កណ្ដាល ៖ អនុវត្តសេចក្ដីសម្រេចរបស់រាជរដ្ឋាភិបាល ស្ដីពីហាមឃាត់ការធ្វើដំណើរ ឆ្លងកាត់ចេញ-ចូល ពីខេត្តមួយទៅខេត្តមួយជាបណ្តោះអាសន្ន ដើម្បីទប់ស្កាត់ការរីករាលជំងឺ កូវីដ-១៩ នៅពេលនេះ រដ្ឋបាលខេត្តកណ្តាល បានដាក់ពង្រាយក្រុមកងកម្លាំង៣ប្រភេទ សហការជាមួយខេត្តជាប់ព្រំដែន ដាក់ប៉ុស្តិ៍ត្រួតពិនិត្យបិទលំហូរអ្នកដំណើរចេញចូលតាមផ្លូវជាតិសំខាន់ៗចំនួន៨គោលដៅធំនៅជុំវិញ ខេត្តកណ្តាល។
បើតាមឯកឧត្តម គង់ សោភ័ណ្ឌ អភិបាលខេត្តកណ្តាល បានថ្លែងប្រាប់BTV នៅថ្ងៃទី៩ខែមេសានេះថា នៅពេលនេះ រដ្ឋបាលខេត្តកណ្តាល បានពង្រាយកងកម្លាំងនគរបាលដាក់ប៉ុស្តិ៍ប្រចាំការ២៤ម៉ោងលើ២៤ម៉ោង នៅតាមផ្លូវជាតិសំខាន់ៗចេញចូលខេត្តកណ្តាល ដើម្បីត្រួតពិនិត្យអ្នកធ្វើដំណើរនិងមានការបិទចរាចរណ៍ខ្លះៗ ជាបណ្តោះអាសន្នចំនួន១៤ថ្ងៃ ដោយគិតចាប់ពីថ្ងៃទី៧ ដល់ថ្ងៃទី២០ ខែមេសានេះ និងបានខិតខំរួមសហការជាមួយអាជ្ញាធរខេត្តព្រំដែនអោយបានល្អដើម្បីទប់ស្កាត់ខ្សែបណ្តាញចម្លងមេរោគកូវីដ១៩ នៅក្នុងសហគមន៍ ក្នុងអំឡុងថ្ងៃឈប់សម្រាកបុណ្យចូលឆ្នាំប្រពៃណីជាតិខ្មែរ ។
ឯកឧត្តម គង់ សោភ័ណ្ឌ បន្តថា សម្រាប់ការដាក់ប៉ុស្តិ៍ត្រួតពិនិត្យលំហូរអ្នកដំណើរឆ្លងខេត្តនេះដែរ សម្រាប់អ្នកដំណើរ និងរថយន្តដឹកអ្នកដំណើរណាដែលមានភារកិច្ចចាំបាច់គឺអនុញ្ញាតអោយធ្វើដំណើរធម្មតា តែបើមិនចាំបាច់គឺមិនអនុញ្ញាតអោយធ្វើដំណើរឆ្លងខេត្តនោះទេ។
បើតាមអនុសេនីយឯក ញឹម ណារិទ្ធ នាយរងផ្នែកសណ្តាប់ធ្នាប់ចរាចរណ៍ស្រុកកណ្តាលស្ទឹង ដែលប្រចាំការនៅព្រំដែនខេត្តកណ្តាល និងខេត្តតាកែវ ផ្លូវជាតិលេខ បានថ្លែងថា នៅក្នុងអំឡុងពេលនេះ ប្រជាពលរដ្ឋមានយល់ដឹងច្រើន មិនធ្វើដំណើរច្រើនតាមផ្លូវ និងបាននាំគ្នាអនុវត្តសេចក្តីសម្រេចរាជរដ្ឋាភិបាល មិនធ្វើដំណើរឆ្លងខេត្ត ដើម្បីទប់ស្កាត់កូវី១៩ អំឡុងថ្ងៃឈប់សំរាកបុណ្យចូលឆ្នាំថ្មីនេះ។
ពាក់ព័ន្ធនឹងការបិទចរាចរណ៍ចេញចូលឆ្លងកាត់ខេត្តមួយទៅខេត្តមួយ និងការបិទបិទរមណីយដ្ឋានទេសចរណ៍ទូទាំងប្រទេស ជាបណ្ដោះអាសន្ននេះដែរ បានធ្វើអោយបណ្តាប្រជាពលរដ្ឋ បានផ្តល់ការគាំទ្រនូវចំណាត់ការដែលយើងកំពុងជួយលំបាកខ្លាំងនឹងបញ្ហារាតត្បាតកូវីដ-១៩ នៅក្នុងសហគមន៍ ហើយតាមរយៈចំណាត់ការនេះដែរ នឹងជំរុញអោយបណ្តាពលរដ្ឋនាំគ្នានៅផ្ទះ មិនចេញក្រៅផ្ទះ ដើម្បីការពារ និងកាត់ផ្តាច់បណ្តាញចម្លងមេរោគកូវីដ១៩។
សូមបញ្ជាក់ថា នៅក្នុងសេចក្តីសម្រេចរបស់រាជរដ្ឋាភិបាលហាមឃាត់ការធ្វើដំណើរឆ្លងកាត់ចេញចូលខេត្តមួយទៅខេត្តមួយនេះ បានចាត់ទុកភូមិសាស្ត្រខេត្តរាជធានីភ្នំពេញ និងខេត្ដកណ្តាលជាតំបន់តែមួយ ហើយការហាមឃាត់នេះក៏បានលើកលែងការធ្វើដំណើរមួយចំនួន ដូចជា ការដឹកជញ្ជូនទំនិញគ្រប់ប្រភេទតាមផ្លូវគោគ ផ្លូវទឹក និងផ្លូវដេក ការធ្វើដំណើរមន្ត្រីរាជការ និងកងកម្លាំងប្រដាប់អាវុធ ពលករមកពីក្រៅប្រទេស ការដឹកជញ្ជូនកម្មករដែលមានប័ណ្ណសំគាល់ការងារ លិខិតបេសកកម្ម និងប័ណ្ណអនុញ្ញាតពីក្រសួងការងារធ្វើការងារប្រចាំថ្ងៃជាដើម។ ក្រៅពីនេះរថយន្តប្រមូលសំរាម រថយន្តអគ្គីភ័យ ឡានពេទ្យ និងការធ្វើដំណើរពលរដ្ឋទៅស្វែងរកការព្យាបាលជំងឺនៅតាមមន្ទីរ ឬមណ្ឌលសុខភាព ដែលនៅជិត ត្រូវបានអនុញ្ញាតអោយធ្វើដំណើរផងដែរ៕
អត្ថបទ ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
