កណ្ដាល៖ មន្ទីរអប់រំ យុវជន និងកីឡាខេត្តកណ្ដាលបានប្រកាសរៀបចំ ព្រឹត្តិការណ៍ប្រកួតកីឡាដើម្បីទាំងអស់គ្នាឆ្នាំ២០២២ ដើម្បីគាំទ្រយុទ្ធនាការ “ប្រជាជនម្នាក់លេងកីឡាមួយប្រភេទប្រចាំជីវិត” ដែលជាយុទ្ធនាការឆ្ពោះទៅស៊ីហ្គេម-អាស៊ានប៉ារ៉ាហ្គេមឆ្នាំ២០២៣។
លោក ពៅ វណ្ណា ប្រធានការិយាល័យអប់រំកាយ និងកីឡានៃមន្ទីរអប់រំ យុវជន និងកីឡាខេត្តកណ្តាលបានឲ្យដឹងថា ព្រឹត្តិការណ៍នេះធ្វើឡើងរយៈពេល ១សប្ដាហ៍ចាប់ពីថ្ងៃទី០៦ ដល់ថ្ងៃទី១២ ខែតុលា ឆ្នាំ២០២២ នៅទីក្រុងតាខ្មៅ ខេត្តកណ្ដាល ដែលរៀបចំការប្រកួតលើ ៣ប្រភេទកីឡារួមមានកីឡាបាល់ទាត់ បាល់ទះ និងកីឡាបាល់បោះ។ លោកបន្ដថា ព្រឹត្តិការណ៍ប្រកួតកីឡាដើម្បីទាំងអស់គ្នានេះរៀបចំឡើងក្រោមប្រធានបទ “ប្រជាពលរដ្ឋម្នាក់ត្រូវចេះលេងកីឡាមួយប្រភេទប្រចាំជីវិត” ក្នុងគោលបំណងផ្សព្វផ្សាយប្រជាពលរដ្ឋទាំងអស់គ្នា ចូលរួមលេងកីឡាដើម្បីសុខុមាលភាព និងជៀសផុតពីជំងឺផ្សេងៗ ហើយក៏ក្នុងន័យបំផុសវិស័យកីឡានៅខេត្តកណ្តាលឲ្យកាន់តែរីកចម្រើនខ្លាំងឡើងថែមទៀត។
ប្រធានការិយាល័យអប់រំកាយ និងកីឡាដដែលបន្ថែមថា ការប្រកួតប្រចាំឆ្នាំនេះក៏ជាឱកាសបំផុសចលនាកីឡាក្នុងខេត្ត ជំរុញទឹកចិត្តយុវជនឲ្យងាកមកនាំគ្នាចូលរួមលេងកីឡា ដើម្បីជ្រើសរើសកីឡាករ-កីឡាការិនីឆ្នើមសម្រាប់តំណាងខេត្ត ត្រៀមចូលរួមការប្រកួតថ្នាក់ជាតិនាពេលខាងមុខ ដែលរៀបចំដោយសហព័ន្ធកីឡាជាតិ ក៏ដូចជាក្រសួងអប់រំ យុវជន និងកីឡាផងដែរ។ សូមបញ្ជាក់ថា សម្រាប់ការប្រកួតនេះកីឡាបាល់ទាត់គឺមានក្រុមបុរស ១៥ក្រុម និងនារី ៤ក្រុមចូលរួម។ រីឯកីឡាបាល់ទះគឺមានក្រុមបុរស ៤ក្រុម និងនារី ៣ក្រុមចូលរួម គ្រាដែលកីឡាបាល់បោះគឺមានក្រុមបុរស ៤ក្រុម និងនារី ៣ក្រុមចូលរួមដូចគ្នា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
