ហៃទី៖ ប្រទេសហៃទី បានអំពាវនាវសុំឱ្យមានកងកម្លាំងប្រដាប់អាវុធអន្តរជាតិ ខណៈក្រុមជន​អន្ធពាល និងក្រុមបាតុករធ្វើឱ្យប្រទេសនេះជាប់គាំង ក្នុងពេលមានការខ្វះប្រេង និងទឹកប្រើប្រាស់ ខណៈអង្គការសហប្រជាជាតិពិចារណាលើការដាក់ពង្រាយកងកម្លាំងប្រដាប់​អាវុធយ៉ាងឆាប់រហ័ស ដើម្បីជួយបញ្ចប់វិបត្តិនៅប្រទេសហៃទី។

ការបិទផ្លូវនៅតែបន្តរារាំងចរាចរណ៍ក្នុងរដ្ឋធានី ដែលក្រុមអ្នកតវ៉ាស្រែកប្រឆាំងការចូលកាន់​កាប់​របស់​បរទេស និងទាមទារឱ្យមានការលាលែងពីតំណែងរបស់នាយករដ្ឋមន្ត្រី។

កាលពីថ្ងៃសុក្រ ​រដ្ឋាភិបាលប្រទេសហៃទី បានចេញផ្សាយឯកសារផ្លូវការមួយដែលចុះហត្ថ​លេខា​ដោយនាយករដ្ឋមន្ត្រី លោក Ariel Henry ​និងមន្ត្រីជាន់ខ្ពស់ចំនួន 18 រូប​ស្នើសុំពីដៃគូអន្តរជាតិនូវការ​ដាក់​ពង្រាយ​កម្លាំងប្រដាប់​អាវុធឯកទេសជាបន្ទាន់ក្នុងចំនួនគ្រប់គ្រាន់ ដើម្បីបញ្ឈប់​សកម្មភាព​ឧក្រិដ្ឋកម្ម​របស់​ក្រុមជន​អន្ធពាលប្រដាប់អាវុធនៅទូទាំង​ប្រទេស។

ការស្នើសុំនេះធ្វើឡើងជិតមួយខែ បន្ទាប់ពីក្រុមជនអន្ធពាលដ៏មានឥទ្ធិពលបំផុតរបស់ប្រទេសហៃទី បានឡោមព័ទ្ធឃ្លាំងប្រេងឥន្ធនៈសំខាន់មួយក្នុងរដ្ឋធានី ព័រអូប្រាំង ដោយរារាំងការចែកចាយប្រេង ម៉ាស៊ូត និងប្រេងសាំងប្រហែល 10 លានហ្គាឡុង និងប្រេងកាតជាង 8សែនលីត្រដែលរក្សាទុក​នៅទីតាំងនោះ។

ប្រជាជនហៃទី ជាច្រើនបាន​ច្រានចោល​គំនិតនៃការធ្វើអន្តរាគមន៍ពីអន្តរជាតិ ​ដោយនិយាយថា កងរក្សាសន្តិភាពរបស់អង្គការសហប្រជាជាតិត្រូវបានចោទប្រកាន់ពី​បទរំលោភផ្លូវភេទ និង​បានបង្កឱ្យមានការរាលដាលជំងឺអាសន្នរោគកាលពីមួយទសវត្សរ៍មុន ដែលបានបណ្តាលឲ្យ​មនុស្សជិត 10,000 នាក់ស្លាប់។

នគរបាលជាតិរបស់ប្រទេសហៃទី បានព្យាយាមគ្រប់គ្រងក្រុមជនអន្ធពាលដោយធនធានកង​កម្លាំង​មានកម្រិត និងកង្វះបុគ្គលិក ដោយមានតែមន្ត្រីសកម្មចំនួន 12,800 នាក់ប៉ុណ្ណោះសម្រាប់ប្រទេស​ដែលមានប្រជាជនជាង 11 លាននាក់។

ក្រុមអ្នកតវ៉ាក៏បានបិទផ្លូវទាមទារឲ្យលោក Henry ចុះចេញពីតំណែងចាប់តាំងពីលោកបាន​ប្រកាស​កាលពីដើមខែកញ្ញាថា រដ្ឋបាលរបស់លោកមិនអាចមានលទ្ធភាពក្នុងការឧបត្ថម្ភ​ធនលើ​ប្រេងឥន្ធនៈ​បានទៀតទេ ដែលនាំឱ្យមានការកើនឡើងយ៉ាងខ្លាំង​នៃតម្លៃប្រេងសាំង ​ប្រេងម៉ាស៊ូត និងប្រេងកាត៕