ភ្នំពេញ៖ ក្រសួងផែនការបានបើកវគ្គបណ្តុះបណ្តាលគ្រូបង្គោលសម្រាប់អង្កេតកសិកម្មកម្ពុជា ឆ្នាំ​២០២២ ដើម្បីបានទិន្នន័យយកទៅរៀបចំគោលនយោបាយកសិកម្ម និងការសម្រេចចិត្តជា​យុទ្ធសាស្ត្រ​លើក​កម្ពស់កម្រិតជីវភាពប្រជាពលរដ្ឋ ​និងសេដ្ឋកិច្ចគ្រួសារកសិកម្ម។

ឯកឧត្តមកត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ នៅថ្ងៃទី១០ ខែតុលានេះ មានប្រសាសន៍ថា ការចុះប្រមូលទិន្នន័យអង្កេតកសិកម្មប្រចាំសម្រាប់ឆ្នាំ២០២២នេះ គឺជាព័ត៌មាន​ដែលមានតម្រូវការចាំបាច់មិនអាចខ្វះបាន ​ដើម្បីធ្វើ​បច្ចុប្បភាពទិន្នន័យកសិកម្មជាស៊េរី ដែល​ឆ្លុះ​បញ្ចាំង​អំពី​ទិន្នន័យព័ត៌មានផែ្នកបច្ចេកទេសកម្ពុជា​ បរិស្ថាន សេដ្ឋកិច្ចនិងសង្គម​ កសិកម្ម កម្លាំង​ពលកម្ម ក្នុងវិស័យកសិកម្ម ​ព័ត៌មានសន្តិសុខស្បៀងនៃគ្រួសារកសិកម្ម និងប្រភេទលក្ខណៈនៃ​រចនាសម្ព័ន្ធជាដើម។

ឯកឧត្តមទេសរដ្ឋមន្ត្រី ឆាយ ថន បន្តថា ការធ្វើបច្ចុប្បន្នភាព​ទិន្នន័យ​ស្ថិតិកសិកម្ម ប្រចាំឆ្នាំនេះគឺមាន​តម្រូវការប្រើប្រាស់កើនឡើងជាលំដាប់​ សម្រាប់អ្នកប្រើប្រាស់ពីបណ្តាក្រសួង ស្ថាប័ន​នៃរាជរដ្ឋាភិបាលកម្ពុជា ​សហគមន៍​ជាតិអន្តរជាតិ ដើម្បីធ្វើជាមូលដ្ឋានគ្រឹះនៃធាតុចូល សម្រាប់ការ​រៀបចំ​គោលនយោបាយអភិវឌ្ឍន៍វិស័យកសិកម្ម និងគោលនយោបាយអភិវឌ្ឍន៍សេដ្ឋកិច្ច បរិស្ថាន និងសង្គមកិច្ចកាន់តែប្រសើរ។

ឯកឧត្តម ឃិន សុង អគ្គនាយករងវិទ្យាស្ថានស្ថិតិ ថ្លែងថា គ្រូបង្គោលទទួលបានការបណ្តុះបណ្តាល​អង្កេតកសិកម្មកម្ពុជាឆ្នាំ២០២២នេះ ចំនួន៩២រូបមកពីក្រសួងផែនការ ​ក្រសួងកសិកម្ម រុក្ខាប្រមាញ់ និងនេសាទ​ វិទ្យាស្ថានស្ថិតិ នឹងត្រូវផ្ទេរចំណេះដឹង​ របៀបនៃការចុះប្រមូលព័ត៌មានទិន្នន័យ ជូន​មន្ត្រីចុះសំភាសន៍ជាង៤០០នាក់នៅតាមមូលដ្ឋានទូទាំងប្រទេស២៥រាជធានីខេត្ត។

សូមបញ្ជាក់ថា ​នៅក្នុងដំណើរការចុះអង្កេតចន្លោះជំរឿនកសិកម្មកម្ពុជា​ ឆ្នាំ២០២២នេះ នឹងធ្វើក្រោម​ប្រធានបទជាច្រើន រួមមាន៖១ ​ស្ថានភាពកសិកម្ម ដំណាំដាំដុះ ២. បសុបក្សា បក្សី ៣. វារីវប្បកម្ម និងនេសាទ ៤. សកម្មភាពសេដ្ឋកិច្ចគ្រួសារកសិកម្ម ៥. ស្ថានភាពគ្រួសារកសិកម្មនៅតាមតំបន់នានា ៦.កម្លាំងពលកម្ម ​ក្នុងវិស័យកសិកម្ម និង៧. សកម្មភាពសេដ្ឋកិច្ចគ្រួសារកសិកម្មជាដើម ដែលនឹង​ចុះសាកសួរលើគ្រួសារកសិកម្មប្រមាណ ១៦ ០០០គ្រួសារ និងសហគ្រាសខា្នតតូចធំប្រមាណ ៥០០ កសិដ្ឋាន៕ អត្ថបទ ស៊ុមសុខជា