ភ្នំពេញ៖ ឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយម នៅព្រឹកថ្ងៃទី៩ ខែតុលា ឆ្នាំ២០២២នេះ ​បានដឹកនាំក្រុមមន្រ្តីបច្ចេកទេស ​ចុះពិនិត្យលទ្ធភាពក្នុងការរំដោះទឹកពី​ស្ទឹងព្រែកត្នោត ដើម្បីបង្ហូរទម្លាក់ចូលទៅក្នុងទន្លេ តាមរយៈប្រឡាយ៩៤ និង៩៦ នៅក្នុងភូមិសាស្រ្ត​សង្កាត់កំពង់សំណាញ់ ក្រុងតាខ្មៅ និងបន្តពិនិត្យស្ថានភាពទឹកតាមខ្នងទំនប់សណ្តស្ទឹងព្រែកត្នោត ដែល​បច្ចុប្បន្ននៅពុំទាន់មានអ្វីជាការព្រួយបារម្ភ​ខ្លាំងក្លា​នៅ​ឡើយទេ។

តាមរយៈផេកហ្វេសប៊ុករបស់ក្រសួងធនធានទឹក ​និងឧតុនិយម បានឲ្យដឹងថា ក្នុងដំណើរពិនិត្យ ស្ថានភាពទឹកនេះ ​ឯកឧត្តមរដ្ឋមន្ត្រី ក៏បានណែនាំបន្ថែមដល់ប្រធានមុខព្រួញទាំងអស់ ត្រូវបង្កើន​ការយកចិត្តទុកដាក់ ​ដោយស្មារតីទទួលខុសត្រូវខ្ពស់ចំពោះបញ្ហាទឹកជំនន់នេះ។

បើតាមប្រភព បានបញ្ជាក់ផងដែរថា​ ស្ថានភាពកម្ពស់ទឹកស្ទឹងព្រែកត្នោត នៅសំណង់ទ្វារទឹកទំនប់​អាង៧មករា ​នាថ្ងៃទី ៩ខែតុលា ឆ្នាំ២០២២ វេលាម៉ោង ​៦:០០ នាទីព្រឹក កម្ពស់ទឹកខាងមុខទ្វារ ៥,០៥ ម៉ែត្រ,កម្ពស់ទឹកប្រុងប្រយ័ត្ន ៥,៣០ ម៉ែត្រ។ កម្ពស់ទឹកហូរលើទំនប់បង្ហៀរ ០,២៥ ម៉ែត្រ និងកម្ពស់​ទឹកខាងក្រោយទ្វារ ៧,២០ម៉ែត្រ,ជាកម្ពស់មួយដែលត្រូវធ្វើការត្រៀម​លក្ខណៈ និងតាមដានខ្ពស់​ព្រោះ​ស្ថានភាព​ទឹកនៅបន្តកើនឡើង។

សូមបញ្ជាក់ផងដែរថា កាលពីល្ងាចថ្ងៃទី៨ ខែតុលាម្សិលមិញនេះ ប្រជាពលរដ្ឋរស់នៅក្នុងសង្កាត់ ព្រៃវែង ​ខណ្ឌដង្កោ រាជធានីភ្នំពេញប្រមាណ ៣០គ្រួសារបាន​ជម្លៀស​ខ្លួនទៅរកទីទួល​មាន​សុវត្ថិភាព​ជាបណ្តោះអាសន្ន ​ក្រោយមានជំនន់ទឹកភ្លៀងលិចស្ទឹងព្រែកត្នោត និងបានលិចផ្ទះ​របស់ពួកគាត់។ ​នេះជាការបញ្ជាក់របស់លោក ជឹម សុផាត ​ក្រុមប្រឹក្សាសង្កាត់ព្រៃវែង៕

អត្ថបទ៖ បានចក់