ក្រិក៖ អាជ្ញាធរបាននិយាយថា ប្រតិបត្តិការជួយសង្គ្រោះកំពុងដំណើរការនៅជិតកោះភាគខាងត្បូងប្រទេសក្រិក ជាកន្លែងដែលទូកដឹកជនអន្តោប្រវេសន៍រហូតដល់ ១០០នាក់បានបុកផ្ទាំងថ្ម និងបានលិចក្នុងពេលមានខ្យល់បក់ខ្លាំងកាលពីល្ងាចថ្ងៃពុធ។
ឆ្មាំសមុទ្របាននិយាយថា នាវារបស់ខ្លួន ទូកឯកជន និងឧទ្ធម្ភាគចក្រជួយសង្គ្រោះបានចូលរួមនៅក្នុងកិច្ចខិតខំប្រឹងប្រែងនៅជិតឆ្នេរសមុទ្រនៃកោះ Kythira ចម្ងាយប្រមាណ ២២៥គីឡូម៉ែត្រភាគខាងត្បូងទីក្រុង Athens។ ក្រុមមន្ត្រីបាននិយាយថា មានតែមនុស្ស ៧នាក់ប៉ុណ្ណោះត្រូវបានជួយសង្គ្រោះរហូតមកដល់ពេលនេះ ប៉ុន្តែមន្ត្រីពុំបានផ្តល់ព័ត៌មានលម្អិតផ្សេងទៀតអំពីការបាត់ខ្លួនជនអន្តោប្រវេសន៍នោះទេ។ ទូកបានបុកផ្ទាំងថ្មនៅជិតកំពង់ផែភូមិ Diakofti ភាគខាងកើតកោះ ក្នុងពេលដែលខ្យល់នៅតំបន់នោះមានល្បឿនរហូតដល់ ៧០គីឡូម៉ែត្រក្នុងមួយម៉ោង។ ក្រុមអ្នកជួយសង្គ្រោះបានទម្លាក់ខ្សែពួរ ដើម្បីជួយជនអន្តោប្រវេសន៍ឡើងមកលើច្រាំងថ្មនៅមាត់សមុទ្រ។ មន្ត្រីក្នុងតំបន់និយាយថា សាលារៀនមួយកន្លែងនៅក្នុងតំបន់ត្រូវបើក ដើម្បីផ្តល់ទីជម្រកសម្រាប់អ្នកដែលត្រូវបានជួយសង្គ្រោះ។
ជនអន្តោប្រវេសន៍ភាគច្រើនដែលទៅដល់ប្រទេសក្រិក ធ្វើដំណើរពីប្រទេសជិតខាងទួរគី ប៉ុន្តែក្រុមអ្នករត់ពន្ធបានប្តូរផ្លូវក្នុងរយៈពេលប៉ុន្មានខែថ្មីៗនេះ ក្នុងកិច្ចប្រឹងប្រែងមួយដើម្បីបញ្ចៀសការល្បាតរបស់អាជ្ញាធរ នៅលើដែនទឹកជុំវិញកោះប្រទេសក្រិកក្បែរឆ្នេរសមុទ្រប្រទេសទួរគី។ កោះ Kythira ស្ថិតនៅចម្ងាយប្រហែល ៤០០គីឡូម៉ែត្រភាគខាងលិចប្រទេសទួរគី ហើយនៅលើផ្លូវមួយដែលជារឿយៗត្រូវបានប្រើប្រាស់ដោយក្រុមអ្នករត់ពន្ធ ដើម្បីឆ្លងកាត់ប្រទេសក្រិក ហើយឆ្ពោះទៅកាន់ប្រទេសអ៊ីតាលី៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
