តៃវ៉ាន់៖ លោកស្រី Tsai Ing-wen មេដឹកនាំកោះតៃវ៉ាន់ បាននិយាយកាលពីថ្ងៃចន្ទថាពុំមានឱកាសសម្រាប់ការសម្របសម្រួល ជុំវិញដែនអធិបតេយ្យភាពរបស់ដែនកោះស្វ័យគ្រប់គ្រងមួយនេះទេ ប៉ុន្តែលោកស្រី មានបំណងធ្វើការជាមួយចិនដើម្បីស្វែងរកមធ្យោបាយដែលអាចទទួលយកបានទាំងសងខាង ក្នុងការថែរក្សាសន្តិភាពទូទាំងច្រកសមុទ្រនេះ។
លោកស្រី Tsai បាននិយាយនៅក្នុងសុន្ទរកថាទិវាជាតិរបស់កោះតៃវ៉ាន់ ដែលធ្វើឡើងស្របពេលភាពតានតឹងរវាងទីក្រុងតៃប៉ិ និងទីក្រុងប៉េកាំងបានកើនឡើងដល់ចំណុចខ្ពស់បំផុតក្នុងប៉ុន្មានទសវត្សរ៍ថ្មីៗនេះថា ការឯកភាពរបស់ប្រជាជនតៃវ៉ាន់ គឺដើម្បីការពារអធិបតេយ្យភាព និងរបៀបរស់នៅបែបប្រជាធិបតេយ្យ និងសេរីរបស់យើង។ពុំមានឱកាសសម្រាប់ការសម្របសម្រួលសជុំវិញបញ្ហានេះទេ ។
កោះតៃវ៉ាន់ដែលមានប្រជាជន 23លាននាក់ ស្ថិតនៅចម្ងាយជាង 177 គីឡូម៉ែត្រ ក្បែរឆ្នេរសមុទ្រចិន ។រយៈពេលជាង70 ឆ្នាំមកនេះ ភាគីទាំង២ត្រូវបានគ្រប់គ្រងដាច់ដោយឡែកពីគ្នា ប៉ុន្តែពុំបានបញ្ឈប់បក្សកុំម្មុយនីសចិនមិនឲ្យអះអាងថាកោះនេះគឺជារបស់ខ្លួននោះទេ ទោះបីជាខ្លួនមិនដែលបានគ្រប់គ្រងដែនកោះនេះក៏ដោយ។
ប្រធានាធិបតីចិន លោក Xi Jinping បាននិយាយថា ការជុំជាតិ រវាងចិននឹងកោះតៃវ៉ាន់ គឺជារឿងជៀសមិនផុត និងពុំបានទាត់ចោលក្នុងការប្រើប្រាស់កម្លាំងក្រសោបយកកោះនេះ ប៉ុន្តែក្នុងសុន្ទរកថារបស់លោកស្រី កាលពីថ្ងៃចន្ទ មេដឹកនាំកោះមួយនេះ បានជំរុញឲ្យបណ្ដាមេដឹកនាំចិន ឲ្យបោះបង់ចោលគំនិតនោះ ៕ សុខ មាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
