កំពង់ធំ៖ អាជ្ញាធរខេត្តកំពង់ធំ ចុះចែកជូនគ្រឿងឧបភោគបរិភោគដល់ប្រជាពលរដ្ឋ ដែលរងផលប៉ះពាល់ដោយទឹកជំនន់ និងកំពុងត្រូវស្បៀងអាហារជួយទ្រទ្រង់ជីវភាពប្រចាំថ្ងៃ ដល់ខ្នងផ្ទះ។

នៅថ្ងៃទី៩ខែតុលា ឆ្នាំ២០២២, លោក ងួន រាសី អភិបាលរងខេត្តកំពង់ធំ ដឹកនាំសហការីចែកជូន គ្រឿងឧបភោគបរិភោគដល់ប្រជាពលរដ្ឋតាមខ្នងផ្ទះនៅសង្កាត់ស្រយ៉ូវ ក្រុងស្ទឹងសែន ចំនួន៣០គ្រួសារ។

ក្នុងឱកាសនោះដែរលោក លើកឡើងថា អំណោយទាំងអស់នេះ គឺជាអំណោយរបស់សប្បុរសជន​រួមគ្នា ផ្តល់ជូនបងប្អូនប្រជាពលរដ្ឋ ​ដែលរងផលប៉ះពាល់ដោយសារទឹកជំនន់ និងកំពុង​ត្រូវការ​ជាចាំបាច់នូវគ្រឿង​ ឧបភោគបរិភោគ ដើម្បីជួយទ្រទ្រង់ជីវភាពប្រចាំថ្ងៃ។

លោកបន្តថា បើទោះបីជាស្បៀងអាហារដែលទទួល បានមិនអាចជួយជីវភាពទាំងស្រុងក៏ពិតមែន, ប៉ុន្តែក៏អាចសម្រាលដល់ការលំបាកបានមួយគ្រាផងដែរ។ ហើយការចូលរួម​ជួយគ្នា​ក្នុងគ្រា​ក្រលំបាក​នេះ ​គឺកិច្ចការងារចំបាច់បំផុត ​ដែលប្រមុខរាជរដ្ឋាភិបាល តែងតែ មានប្រសាសន៍​លើក​ឡើង​គ្រប់ទីកន្លែង ​ឲ្យអាជ្ញាធរគ្រប់លំដាប់ថ្នាក់យកចិត្តទុកដាក់បំផុត ដោយមិនទុកឲ្យ ប្រជាពលរដ្ឋ​ណាម្នាក់អត់ស្បៀងអាហារមិនមានការជួយជ្រោមជ្រែងពីអាជ្ញាធរនោះឡើយ។ ​ទាំងអស់នេះ បាន​ឆ្លុះបញ្ចាំង​ពីការយកចិត្តទុកដាក់​ គិតគូរ​ពីសុខទុក្ខរបស់បងប្អូន​ប្រជាពលរដ្ឋគ្រប់ទីកន្លែង ដោយ​មិន​រើសអើង​ជាតិសាសន៍ និងនិន្នាការនយោបាយ។

លោកបន្ថែមថា ​ក្រៅអំណោយចែកជូន ​ប្រជាពលរដ្ឋ ​ដល់ខ្នងផ្ទះនៅពេលនេះ ​សប្បុរសជន ក៏ផ្តល់​ជូនអង្ករដល់គណៈកម្មការគ្រប់គ្រង់គ្រោះ ​មហន្តរាយខេត្តកំពង់ធំ ​ចំនួន៦តោន ដើម្បីទុកសម្រាប់សកម្មភាពអាជ្ញាធរចុះជួយប្រពលរដ្ឋដែលខ្វះខាតបន្តទៀត។

ក្នុងនាមអាជ្ញាធរខេត្តកំពង់ធំ ​លោកសូមថ្លែងអំណរគុណ​ ចំពោះទឹកចិត្តសប្បុរសធម៌ដ៏ថ្លៃថ្លា ស្ដែង​ឲ្យឃើញអំពីការ​គិតគូរ ​និងក្តីអាណិតស្រលាញ់ ​ចំពោះជនរួមជាតិ ​ដោយឈរលើបុព្វហេតុជាតិ សាមគ្គី​ជាធ្លុងមួយ ​ដោយស្មារតីជួយគ្នា នៅក្នុងកាលៈទេសៈ ​ដែលប្រទេសជាតិកំពុង ជួប​ប្រទះ​គ្រោះទឹកជំនន់ ​និងសូមឲ្យប្រជាពលរដ្ឋទាំងអស់ ​កំពុងជួយបញ្ហាប្រឈម ​សូមថែរក្សាសុខភាព ការពារ​ក្មេងតូចៗ ​កុំឲ្យមាន​គ្រោះថ្នាក់​ដោយសារលង់ទឹក ​និង​បាត់បង់អាយុជីវិតដោយ​សត្វអាច​សាហាវទិច ឬខាំជាដើម៕