កោះកុង៖ ប្រជាពលរដ្ឋ និងអ្នកទេសចរមកពីទីជិតឆ្ងាយ រមែងរំលង​ការចូលទស្សនា​បន្ទប់​សារមន្ទីរវប្បធម៌ខេត្តកោះកុង ​គឺមានតែសិស្សានុសិស្សតិចតួចប៉ុណ្ណោះ​ បានចូលស្វែងយល់ដឹង។ នេះបើតាមការឱ្យដឹងរបស់​ ប្រធានការិយាល័យសារមន្ទីរនៃមន្ទីរវប្បធម៌ និងវិចិត្រសិល្បៈខេត្ត។

ក្នុងមួយសប្តាហ៍ មានមនុស្សមិនលើសពី១៥នាក់នោះទេ​ ដែលភាគច្រើនជាសិស្សានុសិស្ស ក្នុង ក្រុងខេមភូមិន្ទ ​បានចាប់អារម្មណ៍ចូលទស្សនាស្វែងយល់ដឹងពីប្រវត្តិវត្ថុបុរាណ ដែលដាក់តាំង​ក្នុងបន្ទប់​ សារមន្ទីរវប្បធម៌ខេត្តកោះកុង។

លោក ម៉ាក សេ ប្រធានការិយាល័យសារមន្ទីរ នៃមន្ទីរវប្បធម៌ និងវិចិត្រសិល្បៈ ខេត្តកោះកុង បានឱ្យដឹងថា ​ភាពខ្សត់ចំនួនអ្នកចូលទស្សនាសារមន្ទីរនេះ ​ក៏ព្រោះតែកង្វះការផ្សព្វផ្សាយពីភាគី​ពាក់ព័ន្ធទៅកាន់សាធារណជន និងម៉្យាងទៀត ​ក្រុមការងារ ​មិនទាន់បានរកឃើញវត្ថុបុរណ ឬរបក​គំហើញថ្មី ​សម្រាប់ដាក់តាំងបង្ហាញបន្ថែម។

លោក ម៉ាក សេ បានឱ្យដឹងទៀតថា បន្ទប់សារមន្ទីរ ដែលនៅក្បែរទីលានទាត់បាល់ខេត្តសព្វថ្ងៃ វា ពុំមែនជា​អគារស្ដង់​ដារសារមន្ទីរនោះទេ​ ទើបនាំឱ្យការរៀបចំមិនទាន់ត្រឹមត្រូវស្អាតល្អ ដើម្បីបង្កើន​ភាពទាក់ ទាញអ្នកទស្សនា ​បើធៀបនឹងសារមន្ទីរតាមបណ្តាខេត្តផ្សេងៗ ។

គ្រាគ្មាន​អគារសារមន្ទីរនេះ លោក ម៉ាក សេ បានស្នើដល់ក្រសួងវប្បធម៌​ និងវិចិត្រសិល្បៈ មេត្តា ផ្តល់​ជំនួយឧបត្ថម្ភជាអគារសារមន្ទីរថ្មីមួយ ​សមស្របតាមបទដ្ឋានបច្ចេកទេសបេតិកភណ្ឌវប្បធម៌ សម្រាប់ ​ដាក់តាំងថែក្សាវត្ថុបុរណ និងរូបចម្លាក់ ​ដែលនៅសេសសល់។

ពាក់ព័ន្ធបញ្ហានេះ លោកស្រី ឈី វ៉ា អភិបាលរងខេត្តកោះកុងទទួលបន្ទុកផ្នែកវប្បធម៌ ​បានឱ្យដឹង ថា លោកស្រី ​នឹងពិនិត្យក្តោបព័ត៌មានលើបញ្ហានេះ​ ឱ្យបានគ្រប់គ្រាន់ជាមុនសិន ទើបឆ្លើយតបថា​នឹងរិះរក ​យន្តការដោះស្រាយ និងគាំទ្រជ្រោមជ្រែងផ្សព្វផ្សាយបែបណាខ្លះ។

សូមបញ្ជាក់ថា ​វត្ថុបុរាណ ដែលកំពុងដាក់តាំងបង្ហាញនៅក្នុងបន្ទប់សារមន្ទីរវប្បធម៌ខេត្តកោះកុង មានដូចជា​ ក្តារសំពៅលិចនៅកោះស្តេច ស្រុកគិរីសាគរ ក្តារមឈូសបុរាណនៅតំបន់​ទេសចរណ៍​ជីផាត ឧបករណ៍ភ្លេងបុរាណរបស់ជនជាតិភាគតិចរស់នៅតំបន់អារ៉ែង​ ស្រុកថ្មបាំង ភ្លុកដំរី កាំភ្លើងសម័យបុរាណ​ ក្រឡដាក់អង្ករ អំបិល និងឧបករណ៍ពិសារស្លារម្លូ ។ល៕ អត្តបទ៖ ឈឹម មករា