កំពង់ឆ្នាំង៖ តាមការបញ្ជាក់ពីលោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និង​នេសាទ​ខេត្ត​កំពង់ឆ្នាំង នាថ្ងៃទី១០ ខែតុលា ឆ្នាំ២០២២នេះថា ស្រូវបង្កើន​រដូវ​រប​ស់​ប្រជាកសិករ​ប្រមាណជាង​២០០ហិកតា នៅ​ក្នុងស្រុកចំនួនចំនួន៤ នៃខេត្តកំពង់ឆ្នាំង បានទទួល​រងផល​ប៉ះពាល់​ពីជំនន់​ទន្លេសាប គិតចាប់ពីថ្ងៃទី០៤ ដល់ថ្ងៃទី០៨ ខែតុលា ឆ្នាំ២០២២នេះ ។ ចំណែកទឹកទន្លេសាប នៅ​ឡើងជាបន្តបន្ទាប់នៅឡើយ។

 លោក ងិន ហ៊ុន បានបន្តថា៖ នៅក្នុងខេត្តកំពង់ឆ្នាំង ស្ថានភាព​ដំណាំស្រូ​វ​ប៉ះ​ពាល់​ដោយ​ទឹក​ជំនន់​ទន្លេសាប គិតចាប់ពីថ្ងៃទី០៤ ដល់ថ្ងៃទី០៨ ខែតុលា ឆ្នាំ២០២២ ដំណាំស្រូវបង្កើនរដូវ បាន​រងផលប៉ះពាល់សរុបចំនួន២០៣ ហិកតា ក្នុងនោះមាន៖ ១-ស្រុកបរិបូណ៌ រងផល​ប៉ះពាល់​ចំនួន​៤៩​ហិកតា ក្នុងនោះមានឃុំពន្លៃ៨ហិកតា, ឃុំផ្សារ ១៩ហិកតា, និងឃុំខុនរ៉ង២២ហិកតា។ ២-ស្រុកជលគីរីបានរងផលប៉ះពាល់ចំនួន ៣០ហិកតា មាននៅក្នុងឃុំព្រៃគ្រី៣០ហិកតា, ភូមិពារ និងភូមិតាកាន់ ។ ៣-ស្រុកកំពង់ត្រឡាច បានរងផលប៉ះពាល់ចំនួន៧៧ហិកតា ក្នុង​នោះ​ឃុំ​សែប​៦៧ហិកតា, និងតាជេសចំនួន ១០ហិកតាផងដែរ។ ៤-ស្រុករលាប្អៀរ​បាន​រង​ផល​ប៉ះពាល់​ចំនួន​៤៧ហិកតា ក្នុងនោះមានឃុំគោកបន្ទាយចំនួន៤៧ហិកតា, ភូមិកងមាសចំនួន២៩ហិកតា និង​ភូមិ​ចុង​ឈើត្រាចចំនួន ១៨ហិកតា។ ទឹកទន្លេជន់លិចជារៀងរាល់ថ្ងៃបែបនេះ ​នាំ​អោយ​បរិមាណ​ស្រូវ​អាច​កើនឡើងថែមទៀត។

 លោកបានបន្តថា ទឹកទន្លេសាបឡើងធំឆ្នាំនេះ ដោយសារមានរបប២យ៉ាងគឺ ទឹកទន្លេ​មេគង្គ​ដែល​បាន​ហូរចូលមកក្នុងបឹងទន្លេសាប និងមួយ​ទៀត​ទឹក​ភ្លៀង​ដែល​ហូរ​មក​ពីតាម​បណ្តា​ខេត្ត​មួយ​ចំនួ​ន​នៅជុំវិញបឹងទន្លេសាប ធ្វើអោយដំណាំស្រូវបង្កើនរដូវប្រជាកសិករជាង២០០ហិកតា ត្រូវ​រង​ផល​ប៉ះពាល់ ។ ទឹកទន្លេសាបឆ្នាំ២០២២នេះបានឡើងដល់ជិត១០ម៉ែត្រ ដែលធ្វើអោយ​ទំនាប​ទាំង​អស់​នៅតាមមាត់ទន្លេសាប ត្រូវបានលិចអស់ ដែលកត្តានេះ ប្រជាពលរដ្ឋ​ដែល​មាន​លំ​នៅ​ដ្ឋាន​ជាប់​មាត់ទន្លេ ឬនៅតាមទំនាបទន្លេ ត្រូវតែ​ប្រុង​ប្រយ័ត្ន​អោយ​បាន​ខ្ពស់​ចំពោះ​កូន​ចៅ​របស់​ខ្លួន​។

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានជំរុញឱ្យក្រុមមន្ត្រី ទាំងគណៈកម្មាធិការ​គ្រប់គ្រង​គ្រោះ​មហន្តរាយខេត្តកំពង់ឆ្នាំង, អាជ្ញាធរមានសមត្ថកិច្ច ជួយអន្តរាគមន៍ ដោះស្រាយ​បញ្ហា​ដែល​បណ្តាលមកពីជំនន់ទឹកទន្លេសាប ដោយត្រៀមបម្រុងនូវស្រូវពូជ និងមាន​វិធាន​ការ​ឆ្លើយ​តប​ឱ្យបានទាន់​ពេលវេលា​ប្រកប​ដោយ​ប្រសិទ្ធភាព​សំដៅ​កាត់​បន្ថ​យ​ផលប៉ះពាល់​ឱ្យ​នៅ​កម្រិត​ទាប​បំផុត និងជាពិសេស សង្គ្រោះអាយុជីវិតមនុស្ស ព្រមទាំងជួយ​សម្រួស​ដល់​ការ​បង្ក​បង្កើ​ន​ផល ទាំងបច្ចេកទេស និងពូជដំណាំផ្សេងៗផងដែរ៕ អត្ថបទ៖ ហុង វាស្នា