កំពង់ចាម ៖ សេចក្តីជូនដំណឹងស្តីពីការផ្អាកចរាចរទោចក្រយានយន្តនិងរថយន្តគ្រប់ប្រភេទជាបណ្តោះអាសន្ននៅលើកំណាត់ផ្លូវជាតិលេខ៧ ចាប់ពី PK89+000 ដល់ PK91+000 ស្ថិតនៅក្នុងភូមិកប្បាស ឃុំខ្វិតធំ ស្រុកព្រៃឈរ ខេត្តកំពង់ចាម ខណៈមន្ត្រីសាធារណការ និងដឹកជញ្ជូន ខេត្ត កំពង់ចាម កាត់ផ្លូវជាតិលេខ៧ ដាក់លូមុខ១ម៉ែត្រ មានពីរជួរ ដេីម្បី រំដោះទឹកចេញពីតំបន់នេះដែលកំពុងជន់លិចដោយសារជំនន់ទឹកភ្លៀងឲ្យបាន។
ទន្ទឹមនឹងនេះដែរ នៅរសៀល ថ្ងៃទី ៧ ខែតុលា ឆ្នាំ ២០២២ ឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានដឹកនាំមន្ត្រីជំនាញ នៃមន្ទីរសាធារណការ និងដឹកជញ្ជូន ខេត្ត កំពង់ចាម សហការជាមួយ អាជ្ញាធរ ស្រុកព្រៃឈរ ចុះពិនិត្យ ស្ថានភាពទឹកជំនន់ទឹកភ្លៀងដែលបង្កឲ្យហូរកាត់ ជន់លិចបណ្តោយផ្លូវជាតិលេខ៧ ត្រង់ចំណុចភូមិកប្បាស ឃុំខ្វិតធំ ស្រុកព្រៃឈរ ខេត្តកំពង់ចាម ។
បន្ទាប់ ឯកឧត្តម អ៊ុន ចាន់ដា អភិបាល បានបញ្ជាឲ្យមន្ទីរសាធារណការ និងដឹកជញ្ជូន ខេត្ត កំពង់ចាម ដែលដឹកនាំដោយ លោក សុខ លឹមហៀង ប្រធានមន្ទីរ ឲ្យក្រុមការងារកាត់ផ្លូវជាតិលេខ៧ ចេញ ដេីម្បីដាក់លូមុខកាត់១ម៉ែត្រ ចំនួន២ជួរ រំដោះទឹកចេញពីផ្លូវ និងមួយចំហៀងផ្លូវទៀត។
បេីតាមការបញ្ជាក់ ពី លោក សុខ លឹមហៀង ប្រធានមន្ទីរ សាធារណការ និង ដឹក ជញ្ជូន ខេត្តកំពង់ចាម បានឲ្យដឹងថា ផ្លូវជា តិលេខ៧នេះត្រូវផ្អាកចរាចរណ៍មួយរយៈសិន ហេីយសូមអធ្យាស្រ័យដល់សាធារណជនទាំងអស់ដែលធ្វេីដំណេីរឆ្លងកាត់ផ្លូវនេះ ។ លោកប្រធានមន្ទីរ បញ្ជាក់ ទៀតថា ក្រុមការងារនឹងពន្លឿនការដាក់លូឲ្យរួចរាល់នៅព្រឹកថ្ងៃទី៨ ខែតុលា នេះ ដេីម្បីបេីកចរាចរណ៍ឲ្យបងប្អូនប្រជាពលរដ្ឋអាចធ្វេីដំណេីរឆ្លងកាត់បាន៕