កំពង់ឆ្នាំង៖ នៅថ្ងៃទី១១ ខែតុលា ឆ្នាំ២០២២នេះ កម្ពស់ទឹកទន្លេសាបនៅក្នុងខេត្តកំពង់ឆ្នាំង បានកើន​ដល់កម្ពស់៩,៨៨ម ហើយកម្រឹតទឹកប្រកាសអាសន្នមានកម្ពស់១១ម នេះបើយោង​តាមការ​បញ្ជាក់​អោយដឹងពីលោក ដោក ប៊ុនថុន ប្រធានមន្ទីរធនធានទឹក និងឧតុនិយមខេត្តកំពង់ឆ្នាំង នៅថ្ងៃទី១១ ខែតុលា ឆ្នាំ២០២២នេះ។ ដោយឡែកលោក ងិន ហ៊ុន ប្រធានមន្ទីរកសិកម្ម រុក្ខាប្រម៉ាញ់ និង​នេសាទខេត្តកំពង់ឆ្នាំងថា ជំនន់ទន្លេបានធ្វើអោយស្រូវស្រាលបង្កើនរដូវ​ប្រជាពលរដ្ន​ប្រមាណ៧៩៩,២០ហិកតា រងផលប៉ះពាល់ នៅក្នុងស្រុកទាំង៥។

លោក ដោក ប៊ុនថុន បានបន្តថា៖ ទឹកទន្លេសាបឆ្នាំ២០២២នេះ គឺមានកម្ពស់៩,៨៨ម ខ្ពស់ជាង​ទឹក​នៅឆ្នាំ២០២១ប្រវែង ២,៦៣ម ដែលនៅឆ្នាំ២០២១ទឹកមានកម្ពស់ត្រឹមតែ៧,២៥មតែប៉ុណ្ណោះ។ ប្រសិនបើទឹកទន្លេសាប នៅតែបន្តឡើងឥតឈប់បែបនេះនៅប្រមាណជាង១អាទិត្យទៀត ទឹកនឹ​ងឡើងដល់ចំណុចប្រកាសអាសន្នហើយ។ នៅតាមតំបន់ជួរភ្នំ ក៏ដូចជាវាលទំនាបមួយចំនួន ភ្លៀងនៅតែបន្តធ្លាក់ ដែលកត្តានេះ ក៏អាចធ្វើអោយជំនន់ទឹកទន្លសាបហក់ឡើងទៀតផងដែរ។ នៅថ្ងៃទី១០ ខែតុលា ឆ្នាំ២០២២ម្សិលមីញ ភ្លៀងបានធ្លាក់រាយប៉ាយ​នៅក្នុងស្រុកទាំង៥​របស់​ខេត្តកំពង់ឆ្នាំង ក្នុងនោះស្រុកទឹកផុសទទួលបានទឹកភ្លៀងកម្រឹត៧៩,៨មម។

នៅថ្ងៃទី១១ ខែតុលា ឆ្នាំ២០២២នេះលោក ងិន ហ៊ុន ប្រធានមន្ទីរកសិកម្ម រុក្ខាប្រម៉ាញ់ និង​នេសាទខេត្តកំពង់ឆ្នាំង បានបញ្ជាក់បន្ថែមថា៖ ខេត្តកំពង់ឆ្នាំង គិតត្រឹមថ្ងៃទី១១ ខែតុលា ឆ្នាំ២០២២នេះ ស្រូវស្រាលបង្កើនរដូវរបស់បងប្អូនប្រជាកសិករ បានរងផលប៉ះពាល់​ដោយ​សារទឹកជំនន់ទន្លេសាបសរុបចំនួន៥ស្រុក ស្មើនឹង១៩ឃុំ សរុបផ្ទៃដីប៉ះពាល់ចំនួន ៧៩៩,២០ហិកតា ស្មើនឹង១៤៦២គ្រួសារ ។ ក្នុងនោះ ១.ស្រុកបរិបូណ៌ រងផលប៉ះពាល់ ៦ឃុំ (ពន្លៃ ខុនរ៉ង ផ្សារ មេលំ ចក ត្រពាំងចាន់) ចំនួន២៥៤ហិកតា ស្មើនឹង ៤៨១គ្រួសារ។ ស្រុកកំពង់លែង រងផលប៉ះពាល់ ៥ឃុំ (ស្វាយរំពារ ដារ ច្រណូក ពោធិ៍ ត្រងិល) មានចំនួន ១០៤ហិកតា ស្មើនឹង២២៣គ្រួសារ។ ស្រុករលាប្អៀរ រងផលប៉ះពាល់ ៥ឃុំ (គោកបន្ទាយ អណ្ដូងស្នាយ ស្វាយជ្រុំ ជ្រៃបាក់ ទឹកហូត) មានចំនួន ២៥៣,៧០ហិកតា ស្មើនឹង ៣២៥គ្រួសារ។ ស្រុកកំពង់ត្រឡាច រងផលប៉ះពាល់ ២ឃុំ (សែប និងតាជេស) មានចំនួន ៧៧,៥០ហិកតា ស្មើនឹង ៣១៨គ្រួសារ។ ស្រុកជលគីរី រងផលប៉ះពាល់ ១ឃុំ (ព្រៃគ្រី) មានចំនួន ១១០ហិកតា ស្មើនឹង ១១៥ហិកតា ៕ អត្ថបទ ៖ ហុង វាស្នា