​ថៃ៖ ក្រុម​អ្នកសារព័ត៌មាន CNN ២​នាក់​ត្រូវបាន​ចាប់ខ្លួននៅក្នុង​ទីក្រុង Udon Thani ពីបទ​បំពាន​ច្បាប់​ចូល​ក្នុង​ទីតាំង​ប្រព្រឹត្ត​ឧក្រិដ្ឋកម្មនៅ​កន្លែងកើតហេតុ​សម្លាប់រ​ង្គា​ល​ក្នុង​ខេត្ត Nong Bua Lamphu ​ប្រទេស​ថៃ​កាលពី​ថ្ងៃអាទិត្យ​។

​អ្នកសារព័ត៌មាន​ជនជាតិ​អូស្ត្រាលី អ្នកស្រី Anna Coren វ័យ ៤៧​ឆ្នាំ​ដែល​បាន​រាយការណ៍​ពី​ខាង​ក្នុង​មណ្ឌល​ថែទាំ​កុមារ និង​កាមេរ៉ា​មែន​ជនជាតិ​អង់គ្លេស​របស់​អ្នកស្រី​គឺ​លោក Daniel Hodge​ វ័យ ៣៤ឆ្នាំត្រូវ​បាន​នាំ​ខ្លួន​ទៅកាន់​ប៉ុស្តិ៍​នគរបាល Na Klang ដែល​មាន​មាន​សិទ្ធិ​អំណាច​លើ​កន្លែង​កើត​ហេតុ​ឧក្រិដ្ឋកម្ម​។ ​ការ​ចាប់​ខ្លួន​នេះ​មាន​ឡើងបន្ទាប់ពី​ប្រធាន​អង្គការ​រដ្ឋបាល​ឃុំ Uthai Sawan លោក Danaichoke Boonsom បាន​ដាក់​ពាក្យបណ្ដឹង​ប្រឆាំង​ក្រុមហ៊ុន​បណ្ដាញ​សារព័ត៌មាន CNN នៅប៉ុស្តិ៍​នគរបាល ​Na Klang​។ ​លោក Danaichoke បាន​និយាយ​ថា ​សារព័ត៌មាន CNN បាន​បំពាន​យ៉ាង​ធ្ងន់ធ្ងរ​លើ​ច្បាប់​តំបន់ ពិសេស​សាច់ញាតិ​របស់​ក្រុម​ជនរងគ្រោះ​។​

សារព័ត៌មាន CNN បាន​ផ្សព្វផ្សាយ​រូបភាព​ក្រាហ្វិក​ពី​មណ្ឌល​ថែទាំ​កុមារ ដែល​ធ្វើ​ឲ្យ​ផ្ទុះ​កំហឹង​ជា​សាធារណៈ និង​ការ ចោទប្រកាន់​ពី​សារព័ត៌មាន​ថៃ​ថា បាន​បំពាន​លើ​ក្រមសីលធម៌​អ្នកសារព័ត៌មាន​។ ​នគរបាល​ថៃ​កំពុង​ស៊ើបអង្កេត​ពី​របាយការណ៍​មួយ​ដែល​ថា ក្រុមការងារ​សារព័ត៌មាន CNN បាន​ចូល​ទៅ​ក្នុង​ទីតាំង​ប្រព្រឹត្តិ​ឧក្រិដ្ឋកម្ម​នៅ​មណ្ឌល​ថែទាំ​កុមារ​ពេល​ថ្ងៃ ជាទី​ដែល​សិស្ស​មត្តេយ្យ​ជាង ​២០​នាក់​បាន​ស្លាប់ ​ខណៈ​ពួកគេ​កំពុង​ឈរ​រាយការណ៍​ពី​ការវាយប្រហារ​នោះ៕

អត្ថបទ៖ សុខមាន