ប៉ាស៊ីហ្វិក៖ បច្ចុប្បន្ននេះ បានក្លាយជាព្យុះត្រូពិច ដែលកាលពីពេលមុនជាព្យុះដ៏មានឥតទ្ធិពល Julia បានបក់បោកមកលើប្រទេសហ្គាតេម៉ាឡា និងអែលសាវ៉ាឌ័រ ដោយមានភ្លៀងធ្លាក់ខ្លាំងកាលពីថ្ងៃចន្ទ បន្ទាប់ពីព្យុះបានវាយបោកបក់ជាថ្មីនៅតំបន់សមុទ្រប៉ាស៊ីហ្វិក ក្រោយការវាយបក់លើប្រទេស​នីការ៉ាហ្គ័រ។ យ៉ាងហោចណាស់មនុស្ស ១៩នាក់ ត្រូវបានរាយការណ៍ថាបានស្លាប់ដោយសារព្យុះ​ដោយផ្ទាល់ ឬដោយប្រយោល។

ទីភ្នាក់ងារបង្ការគ្រោះមហន្តរាយរបស់ប្រទេសហ្គាតេម៉ាឡា និយាយថា មនុស្ស ៥នាក់បានស្លាប់ បន្ទាប់ពីបាក់ដីភ្នំមកលើលំនៅឋានក្នុងខេត្ត Alta Verapaz ​ដោយបានកប់ពួកគេ។

អាជ្ញាធរក្នុងប្រទេសអែលសាវ៉ាឌ័រ និយាយថា ទាហានអែលសាវ៉ាឌ័រ ប្រាំនាក់បានស្លាប់ បន្ទាប់ពី​ជញ្ជាំង​ផ្ទះបានរលំ ​ហើយមនុស្សពីរនាក់ផ្សេងទៀតបានស្លាប់នៅក្នុងទីក្រុង​ Guatajiagua ភាគខាងកើត បន្ទាប់ពីភ្លៀងធ្លាក់ខ្លាំង និង ២នាក់​ទៀត បាន​ស្លាប់​ក្នុង​ពេល​ត្រូវ​ចរន្ត​ទឹក​ហូរនាំ និងដើមឈើ​រលំ​សង្កត់​។

ក្នុងពេលទឹកទន្លេបានហូរហៀរច្រាំង ប្រទេសអែលសាវ៉ាឌ័រ បានប្រកាសគ្រាអាសន្ន និងបានបង្កើត ទីជម្រកសុវត្ថិភាពចំនួន 80កន្លែង ។ ប្រទេសហុងឌូរ៉ាស ដែលនៅជិតខាងនោះ ស្ត្រីអាយុ 22 ឆ្នាំម្នាក់​បានស្លាប់​នៅពេលដែលត្រូវបានទឹកហូរកាត់ ​ហើយមនុស្ស ៣នាក់ផ្សេងទៀតបានស្លាប់ នៅពេល​ដែលទូករបស់ពួកគេបានលិច។

ព្យុះ Julia បានបោកបក់លើឆ្នេរសមុទ្រការ៉ាអ៊ីប ភាគកណ្តាលប្រទេសនីការ៉ាហ្គ័រ កាលពីព្រឹកថ្ងៃ​អាទិត្យ​ជាព្យុះដ៏មានឥទ្ធិពលមានកម្លាំងខ្យល់អតិបរមា140 គីឡូម៉ែត្រក្នុងមួយម៉ោង ។

មជ្ឈមណ្ឌល បាននិយាយថា ទឹកជំនន់ភ្លាមៗ និងបំណាក់ដីដែល​គំរាមកំហែង​ដល់អាយុជីវិត​អាច​កើត​មាននៅទូទាំងអាមេរិកកណ្តាល​ និងភាគខាងត្បូងប្រទេសម៉ិកស៊ិករហូតដល់ថ្ងៃអង្គារនេះ ដោយព្យុះត្រូវបានគេរំពឹងថា នឹងនាំមកនូវទឹកភ្លៀងធ្លាក់រហូតដល់38 សង់ទីម៉ែត្រ នៅតំបន់ដាច់ស្រយាល។

នៅប្រទេសហ្គាតេម៉ាឡា មនុស្សប្រមាណ 1,300 នាក់​បានចាកចេញពីលំនៅឋានរបស់ពួកគេដោយ​សារតែទឹកជំនន់​ និងទឹកហូរខ្លាំង៕