ភ្នំពេញ៖ ការចុះឈ្មោះបោះឆ្នោត នឹងចាប់ផ្តើមពីថ្ងៃទី២០ ខែតុលា នេះ តទៅហើយ ដែលអ្នក​នាំពាក្យ​គណៈ កម្មាធិការជាតិរៀបចំការបោះឆ្នោត (គជប) នៅថ្ងៃនេះ បានអំពាវនាវ​ដល់​ប្រជាពលរដ្ឋ ​ដែល​មិនទាន់មាន ឈ្មោះក្នុងបញ្ជីបោះឆ្នោត ត្រូវទៅចុះឈ្មោះឲ្យបានគ្រប់ៗគ្នា។

ឯកឧត្តម ហង្ស ពុទ្ឋា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានប្រាប់ BTVថា គិតមកដល់ពេលនេះ គ.ជ.ប បានត្រៀមលក្ខណៈរួចរាល់សម្រាប់ដំណើរការចុះឈ្មោះបោះឆ្នោត ដែលមាន​រយៈពេល៥០ថ្ងៃ ​គឺចាប់ផ្តើមពីថ្ងៃទី២០ ខែតុលា ​ដល់ថ្ងៃទី០៨ ខែធ្នូ ឆ្នាំ២០២២។ ការចុះឈ្មោះនេះ មានសារសំខាន់ណាស់​ ដើម្បីរៀបចំបញ្ជីឈ្មោះ សម្រាប់ការបោះឆ្នោតជ្រើស​តាំង​តំណាងរាស្ត្រនីតិកាលទី៧ ​នៅថ្ងៃទី២៣ ​ខែកក្កដា ឆ្នាំ២០២៣។

ឯកឧត្តម ​បានបន្តអំពាវនាវដល់ប្រជាពលរដ្ឋ ដែលមានអាយុ១៨ឆ្នាំឡើងទៅ ​ដែលមិនទាន់មាន ឈ្មោះក្នុង​បញ្ជីបោះឆ្នោត ​ត្រូវទៅចុះឈ្មោះឲ្យបានគ្រប់ៗគ្នា ដើម្បីមានសិទ្ធិចូលរួមបោះឆ្នោត​សម្រេច​ជោគវាសនារបស់ប្រទេសជាតិ។

ដើម្បីចុះឈ្មោះបោះឆ្នោតបាន ប្រជាពលរដ្ឋត្រូវបំពេញលក្ខខណ្ឌដូចជា ​ត្រូវបង្ហាញខ្លួន ​និងមាន អត្តសញ្ញាប័ណ្ណ​សញ្ជាតិខ្មែរ (អ.ខ) ​ដែលមានសុពលភាព ឯកសារ​បញ្ជាក់​អត្តសញ្ញាណ​បម្រើ​ឲ្យការចុះ ឈ្មោះបោះឆ្នោត ឆ្នាំ២០២២ ​នៅចំពោះមុខក្រុមចុះឈ្មោះបោះឆ្នោត ដែលទទួល​បន្ទុក​ជាមន្រ្តីចុះឈ្មោះ បោះឆ្នោត​ ក្នុងអំឡុងពេលនៃការពិនិត្យបញ្ជីឈ្មោះ និងការ​ចុះឈ្មោះបោះឆ្នោត​នៅការិយាល័យចុះឈ្មោះ​ បោះឆ្នោតណាមួយក្នុងឃុំ-សង្កាត់ដែលខ្លួនកំពុងរស់នៅ។ ត្រូវមានអាយុពី១៨ឆ្នាំឡើង ​គិតត្រឹមថ្ងៃទី២៣ ខែកក្កដា ឆ្នាំ២០២៣ ​ដែលជាថ្ងៃបោះឆ្នោត និង​មាន​លំនៅឋាន ឬទីសំណាក់ក្នុងឃុំ/សង្កាត់​ ដែលសាមី​ខ្លួនត្រូវចុះឈ្មោះបោះឆ្នោត ជាដើម ៕អត្ថបទ៖ ទូច សោភ័ណ