បន្ទាយមានជ័យ៖ ក្នុងដំណើរបេសកកម្មបន្ទាន់តបតាមបទបញ្ជារបស់សម្តេចតេជោ ហ៊ុន សែន នាយករដ្ឋមន្រ្តី ជុំវិញការស្តារដំណាំស្រូវខូចខាតដោយទឹកជំនន់ឯកឧត្តមទេសរដ្ឋមន្រ្តី គន់ គីម អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយ នៅថ្ងៃទី៩ ខែតុលា ឆ្នាំ២០២២ ចាប់បានជួបពិភាក្សាជាមួយអាជ្ញាធរ និងមន្ទីរជំនាញតាមបណ្តាខេត្តជាប់បឹងទន្លេសាប រួមមាន៖ កំពង់ធំ បន្ទាយមានជ័យ និងសៀមរាប។

ក្នុងបេសកកម្មបន្ទាន់នេះ ឯកឧត្តម ទេសរដ្ឋមន្រ្តី មានប្រសាសន៍ថា តបតាមអនុសាសន៍​របស់​សម្តេចតេជោ ហ៊ុន សែន នាយករដ្ឋមន្រ្តី តាមរយសារសំឡេងកាលពីថ្ងៃទី៨ ខែតុលា ឆ្នាំ២០២២ ស្តីពីការត្រួតពិនិត្យលើផលប៉ះពាល់ដំណាំស្រូវ និងដំណាំរួមផ្សំដែលខូចខាតដោយទឹកជំនន់ គឺចាំ​បាច់ត្រូវធ្វើការប្រមូលទិន្នន័យ និងភាពជាក់ស្តែងនៃការបង្កបង្កើន​ផលរបស់ប្រជាកសិករ​ក្នុងគ្រួសារនីមួយៗ។

ឯកឧត្តមទេសរដ្ឋមន្រ្តី ថ្លែងថា បេសកកម្មនាពេលនេះ ត្រូវផ្តោតសំខាន់លើចំណុចសំខាន់ពីរ រួមមាន៖ ទី១ត្រូវស្រង់ទិន្នន័យពីការផលប៉ះពាល់ដំណាំរបស់ប្រជាកសិករ និងទី២ ពិនិត្យអំពី​លទ្ធភាព​លើផ្ទៃដីរបស់ប្រជាពលរដ្ឋដែលអាចបង្កបង្កើនផលអាស្រ័យទៅតាមភូមិសាស្រ្តដី និងប្រភពទឹកធានាដល់ការស្រោចស្រព។

ឯកឧត្តម ទេសរដ្ឋមន្រ្តី បានណែនាំដល់មន្ទីរកសិកម្មខេត្ត និងមន្ទីរធនធានទឹក និងឧតុនិយមខេត្ត ចាំបាច់​ត្រូវសហការគ្នាសិក្សាឱ្យបានម៉ត់ចត់អំពីភូមិសាស្រ្តនីមួយៗ ដែលត្រូវស្តារឡើងវិញ ក្នុងពេល​ស្ថានភាពអាកាសធាតុបន្តប្រឈម និងអាចអូសបន្លាយរងគ្រោះដោយទឹកជំនន់។

យ៉ាងណាមិញឯកឧត្តម ទេសរដ្ឋមន្រ្តី បញ្ជាក់ថា ទោះបីស្ថិតក្នុងកាលៈទេសៈណា ក៏ត្រូវ​​សិក្សា​អំពីការស្តារ និងផ្តល់ពូជស្រូវជូនប្រជាកសិករណា​ដែលទឹកជំនន់បានស្រកឱ្យចាប់ផ្ដើម​ស្តារមុនគេ ដើម្បី​ធានាជីវភាពរបស់បងប្អូនប្រជាកសិករមិនប៉ះពាល់ធ្ងន់ធ្ងរជាងនេះ។

តាមរយៈបេសកកម្មមួយថ្ងៃក្នុងខេត្ត៣ ក្នុងនោះ ខេត្តកំពង់ធំគ្រោង នឹងស្តារឡើងវិញ​ដែល​ខូចខាតទំហំ ៩ពាន់ហិកតា ស្មើនឹងជាង ១ម៉ឺនគ្រួសារ ។ ខេត្តសៀមរាបមានដំណាំស្រូវ ប៉ះពាល់ ៣២,៤៦៥ហិកតា ស្មើនឹង ២៥,៦២៣គ្រួសារ ដោយដំណាំស្រូវខូចខាតមាន ២,៧៨៣ហិកតា ខណៈទំហំការខូចខាតនេះគ្រោងធ្វើការស្តារឡើងជំហានដំបូង ១,៥០០ហិកតា ខណៈខេត្តបន្ទាយមានជ័យ ស្រូវដែលគ្រោងស្តារមាន ១៥,០០០ហិកតា ៕

អត្ថបទ៖ សេក ឧត្តម