បាត់ដំបង៖ មនុស្សរាប់ម៉ឺននាក់បានចូលរួមទស្សនាកម្សាន្ត ក្នុងពិធីបុណ្យអុំទូកក្នុងខេត្តបាត់ដំបង ជាមួយនឹងការបង្ហាញនូវភាពសប្បាយរីករាយ បន្ទាប់ពីខកខានធ្វើពីធីនេះ រយៈពេល២ឆ្នាំ ដោយសារបញ្ហាជំងឺកូវីដ-១៩ ។

របាយការណ៍របស់មន្ទីរទេសចរណ៍ ខេត្តបាត់ដំបង បានឱ្យដឹងថា​ ភ្ញៀវទេសចរ ដែលចូលរួម កម្សាន្តក្នុងឱកាសពិធីអុំទូកចេញព្រះវស្សា នៅថ្ងៃទី១ ត្រូវនឹងថ្ងៃទី០៩ ខែតុលានេះ មានចំនួនជាង ៦ម៉ឺននាក់ ក្នុងនោះភ្ញៀវទេសចរអន្តរជាតិ (ទេសចរផ្ទៃក្នុង) ​មានចំនួន៨៩នាក់។

ប្រជាពលរដ្ឋ ​បានលើកឡើងថា​ ការរៀបចំពិធីបុណ្យអុំទូកឡើងវិញ ​បានបង្កភាពសប្បាយរីករាយ យ៉ាងខ្លាំងដល់ពលរដ្ឋ ។

ក្នុងពិធីបើកការប្រណាំងទូក កាលពីម្សិលមិញ ឯកឧត្តម សុខ លូ ​អភិបាលខេត្តបាត់ដំបង បានឱ្យដឹងថា​ ពិធីបុណ្យអុំទូកឆ្នាំនេះ មានទូកជាច្រើនប្រភេទចូលរួមប្រកួត​ ចំនួន៣៥ទូក និង​មានកីឡាករ និងកីឡាការិនីចំនួនជាង ១ពាន់នាក់ ដោយមានការរៀបចំសន្តិសុខ​សណ្ដាប់ធ្នាប់​ជូនពលរដ្ឋ ពីសំណាក់កងកម្លាំងនៅតាមគោលដៅនីមួយៗ ​និងកងកម្លាំងចល័ត ។

ឯកឧត្តម អភិបាលខេត្ត បានអំពាវនាវដល់ប្រជាពលដ្ឋ ​ដែលចូលរួមទស្សនាកម្សាន្តបុណ្យអុំទូក ត្រូវទុកដាក់សំរាមឱ្យបានត្រឹមត្រូវ ​នៅក្នុងធុងសំរាម ​ដែលអាជ្ញាធរបានរៀបចំរួចរាល់ រួមទាំង​ត្រូវបើកបរ​ គោរពច្បាប់ចរាចរណ៍ឱ្យបានគ្រប់គ្នា ​ដើម្បីឱ្យពិធីបុណ្យអុំទូកនៅបាត់ដំបង បាន​ប្រព្រឹត្តទៅដោយរលូន និងមានការសប្បាយរីករាយគ្រប់ៗគ្នា ៕អត្ថបទ៖ នឿត សុភ័ក្រ្ត