ភ្នំពេញ៖ យុវជនចំនួនជាង ១០០នាក់ មកពីប្រទេសផ្សេងៗគ្នាក្នុងតំបន់អាស៊ាន បានជួបប្រជុំគ្នា​ក្នុង​កម្មវិធី​សន្និសីទយុវជនអាស៊ាន (AYC) ក្រោមប្រធានបទ “កិច្ចសហប្រតិបត្តិការអភិវឌ្ឍន៍ក្រោយការរាតត្បាតនៃ​ជំងឺកូវីដ១៩” ដើម្បីរួមគ្នាស្វែងរកដំណោះស្រាយនូវបញ្ហាប្រឈមនានាទាំងអស់គ្នា ដែលប្រព្រឹត្តទៅដោយផ្ទាល់នៅទីក្រុងភ្នំពេញ និងតាមប្រព័ន្ធអនឡាញ។

ក្នុងរបៀបវារៈសន្និសីទយុវជនអាស៊ាន ដែលរៀបចំឡើងនៅសាកលវិទ្យាល័យខេមតិច រាជធានីភ្នំពេញ នឹងប្រព្រឹត្តទៅរយៈពេល ៣ថ្ងៃ ចាប់ពីថ្ងៃទី៧ ដល់៩ ខែតុលា ឆ្នាំ២០២២ ដែលផ្តោតសំខាន់លើសសរស្តម្ភចំនួន៣ របស់អាស៊ាន មានដូចជា៖ ១.សហគមន៍នយោបាយសន្តិសុខអាស៊ាន៖ សន្តិសុខ និងសុខមាលភាពអាស៊ាន ២.សហគមន៍សេដ្ឋកិច្ចអាស៊ាន៖ កិច្ចសហប្រតិបត្តិការ និងការគាំទ្រសហគ្រាសធុនតូច និងមធ្យម ក្នុងអាស៊ាន និង៣.សហគមន៍វប្បធម៍អាស៊ាន៖ សិទ្ធមនុស្ស និងការឲ្យតម្លៃក្នុងអាស៊ាន។

តាមការលើកឡើងរបស់លោក Senjaya Mulia ស្ថាបនិកអង្គការយុវជនអាស៊ាន បានមានប្រសាសន៍ថា សន្និសីទយុវជនអាស៊ាន ២០២២ ដើម្បីស្វែងរកនូវអ្នកដឹកនាំវ័យក្មេង និងបុគ្គលស្វែងរកការផ្លាស់ប្តូរ​នៃតំបន់អាស៊ានដែលមានចំណាប់អារម្មណ៍ក្នុងការចែករំលែក នូវការយល់ឃើញចំពោះបញ្ហា និង​ឱកាសនានា​នៅក្នុងសហគមន៍អាស៊ាន ព្រមទាំងអាចចូលរួមបង្កើតនូវគោលនយោបាយទៅកាន់អគ្គលេខាធិការអាស៊ានចំពោះការបជ្រើសរើសយកនូវសសរស្តម្ភ។ លោកបន្តថា សម្រាប់អង្គការយុវជនអាស៊ាន ឲ្យតម្លៃខ្ពស់ទៅលើយុវជន ព្រោះយុវជន ជាកាតាលីករដ៏សំខាន់សម្រាប់ការផ្លាស់ប្តូរ និងអភិវឌ្ឍន៍។

ជាមួយគ្នានេះ កញ្ញា ណយ ឆវិន មន្រ្តីផ្នែកកិច្ចការនិស្សិត នៃសាកលវិទ្យាល័យ ខេមតិច បានបញ្ជាក់ថា ចំពោះប្រធានបទដែលរៀបចំឡើងក្នុងពេលនេះ ពិតជាមានសារៈសំខាន់ណាស់សម្រាប់យុវជនក្នុងតំបន់អាស៊ាន ក្នុងការអនុវត្តគោលការណ៍សន្តិភាព ស្ថេរភាព សាមគ្គីភាព ឯកភា ភាពរុងរឿង និងនិរន្តភាព ដែលស្របទៅនឹងតួនាទីប្រធាន នៃអាស៊ានរបស់កម្ពុជានៅឆ្នាំនេះផងដែរ។ ជាពិសេស ការបង្កើតបាននូវទំនាក់ទំនង រវាងតំណាងសមាជិករដ្ឋនៃសមាគមអាស៊ាន រួមមាន៖ ស្ថាប័នឯកជន ធុរកិច្ច ចលនាសង្គមស៊ីវិល ស្ថាប័នអប់រំនិងផ្សព្វផ្សាយ អង្គការអន្តរជាតិ ដៃគូពីសំណាក់សកលវិទ្យាល័យនានា សមាគមសិស្ស និងនិស្សិត។

កញ្ញា បានឲ្យដឹងទៀតថា គោលបំណងសំខាន់នៃការរៀបចំសន្និសីទនេះឡើង ក្នុងគោលបំណងទទួលស្គាល់​ភាពជាប្រធានអាស៊ានរបស់កម្ពុជា, ការបោះពុម្ភផ្សាយឯកសាររបស់ អង្គការយុវជនអាស៊ាន (AYO) នូវឯកសារស្រាវជ្រាវក្រោមចំណងជើង “ការអភិវឌ្ឍន៍ចេរកាលនៃអាស៊ាន៖ ការចូលរួមរបស់យុវជន” និងបង្កើតទំនាក់ទំនង រវាងតំណាងសមាជិករដ្ឋនៃសមាគមអាស៊ាន, ស្ថាប័នឯកជន, ធុរកិច្ច, ចលនាសង្គមស៊ីវិល, ស្ថាប័នអប់រំ និងផ្សព្វផ្សាយ, អង្គការអន្តរជាតិ, ដៃគូពីសំណាក់សកលវិទ្យាល័យនានា, សមាគមសិស្ស និងនិស្សិត៕