ភ្នំពេញ៖ បណ្តាញអង្គការសមាគមរបស់ IWPGនៅប្រចាំកម្ពុជាសហការជាមួយអាជ្ញាធរមូលដ្ឋាន និងបណ្តាសិស្សានុសិស្ស នៅស្រុកបាទី ខេត្តតាកែវ នៅថ្ងៃទី៩ ខែតុលានេះ បានធ្វើយុទ្ធនា​ផ្សព្វផ្សាយពីសារសំខាន់​នៃការអប់រំសន្តិភាព និងការអប់រំសន្តិភាពជាឧបករណ៍សំខាន់ជួយ​ដល់​ការកាត់បន្ថយភាពកីក្រ ។

បើតាមលោកស្រី ហូយ សុជីវណ្ណី ប្រធានគណៈកម្មាធិការនារីអន្តរជាតិដើម្បីសន្តិភាព IWPGប្រចាំនៅ​កម្ពុជា បានថ្លែងថា ​នៅប្រទេសកម្ពុជា ​បានបញ្ចប់សង្គ្រាម និងមានសុខ​សន្តិភាព​ពេញលេញ​បានចំនួនជាង​ ២៤ឆ្នាំហើយ​ ហើយរហូតមកដល់បច្ចុប្បន្ននេះ អ្វីដែលជាបញ្ហាចោទ​ចំពោះមុខ​នៃគ្រួសារមួយចំនួនដែលនៅ​តែបន្តរងជួប​ភាពក្រីក្រ​ គឺភាគច្រើនកើតចេញពីអំពើហិង្សា​ក្នុងគ្រួសារ ​សកម្មភាពហិង្សានានា ​ជាមួយអ្នកជិតខាង​ ដែលកើតជាជម្លោះ ពីម្នាក់ទៅម្នាក់ ពី​ក្រុមមួយ​ទៅក្រុមមួយទៀត ហើយក៏​មានយុវជនមួយចំនួនដែលតែងបង្កើតអំពើហិង្សា​ក្នុងសហគមន៍ សាលារៀន និងនៅតាមទីធ្លាសាធារណៈជាដើម។

ក្រុមគ្រូបង្រៀន និងសិស្សានុសិស្សវិទ្យាល័យ ប៊ុនរ៉ានី ហ៊ុន សែនបាទី បានចាត់ទុកថា ការអប់រំ​សន្តិភាព​ជាឧបករណ៍សំខាន់ជួយដល់ការកាត់បន្ថយភាពក្រីក្រនេះ គឺមានសារៈសំខាន់សម្រាប់​សង្គម​និងប្រទេសគ្រប់សម័យកាល ​ជាពិសេសមានការអប់រំល្អសម្រាប់គ្រួសារកំពុងស្ថិតក្នុង​ស្ថានភាព​ក្រីក្រ ​និងការក្រើនរំលឹក គ្រួសារ​ មនុស្សទូទៅនានា បន្តរួមគ្នាថែរក្សាតម្លៃសន្តិភាព​ជម្រុញ​ប្រទេសជាតិមានការរីកចំរើន។

អនុវត្តតាមណែនាំរាជរដ្ឋាភិបាលលោក អ៊ូ សុខជា ​ប្រធានក្រុមប្រឹក្សាស្រុកបាទី​ ថ្លែងថា បច្ចុប្បន្ន​អាជ្ញាធរមូលដ្ឋានគ្រប់លំដាប់ថ្នាក់ ​បាននិងកំពុងខិតខំប្រឹងប្រែងកសាងសន្តិភាព រៀបចំ​សន្តិសុខសណ្តាប់ធ្នាប់សង្គម​ និងកាត់បន្ថយភាពក្រីក្រពលរដ្ឋយ៉ាងសកម្ម តាមរយៈការពង្រឹង​វិធាន​ការអនុវត្តច្បាប់ ​បង្រ្កាបអំពើជួញដូរមនុស្ស បង្រ្កាបគ្រឿងញៀន ​បង្រ្កាបល្បែងស៊ីសង ទប់ស្កាត់​អំពើ​ហិង្សានៅក្នុងសង្គម​ និង​គ្រួសារជាដើម​ ដើម្បីជម្រុញជីវភាពការរស់នៅពលរដ្ឋ​មាន​ការ​រីក​ចំរើន៕អត្ថបទ ស៊ុម សុខជា