ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅព្រឹកថ្ងៃទី៧ ខែតុលានេះ បានដឹកនាំកិច្ចប្រជុំ ស្តីពីលទ្ធផល​នៃការអនុវត្តយុទ្ធនាការប្រយុទ្ធប្រឆាំង នឹង​អំពើ​ជួញដូរ​មនុស្ស ជួញដូរ ពលកម្ម អាជីវកម្មផ្លូវភេទ ​និងល្បែងស៊ីសងខុសច្បាប់គ្រប់ប្រភេទ ព្រមទាំងការងារត្រួតពិនិត្យជនបរទេស ​និងហត្ថពលកម្មបរទេសជាដើម។

គិតចាប់ពីថ្ងៃទី១៨ ខែសីហា ឆ្នាំ២០២២ ដល់ថ្ងៃទី០៤ ខែតុលា ឆ្នាំ២០២២ ​ការដាក់ចេញផែនការ ប្រតិបត្តិការ ​និងយន្តការពីថ្នាក់ជាតិ ​រហូតដល់មូលដ្ឋាន ​សមត្ថកិច្ចពាក់ព័ន្ធ បានធ្វើសកម្មភាព​យ៉ាង​សកម្ម ក្នុងការប្រយុទ្ធប្រឆាំងការជួញដូរមនុស្ស ​និងការបង្រ្កាបបនល្បែងខុសច្បាប់ជាដើម។

របាយការណ៍ បានឲ្យដឹងថា គិតត្រឹមថ្ងៃទី៦ ខែតុលា នេះ សមត្ថកិច្ច បានជួយសង្គ្រោះជនបរទេស ចំនួន៥១១នាក់ ពីការជួញដូរ និងឃាត់ខ្លួនជនសង្ស័យបានចំនួន៦៧នាក់ផងដែរ ដែលជន​សង្ស័យទាំងនោះ មានជនជាតិចិន ៥២នាក់, ​ជនជាតិខ្មែរ ១៣នាក់ និងជនជាតិវៀតណាម ០២នាក់។

ដោយឡែកសម្រាប់ការបង្រ្កាបបនល្បែងខុសច្បាប់គ្រប់ប្រភេទវិញ​ អាជ្ញាធរគ្រប់លំដាប់ថ្នាក់ទាំង អស់ ​បានឹងកំពុងធ្វើការយ៉ាងសកម្មផងដែរ ​ដែលរហូតមកដល់ពេលនេះ បានបិទទីតាំងល្បែង​ខុសច្បាប់ មួយចំនួន និងឃាត់ខ្លួនជនសង្ស័យបានមួយចំនួនផងដែរ៕សម្រួល៖ យន់ វ៉ាន់