ភ្នំពេញ៖ គ្រឹះស្ថានធនាគារ និងមីក្រូហិរញ្ញវត្ថុមួយចំនួន បានដំឡើងអត្រាការប្រាក់បញ្ញើរបស់ខ្លួនឲ្យឡើងខ្ពស់ ដើម្បីប្រមូលប្រភពទុនក្នុងស្រុក។ ការដំឡើងអត្រាប្រាក់បញ្ញើនេះ គឺបណ្តាលមកពីការដំឡើងអត្រាការប្រាក់គោលរបស់ធនាគារកណ្តាលសហរដ្ឋអាមេរិក ធ្វើឱ្យប៉ះពាល់ដល់ប្រភពទុនបរទេសរយៈពេលវែងលើប្រាក់កម្ចីចូលមកកម្ពុជា។
លោក កាំង តុងងី អ្នកនាំពាក្យសមាគមមីក្រូហិរញ្ញវត្ថុកម្ពុជា (CMA) បានថ្លែងលើកឡើងក្នុងកិច្ចសម្ភាសន៍ជាមួយភ្នាក់ងារ អ្នកយកព័ត៌មាន BTV នៅថ្ងៃទី ១១ ខែ តុលា ឆ្នាំ២០២២ នេះថា ការដំឡើងអត្រាការប្រាក់របស់សហរដ្ឋអាមេរិក បានជំរុញឲ្យអត្រាការប្រាក់ លើសកលលោកមានការប្រែប្រួល ដែលបញ្ហានេះ សម្រាប់ទីផ្សារនៅកម្ពុជា លោកបានសង្កេតឃើញមានគ្រឹះស្ថានហិរញ្ញវត្ថុមួយចំនួន បានចាប់ផ្តើមដំឡើងការប្រាក់លើការផ្តល់ឥណទាន ឬប្រាក់កម្ចីហើយ ដោយសារគ្រឹះស្ថានទាំងនោះ ពឹងផ្អែកប្រភពទុនពីក្រៅស្រុក។
លោកបន្តថា ស្របពេលស្ថានភាពប្រែប្រួល ទុនពីបរទេសឡើងថ្លៃអាត្រាការប្រាក់ គ្រឹះស្ថានមីក្រូហិរញ្ញវត្ថុ បានដំឡើងអត្រាការប្រាក់ដល់អតិថិជនដែលដាក់ប្រាក់បញ្ញើ ទទួលបានអត្រាការប្រាក់ខ្ពស់ជាងមុន។ ជាពិសេសនៅក្នុងស្ថានភាពនេះផងដែរ គ្រឹះស្ថានមីក្រូហិរញ្ញវត្ថុ នឹងមិនដំឡើងថ្លៃចំពោះអត្រាការប្រាក់ការផ្តល់កម្ចីឥណទាននោះឡើយ ដែលប្រការទាំងនេះ ជាការចូលរួមចំណែកលើកកម្ពស់ និងស្តារជីវភាពប្រជាជន និងជំរុញកំណើនសេដ្ឋកិច្ចឡើងវិញក្នុងបរិបទ ជំងឺកូវីដ១៩។
លោកបណ្ឌិត អ៊ិន ចាន់នី នាយកប្រតិបត្តិធនាគារអេស៊ីលីដា ភីអិលស៊ី លើកឡើងថា ធនាគារអេស៊ីលីដា បានដំឡើងអត្រាការប្រាក់បញ្ញើ ដើម្បីកៀរគរប្រមូលទុន ក្នុងស្ថានភាពមានការប្រកួតប្រជែងក្នុងស្រុក និងមួយទៀត, គឺជាការលើកកម្ពស់ដល់អតិថិជនបន្ថែមផងដែរ។
ចំណែកការផ្តល់កម្ចីឥណទាន មិនមានការប្រើប្រួលអត្រាការប្រាក់ខ្លាំងនោះឡើយ ដែលការដំឡើងនេះ ធ្វើឲ្យត្រូវគ្នាជាមួយការកើនឡើងនៃថ្លៃដើម ដែលធនាគារយកពីបរទេសមកប្រើប្រាស់ សម្រាប់ឥណទានរយៈពេលវែង។
សូមបញ្ជាក់ថា ការដំឡើងអត្រាការប្រាក់បញ្ញើ ឬការដំឡើងឥណទានកម្ចី របស់គ្រឹះស្ថានធនាគារ និងមីក្រូហិរញ្ញវត្ថុ បណ្តាលមកពីការដំឡើងអត្រាការប្រាក់របស់រដ្ឋាភិបាលសហរដ្ឋអាមេរិក ដើម្បីបន្ថយអតិផរណានៅសហរដ្ឋអាមេរិក ខណៈប្រាក់ដុល្លារ ត្រូវបានប្រើប្រាស់សម្រាប់ការទូទាត់ពាណិជ្ជកម្មអន្តរជាតិ ដូច្នេះ ការដំឡើងអត្រាការប្រាក់របស់សហរដ្ឋអាមេរិក នឹងជំរុញឲ្យអត្រាការប្រាក់ជាទូទៅលើសកលលោកមានការប្រែប្រួលកើនឡើង៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
