ភ្នំពេញ៖ អគ្គនាយកនៃអគ្គនាយកដ្ឋានពន្ធដារ អំពាវនាវដល់វិស័យឯកជន ដែលប្រកបអាជីវកម្មនៅក្រៅប្រព័ន្ធ ជាពិសេសវិស័យ SME គួរមកចុះបញ្ជីឲ្យបានត្រឹមត្រូវ ដើម្បីការប្រកួតប្រជែងស្មើភាពគ្នា និងងាយស្រួលដល់ប្រសិទ្ធភាពគៀងគរចំណូល ដែលជាផ្នែកមួយយ៉ាងសំខាន់ នៃការចូលរួមអភិវឌ្ឍន៍ប្រទេសទាំងអស់គ្នា។
ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងទទួលបន្ទុកជាអគ្គនាយកនៃអគ្គនាយកដ្ឋានពន្ធដារ លើកឡើងក្នុង សន្និសីទចក្ខុវិស័យប្រទេសកម្ពុជា ឆ្នាំ ២០២២ ក្រោមប្រធានបទ “ការស្តារកម្ពុជាឡើងវិញពីវិបត្តិនជំងឺកូវីដ-១៩ ការអភិវឌ្ឍប្រកបដោយនិរន្តរភាព បន្ទាប់ពីជំងឺកូវីដ-១៩» នៅថ្ងៃទី ៦ ខែ តុលា ឆ្នាំ ២០២២ ថា រាជរដ្ឋាភិបាល តាមរយៈអគ្គនាយកដ្ឋានពន្ធដារ បានលើកទឹកចិត្តជាច្រើនដល់វិស័យឯកជនដូចជា លើផ្នែកវិស័យកសិកម្ម វិស័យអប់រំ និងវិស័យមួយចំនួន ត្រូវបានលើកទឹកចិត្តចាប់ ពី ៣ឆ្នាំ រហូតដល់ ៩ឆ្នាំផងដែរ ហើយពេលអស់សុពលភាពនៃការលើកទឹកចិត្ត រដ្ឋក៏មិនមែនចាប់ផ្តើមការប្រមូលពន្ធ ឲ្យអនុវត្ត ១០០% នោះដែរ ដោយទុករយៈពេលឲ្យអាជីវកម្ម សហគ្រាសរឹងដៃជើងជាមុន។
ឯកឧត្តម បន្តថា រាជរដ្ឋាភិបាលបានពង្រឹងអភិបាលកិច្ចរបស់ខ្លួន ដើម្បីចូលរួមជាមួយគ្នា ការអភិវឌ្ឍន៍ប្រទេសស្មើដៃគ្នា ក្នុងនោះសម្រាប់យុទ្ធសាស្ត្រគៀងគរចំណូលវិញ អគ្គនាយកដ្ឋានពន្ធដារ គឺបានផ្តោតការយកចិត្តទុកដាក់ខ្ពស់ទៅលើការបង់ពន្ធស្មើភាពគ្នា ដែលបញ្ហានេះ គឺចង់ឲ្យអ្នកប្រកបរបរអាជីវកម្មក្រៅប្រព័ន្ធ ជាពិសេសសហគ្រាសធុនតូច និងមធ្យម គួរមកចុះបញ្ជីឲ្យបានត្រឹមត្រូវ ដើម្បីជម្រុញការធ្វើពាណិជ្ជកម្មអភិវឌ្ឍន៍រីកចម្រើនទាំងអស់គ្នា នឹងមានការបង់ពន្ធស្មើរភាពគ្នា។
នៅក្នុងកម្មវិធីនេះដែរ, ឯកឧត្តម គង់ វិបុល ក៏បានលើកឡើងអំពីអភិបាលកិច្ច ដោយការពង្រឹងអភិបាលកិច្ចល្អ នឹងនាំមកនូវប្រសិទ្ធភាពការងារ ការគ្រប់គ្រងចំណូលមានភាពច្បាស់ មានតម្លាភាពរបស់អគ្គនាយកដ្ឋានពន្ធដារ នឹងនាំឲ្យចំណូលពន្ធមានការកើនឡើង និងឈានដល់ការប្រមូលចំណូលប្រកបដោយភាពជោគជ័យ៕
អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
