ថៃ៖ នាយករដ្ឋមន្ត្រីថៃ លោក Prayut Chan-o-cha កាលពីថ្ងៃចន្ទ បានបញ្ជាឱ្យទីភ្នាក់ងារ​អនុវត្តច្បាប់​រឹតបន្តឹង​ច្បាប់កាន់កាប់កាំភ្លើង និងបង្រ្កាបការប្រើប្រាស់​គ្រឿងញៀន បន្ទាប់ការសម្លាប់​រង្គាល​ដោយអតីតនគរបាលម្នាក់នៅ​មជ្ឈមណ្ឌល​ថែទាំកុមារពេលថ្ងៃ ដែលបានធ្វើឱ្យប្រទេសមាន​ការភ្ញាក់ផ្អើលខ្លាំង។

មនុស្សសរុប ៣៧នាក់ រួមទាំងកុមារ២៤នាក់ ត្រូវបានសម្លាប់ដោយកាំភ្លើងនិងកំបិត កាលពីសប្តាហ៍​មុន ដោយអតីតនគរបាល ដែលក្រោយមកបានសម្លាប់ប្រពន្ធ កូនប្រុស​ និងខ្លួនឯងនៅក្នុងក្រុង Uthai Sawan ជាក្រុងមួយមានចម្ងាយ 500 គីឡូម៉ែត្រភាគឦសានទីក្រុងបាងកក។ វាជាការស្លាប់កុមារច្រើនបំផុតនៅក្នុងការសម្លាប់រង្គាលដោយឃាតករតែម្នាក់ឯងក្នុងប្រវត្តិសាស្ត្រកាលពីពេលថ្មីៗនេះ។

អ្នកនាំពាក្យរដ្ឋាភិបាលលោក Anucha Burapachaisri បាននិយាយនៅក្នុងសេចក្តីថ្លែងការណ៍ថា លោកឧត្តមសេនីយ Prayut បានណែនាំអាជ្ញាធរឱ្យស្រាវជ្រាវ និងធ្វើតេស្តយ៉ាងសកម្ម​ចំពោះការ​ប្រើប្រាស់​គ្រឿងញៀនខុសច្បាប់​ ក្នុងចំណោមមន្ត្រី និងសហគមន៍ និងបង្កើនការព្យាបាល​អ្នកញៀន​គ្រឿងញៀន។

លោកនាយករដ្ឋមន្ត្រី បានបញ្ជាឱ្យមន្ត្រីចុះបញ្ចីរបស់រដ្ឋាភិបាល ដកហូតអាជ្ញាប័ណ្ណកាំភ្លើងរបស់​ម្ចាស់​កម្មសិទ្ធដែលបានចុះបញ្ជីហើយត្រូវបាន​គេរាយការណ៍ថា បាន​ប្រព្រឹត្ត​ការ​គំរាមកំហែង​ដល់សង្គមនិងបង្កើតភាពចលាចល ឬបង្កភាពវឹកវរ ដោយត្រូវបង្ក្រាបការលក់កាំភ្លើងខុសច្បាប់ ការរត់ពន្ធអាវុធ ​និងការប្រើប្រាស់អាវុធខុសច្បាប់។

អាជ្ញាធរប្រទេស​ថៃ មានផែនការ​ប្រមូល​កាំភ្លើង​មកវិញពី​មន្ត្រី ​និងមន្ត្រីនគរបាល​ដែល​បាន​ប្រើ​អាវុធ​ខុសគោលដៅ ​ឬ​ប្រព្រឹត្តយ៉ាងបំពាន​ក្នុង​កាតព្វកិច្ច។

កម្មសិទ្ធិ​នៃការប្រើប្រាស់កាំភ្លើង​មាន​កម្រិត​ខ្ពស់​នៅ​ប្រទេស​ថៃ ​បើ​ធៀប​នឹង​ប្រទេស​មួយ​ចំនួន​​នៅ​អាស៊ីអាគ្នេយ៍។ ​អាវុធខុសច្បាប់នាំចូលមកពីប្រទេស​ដែល​ហែកហួរ​ដោយជម្លោះគឺជារឿងធម្មតា៕