បន្ទាយមានជ័យ៖ នៅព្រឹកថ្ងៃទី០៨ ខែតុលានេះ ឯកឧត្តម ហ៊ុន ម៉ានី បាននាំយកអាវភ្លៀង ដែលជា​អំណោយ​របស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រគល់ជូន​កង​កម្លាំងទាំង៣ប្រភេទ ​នៅក្នុងខេត្តបន្ទាយមានជ័យ ។

ឯកឧត្តម ហ៊ុន ម៉ានី តំណាងសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមាន​ប្រសាសន៍​ពាំនាំការផ្តាំផ្ញើសួរសុខទុក្ខពីសំណាក់សម្តេចទាំងទ្វេ ជូនចំពោះកងកម្លាំងប្រដាប់អាវុធគ្រប់​មុខ​សញ្ញានៅទិសយោធភូមិភាគទី៥ ​ដែលកំពុងឈរជើងតាមព្រំដែន ។

ឯកឧត្តម បានថ្លែងអំណរគុណ និងកោតសរសើរចំពោះកងកម្លាំងប្រដាប់អាវុធគ្រប់​មុខសញ្ញា ដែល​បាន​លះបង់កម្លាំងកាយចិត្ត បំពេញភារកិច្ចប្រកបដោយភាពអង់អាចក្លាហាន ​គ្រប់កាលៈទេសៈ ជាពិសេស ​កងកម្លាំងទាំងអស់ ​តែងតែបានចុះជួយសង្រ្កោះប្រជាពលរដ្ឋ ពីគ្រោះមហន្តរាយធម្មជាតិ​ផ្សេងៗ និងក្នុងដំណាក់ចុងក្រោយនេះ កងកម្លាំងប្រដាប់អាវុធ ​បានក្លាយជាកម្លាំងស្នូលមួយយ៉ាង​សំខាន់​ក្នុងការប្រយុទ្ធប្រឆាំងបានយ៉ាងជោគជ័យ ​ទៅនឹងការឆ្លងរាលដាលនៃជំងឺកូវីដ-១៩ ដែល​ស្តែងចេញពីការគោរព និងទទួលបញ្ជាយ៉ាង​ដាច់ណាត់​របស់ប្រមុខរាជរដ្ឋាភិបាល​ក្នុងការ​គ្រប់គ្រង​សភាពការណ៍ ។

ឧត្តមសេនីយ៍ត្រី សឹង្ហ ទុំ មេបញ្ជាការកងពលតូចថ្មើរជើងលេខ៥១ បានថ្លែងអំណរគុណចំពោះ​សម្តេចតេជោ ហ៊ុន សែន​ និងសម្តេចកិត្តិព្រឹទ្ធបណ្ឌិត ដែលតែងតែគិតគូពីសុខទុក្ខរបស់កង​កម្លាំង​ប្រដាប់អាវុធទាំងអស់។​ ជំនួសមុខឲ្យកងកម្លាំងក្នុងទិសទី១​ បន្ទាយមានជ័យ និងក្នុងនាម​មេបញ្ជាការកងពលតូចថ្មើរជើងលេខ៥១​ ប្តេជ្ញា​ការពារឲ្យបានដាច់ខាត និងធ្វើពលិកម្មគ្រប់​បែប​យ៉ាង ក្នុងបុព្វហេតុជាតិ ក្នុងការការពារជាតិ សាសនា ព្រះមហាក្សត្រ ​ការពារអធិបតេយ្យភាព បូរណភាពទឹកដី ៕