ឧត្តរមានជ័យ៖ ក្រុមការងារគណបក្សប្រជាជនកម្ពុជានាំយកថវិការបស់លោក ហ៊ុន ម៉ាណែត សមាជិកគណៈអចិន្រ្តៃយ៍ នៃគណៈកម្មាធិការកណ្តាល និងជាប្រធាន​យុវជន​គណបក្សថ្នាក់​កណ្តាល ប្រគល់ដល់គ្រួសារសពទាហាន​ចំនួន២រូប​ដែល​បាន​ពលី​ជីវិត​ក្នុងការជួយសង្រ្គោះអាយុជីវិតក្មេងប្រុសចំនួន២នាក់ ដែល​បាន​លង​ទឹក​ នៅ​ចំណុច​អាងអូរអង្រ្កង ​ស្ថិតនៅភូមិកញ្ជ្រៀប ​ឃុំគោកមន ​ស្រុកបន្ទាយអំពឹល ​ខេត្តឧត្តរមានជ័យ កាលពីថ្ងៃទី៣០ ខែកញ្ញា ឆ្នាំ២០២២ កន្លងមកថ្មីនេះ។

លោក ជ្រុន ថេរ៉ាវ៉ាត សមាជិកគណៈកម្មាធិការកណ្តាលនិងជាអនុប្រធានយុវជន​គណបក្ស​ថ្នាក់​កណ្តាល ​បានពាំនាំនូវការសួរសុខទុក​និង​ការ​ចូលរួម​រំលែក​ទុក្ខ​ដ៏ក្រៀមក្រំ​ចំពោះ​គ្រួសារ​សព​ទាំងពីរ​ពីសំណាក់​លោក ហ៊ុន ម៉ាណែត ដែល​បាន​លះបង់​នូវ​អាយុ​ជីវិត​ក្នុង​បុព្វហេតុជួយសង្រ្គោះជីវិតក្មេង​ប្រុសចំនួន២រូប​ដែល​បានលងទឹក តែ​ជា​អកុសល​បន្ទាប់​ពី​ជួយសង្រ្គោះក្មេងទាំង២រួចផុត​ពី​ការ​លង​ទឹក​ហើយ​នោះ​ បែរជាយុទ្ធជន​ទាំង២ត្រូវ​ទឹក​គួច​បណ្តាល​ឲ្យ​ស្លាប់បាត់បង់ជីវិតទៅវិញ។

លោកបានបន្តថា ទាំងអស់នេះ​ហើយ​គឺ​ទឹកចិត្តមួយដ៏​មានតម្លៃ និង​គួរ​ឲ្យគេ​ឯង​គោរព​កោត​សរសើរ​ពី​វីរៈភាព​របស់​យុទ្ធជន​ទាំងពីររូប​ ​បើទោះបីយុទ្ធជនទាំង២បានស្លាប់បាត់បង់ជីវិត ​យ៉ាង​ណា​ក្តី​តែ​កេរ្តិ៍ឈ្មោះ​របស់​យុទ្ធជនទាំង២រូប​នៅតែដិតជាប់ក្នុងបេះដូង​ប្រជាពលរដ្ឋខ្មែរគ្រប់គ្នា។

ទន្ទឹមគ្នានោះដែរលោក បាន​ប្រគល់​ជូន​នូវ​ថវិកា​ដ៏​ថ្លៃថ្លា​របស់​លោក ហ៊ុន ម៉ាណែត ជូន​ចំពោះ​គ្រួសារ​សពទាំង២​គ្រួសារ​ ដោយ​មួយ​គ្រួសារ​សព​ទទួល​បាន​ថវិកា​ចំនួន ៧.៨២៧.៥ ដុល្លារ​អាម៉េរិក ​និង​ប្រាក់រៀល​ចំនួន​ ៦.០០០.០០០លានរៀល។

គួរបញ្ជាក់ថា កន្លងមក​លោក ​ហ៊ុន ម៉ាណែត ​ធ្លាប់​បាន​ឧបត្ថម្ភ​ជូន​ដល់​ក្រុមគ្រួសារ​សពទាំងពីររូប​​នូវ​ទឹក​ប្រាក់​ក្នុង​មួយ​គ្រួសារសព​ទទួល​បានម្នាក់ ១០លានរៀល ហើយ​បាន​ផ្ដល់​នូវ​ឋានន្តរសក្ដិ​មច្ឆាមរណៈថ្នាក់​អនុសេនីយ៍ត្រី​ជូន​ដល់​យុទ្ធជន​ទាំង​២រូបផងដែរ៕ អត្ថបទ៖ ឃិន សារិទ្ធិ