឌ” ដើម្បីផ្សព្វផ្សាយ​ពី​សក្ដានុពល​ទេសចរណ៍ នៅប្រាសាទព្រះវិហារ ៕ អត្ថបទ៖ បាន សុខរិទ្ធិ