ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានបញ្ជាឲ្យឯកឧត្តម អូន ព័ន្ធមុនីរត្ន រដ្ឋមន្រ្តីស្តីទីក្រសួងកសិកម្ម រុក្ខាប្រមាញ់ និងនេសាទ ចាត់មន្រ្តីជំនាញចុះទៅ​តាម​ខេត្តជាបន្ទាន់ ដើម្បីវាយតម្លៃផលប៉ះពាល់ដំណាំ​ស្រូវរបស់បងប្អូនប្រជាពលរដ្ឋ​ដែលទទួល​រងគ្រោះដោយសារទឹកជំនន់ ដើម្បីត្រៀមដឹកជញ្ជូនគ្រាប់ពូជផ្តល់ជូនសម្រាប់ពួកគាត់​ធ្វើការ​ដាំដុះឡើងវិញ។

តាមរយៈសារសំឡេងកាលពីយប់ថ្ងៃទី៨ តុលា ឆ្នាំ២០២២ម្សិលមិញនេះ សម្តេចតេជោ ហ៊ុន សែន ថ្លែងថា ​តាមតួលេខរបស់គណៈកម្មាធិការជាតិគ្រប់គ្រោះមហន្តរាយ ​បានបង្ហាញថា ស្រូវលិចទឹក​ចំនួន ១៥១.៤១២ហិកតា, និងដំណាំរួមផ្សំផ្សេងៗទៀតមានចំនួន​ ៤១.០២៤ហិកតា ដូច្នេះដើម្បី​ឲ្យដឹង​ស្ថិតិច្បាស់លាស់បន្ថែមទៀត។

សម្តេច បានបញ្ជាឲ្យមានកិច្ចសហការរួមគ្នាវាយតម្លៃ ​ដើម្បីត្រៀមបម្រុងដឹកពូជស្រូវ និងពូជដំណាំ​ទៅ​ដល់គោលដៅ​ដែលរងផលប៉ះពាល់ខូចខាត ​និងជួយ​អន្តរាគមន៍​ដល់ពលរដ្ឋឲ្យ​បានទាន់​ពេលវេលា។

តាមរយៈសំឡេងនេះដែរសម្តេចតេជោ ​នាយករដ្ឋមន្រ្តី​ក៏បានឲ្យដឹងផងដែរថា រហូតមកដល់​ពេលនេះ ​មានប្រជាពលរដ្ឋចំនួន៤នាក់​បានស្លាប់​ដោយសារទឹកជំនន់ ខណៈខេត្តដែល​បានប៉ះពាល់​ចំនួន២២ ក្រុង/ស្រុក/ខណ្ឌ ចំនួន៩៦​ និង៧៧០ឃុំ ​ដែលបានលិចលង់ ហើយបងប្អូន​ប្រជាពលរដ្ឋ​ជាច្រើន​គ្រួសារ​បានជម្លៀសទៅរកទីទួលសុវត្ថិភាព៕ អត្ថបទ៖ បាន ចក់