ព្រះវិហារ៖ ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ និងជាអនុប្រធាន សហភាព​សហព័ន្ធយុវជនកម្ពុជា បានលើកទឹក​ចិត្តដល់ថ្នាក់ដឹកនាំ និង ​សមាជិកសមាជិកា​សហភាព​សហព័ន្ធ​យុវជនកម្ពុជាខេត្តទាំងអស់ ​សូម​បន្ត​សកម្មភាពដោយស្ម័គ្រចិត្ត​ក្នុងការចូលរួម​ការងារមនុស្សធម៌ជួយ​ដល់សង្គមជាតិ ​ជាពិសេសទៅលើការចូលរួមផ្តល់ឈាម ដើម្បីជួយដល់ជនរងគ្រោះដោយ​គ្រោះ​ថ្នាក់ផ្សេងៗ។

នៅរសៀលថ្ងៃទី៨ ខែតុលា ឆ្នាំ២០២២នេះ ក្នុងពិធីសំណេះសំណាលជាមួយថ្នាក់ដឹកនាំនិង​សមាជិក​សមាជិកា​សហភាព​សហព័ន្ធយុវជនកម្ពុជាខេត្ត ​និងប្រកាសទទួលស្គាល់​ សមាសភាពបន្ថែម គណៈកម្មាធិការសហភាពសហព័ន្ធយុវជនកម្ពុជាខេត្តព្រះវិហារ ឯកឧត្តម គីម រិទ្ធី ​ក៏បានប្រគល់​សេចក្ដីសម្រេច ​ជូនដល់អនុប្រធាន​ និងសមាជិក ​សមាជិកា គណៈកម្មាធិការ​សហភាពសហព័ន្ធ​យុវជនកម្ពុជា​ខេត្តព្រះវិហារ ​ដែលទើបបាន​ចេញសេចក្តីសម្រេចទទួលស្គាល់បំពេញបន្ថែម​នាពេលនេះ​ សរុបចំនួន ១៣ រូប។

ពិធីនេះប្រារព្ធធ្វើឡើងនៅអគារសាលាខេត្ត​ក្រោមវត្តមានចូលរួមពីឯកឧត្ដម លោកជំទាវ លោក​លោកស្រី ជាប្រធាន អនុប្រធាន​ព្រមទាំង​សមាជិក​សមាជិកា​សហភាពសហព័ន្ធយុវជនកម្ពុជា​ខេត្តមក​ពីតាមបណ្តាមន្ទីរអង្គភាពនានា​ជុំវិញខេត្ត ​និងក្រុង ស្រុក ទាំង៨ ទូទាំងខេត្តព្រះវិហារជាច្រើនរូប។

ក្នុងនោះដែរ លោក យ៉ុង គឹមហ៊ាន ប្រធានសហភាពសហព័ន្ធយុវជនកម្ពុជាខេត្ត ព្រះវិហារ បានសម្តែងនូវការស្វាគមន៍យ៉ាងកក់ក្តៅបំផុតចំពោះវត្តមានឯកឧត្តម ប្រធានគណៈអធិបតី ព្រមទាំងឯកឧត្តម លោកជំទាវ លោកលោកស្រីជាថ្នាក់ដឹកនាំនិងសមាជិកសមាជិកាដែល​បានចូលរួមក្នុងកម្មវិធីនាពេលនេះ។លោកបានជម្រាបជូនអំពីលទ្ធផលការងារសម្រេចបានដោយសង្ខេបរបស់សហភាពសហព័ន្ធយុវជនកម្ពុជាខេត្តព្រះវិហារនាពេលកន្លងមកជូនអង្គពិធី ដែលមានដូចជាការងារ រៀបចំរចនាសម្ព័ន្ធ ការងារ​ហិរញ្ញវត្ថុ ព្រមទាំងសកម្មភាពការងារពង្រឹងអង្កការចាត់តាំងរបស់សហភាពសហព័ន្ធ​យុវជន​កម្ពុជាខេត្តនិងការលើកតម្កើងកិត្តនាម អត្តសញ្ញាណជាតិ ​ការអភិវឌ្ឍសមត្ថភាពយុវជន និង​ការចូលរួមសកម្មភាពសង្គម ​និងការងារផ្សេងៗ ជាច្រើនទៀត៕