បន្ទាយមានជ័យ៖ នាឱកាសនៃបេសកកម្មចុះសំណេះសំណាល និងចែកអាវរងាជូនកងទ័ព នៅ​តាមបណ្តាកងពលប្រចាំទិសនានាចំណុះយោធភូមិភាគទី៥ ឯកឧត្តម ហ៊ុន ម៉ានី បានពាំនាំ​ការផ្តាំផ្ញើការសាកសួរសុខទុក្ខ និងថ្លែងអំណរគុណពីសំណាក់ឯកឧត្តមបណ្ឌិត ហ៊ុន ម៉ាណែត ដែល​កំពុងជាប់បំពេញបេសកកម្មក្រៅប្រទេស ជូនទៅដល់កងកម្លាំងគ្រប់រូប​ដែលបានលះបង់កម្លាំង​កាយចិត្ត ក្នុងការបំពេញភារកិច្ចប្រចាំនៅភូមិសាស្រ្តទួលខុសត្រូវរបស់ខ្លួនបានល្អប្រសើរ។

ឯកឧត្តម បានបន្ថែមទៀតថា ទាំងសម្តេចតេជោ និងឯកឧត្តម ហ៊ុន ម៉ាណែត តែងតែណែនាំ​ដល់ឯកឧត្តម និងសមាជិកក្រុមគ្រួសារអំពីគុណតម្លៃ​ និងភាពអង់អាចក្លាហានកងទ័ព និងបាន​ផ្តល់ឱកាសក្នុងការហ្វឹកហាត់លុតដំសមត្ថភាព ​និងស្វែងយល់ពីស្មារតី ឆន្ទៈ របស់នាយទាហាន ពលទាហាននៅតាមខ្សែបន្ទាត់ព្រំដែន ការពារទឹកដី និងប្រជាជន។

ឆ្លៀតក្នុងឱកាសនោះផងដែរ ឯកឧត្តម ហ៊ុន ម៉ានី ក៏បានគូសបញ្ជាក់ថា កងទ័ពមិនត្រឹមតែបំពេញ​តួនាទី​ក្នុងវិស័យការពារជាតិតែប៉ុណ្ណោះទេ តែក៏បានចូលរួមការងារសង្រ្គោះប្រជាពលរដ្ឋ​ដែលជួប​គ្រោះមហន្តរាយផ្សេងៗ ​ជាពិសេសក្នុងកាលៈទេសៈដែលក្នុងភូមិសាស្រ្តកំពុងប្រុងជើង​ការ​ចំពោះគ្រោះទឹកជំនន់ផងដែរ។

ឯកឧត្តម ហ៊ុន ម៉ានី ក៏សូមអបអរសាទរ និងកោតសរសើរចំពោះការប្តេជ្ញាចិត្តដ៏មោះមុត​របស់​កង​ពលតូចអន្តរាគមន៍លេខ១៤ ​ក្នុងការការពារបូរណភាពដែនដី ​ការពាររដ្ឋធម្មនុញ្ញ ការពារ​លទ្ធិប្រជាធិបតេយ្យ ការពារព្រះមហាក្សត្រ និងការពាររាជរដ្ឋាភិបាលស្របច្បាប់ដែលប្រសូត​ចេញពីការបោះឆ្នោតឱ្យខាងតែបាន​ ទោះក្នុងតម្លៃណាក៏ដោយ។

ទន្ទឹមនឹងនេះ ក្នុងដំណើរបេសកកម្មមកជួបកងកម្លាំងគ្រប់ប្រភេទប្រចាំយោធភូមិភាគទី៥​ ឯកឧត្តម ហ៊ុន ម៉ានី ​បានធ្វើការបញ្ជាក់ក្នុងគ្រប់ពិធីជូនដល់មេបញ្ជាការ និងកងកម្លាំង ចំពោះការបេ្តជ្ញាគាំទ្រ​បេក្ខភាព ​សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តីនៅអាណត្តិបន្ទាប់ និងគាំទ្រ​បេក្ខភាព​ឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្រ្តីបន្តវេន​នាពេល​អនាគត។

សូមបញ្ជាក់ថា តាមអនុសាសន៍ដ៏ខ្ពង់ខ្ពស់របស់សម្តេចតេជោ ​នាយករដ្ឋមន្រ្តី បានចាត់ឱ្យឯកឧត្តម ហ៊ុន ម៉ានី ​ចុះជួបសំណេះសំណាល និងប្រគល់អាវរងាចែកជូនដល់កងកម្លាំងគ្រប់ប្រភេទ​ប្រចាំ​យោធភូមិភាគទី៥ ​នៅតាមបញ្ជាការដ្ឋានទិសទាំង៣។

ក្នុងនោះ ឯកឧត្តម​ ក៏បាននាំយកមកជាមួយបន្ថែមនូវស្បៀងអាហារ​ និងសម្ភារៈមួយចំនួនផងដែរ៕អត្ថបទ រដ្ឋា